د اسلامي امارت له لوري په پوهنتونونو کې د نجونو زدهکړیالانو د زدهکړو بهیر ځنډېدو ته د غبرګونونو په لړ کې د پاکستان د بهرنیو چارو وزارت د دې پرېکړې په اړه ناهیلې ښودلې او له اسلامي امارت یې غوښتنه کړې چې پر خپلې کړې پرېکړې بیاکتنه وکړي.
د پاکستان د بهرنیو چارو وزارت نن چهارشنبه د لیندۍ ۳۰مه په یوې خبرپاڼه کې ویلي چې د نجونو زدهکړو په اړه د دغه هېواد دریځ روښانه او ثابت دی.
د بهرنیو چارو وزارت زیاته کړې: «موږ باوري یو چې هره ښځه او نارینه په اسلام کې له د زدهکړو له مساوي حق څخه برخمن دي.»
دا په داسې مهال دی چې د لوړو زدهکړو وزارت په تازهګۍ سره په یوه خپور کړي مکتوب کې د ټول هېواد په پوهنتونونو کې د نجونو لوړې زدهکړې ځنډولي دي.
دغه وزارت پرون سهشنبه په دې مکتوب کې دولتي او خصوصي پوهنتونونو ته سپارښتنه کړې چې د نجونو زدهکړې وځنډوي.
سلاموطندار پر ټویټر هم وڅارئ
په مکتوب کې لیکل شوي چې د نجونو د لوړو زدهکړو پرېکړه د اسلامي امارت د حکومت د کابینې په ناسته کې شوې ده. دغې پرېکړې تراوسه ګڼشمېر کورني او نړیوال غبرګونونه له ځان سره لرلي دي.
