په بادغیس کې د شري ناروغي خپرېدل لامل شوي چې ګڼشمېر کورنۍ د خپلو ماشومانو د درملنې لپاره ولایتي روغتون ته ورشي. ځینې دغه کورنۍ چې له یوې اوونۍ راهیسې د خپلو ماشومانو درملنې ته په تمه دي وايي، ماشومان یې د شري واکسین د نه ورکېدو له کبله پر دې ناروغۍ اخته شوي دي.
ګلناز چې دوه ماشومان یې پر شري اخته شوي او اوس یې د بادغیس ولایتي روغتون ته راوړي وايي، ماشومانو ته یې واکسین نه دی ورکړل شوی او همدا لامل دی چې اوس پر شري اخته شوي دي.
د سلاموطندار پښتو فېسبوکپاڼه وڅارئ
بيبي ګل چې خپل ماشوم یې د درملنې لپاره راوړی، هم غوښتنه کوي چې ماشومانو ته یې باید د شري ځانګړی واکسین ورکړل شي، څو پر دې ناروغي اخته نه شي.
د بادغیس د عامې روغتیا وزارت د سرویلانس مسوول عبدالحلیم قادري وايي، سږ کال د ناامنیو او د شري واکسین د نه تطبیق له کبله پر دې ناروغي د اخته کسانو شمېر زیات شوی دی.
د هغه په وینا، له هغه راهیسې چې د شري ناروغي خپره شوې، تراوسه څه باندې ۳۰۰ ماشومان پرې اخته شوي چې له ډلې یې ځینې هغه ښه شوي او درې نور مړه شوي هم دي. د هغه په وینا، په ۲۰۲۰ کال کې چا اجازه نه ورکوله چې خپل کسان د شري واکسین د ورکړې په موخه کلیو ته ولېږي.
د بادغیس د عامې روغتیا رییس محمدآصف قاند وايي، زیانلیدونکو سیمو کې یې د شري ناروغي د مخنیوي لپاره د واکسین یوه دوره کمپاین کړی او هڅه کوي چې د موسسو په همکارۍ په دغه ولایت کې له شري سره د مبارزې پراخ کمپاین پیل کړي.
دا په داسې حال کې ده چې د بادغیس روغتیايي مسوولانو تر دې وړاندې د شري ناروغۍ ترڅنګ، پر خوارځواکۍ د اخته ماشومانو د شمېر زیاتېدو په اړه هم اندېښنه ښودلې وه. دوی ویلي وو چې په تېرو څه کم درېوو میاشتو کې شاوخوا پنځه زره ماشومان له سختې خوارځواکۍ سره مخ شوي دي.
