د نظامي بندیانو د کورنۍ غړي نن د ننګرهار په ولایتي شورا کې راټول شوي وو او له حکومت نه یې د خپلو بندیانو د خوشې کولو غوښتنه کوله.
دوی ویل، ګڼشمېر حکومتي نظامیان د ځینو جرمونو له کبله له کلونو راهیسې په بندخونو کې پراته دي، خو حکومت یې په اړه هېڅ اقدام نه دی کړی.
د یادو کورنۍ غړیو پر حکومت غږ وکړ چې د طالب بندیانو په څېر دې د افغان پوځ سرتېري هم له بنده خوشې کړي.
خانفراز شېرزاد د یوه نظامي بندي د کورنۍ غړی دی. هغه وايي، طالبانو او اسلامي حزب له حکومتي بندخونو نه د خپلو کسانو د خلاصون لپاره تل غږ پورته کړی او ګڼشمېر یې خوشې شوي هم دي، خو د نظامي بندیانو د خلاصون لپاره د ازادۍ غږ نه دی شوی.
د یوه بل نظامي بندي د کورنۍ غړی قاري فضلحق وايي، حکومت دې د سرتېري ورځې په ویاړ خپل نظامیان له بنده خوشې کړي.
د نظامي بندیانو د کورنیو غړي وايي، ولسمشر محمداشرف غني ورسره د سولې په وروستۍ مشورتي لویه جرګې کې منلې وه چې په بندخونو کې ټول نظامي بندیان به له قید و شرط پرته خوشې کړي، خو په وینا یې، ولسمشر خپله ژمنه نه ده عملي کړې.
د سولې مشورتي جرګه د هغو څلورو سوو طالب بندیانو د خلاصون په اړه حکومت ته د مشورې ورکولو لپاره جوړه شوې وه چې ستر جرمونه یې کړي وو.
په دې جرګه کې د طالب بندیانو د خوشې کولو تر څنګ، پر دې هم هوکړه شوې وه چې ټول هغه نظامیان به هم خوشې کېږي چې په لویو جرمونو کې ښکېل نه دي.
د همدې مشورتي جرګې یو غړی او د ننګرهار قومي مشر سیدرحمان مومند وايي، په یاد یې دي چې ولسمشر محمداشرف غني ورسره د ټولو بندي نظامیانو د خلاصون ژمنه کړې وه، خو تر اوسه نه دي خوشې شوي.
هغه وايي، دا د شرم ځای دی چې د لسګونو او سلګونو افغانانو پر وژلو تورن او هغه کسان خوشې کېږي چې د دولت او نظام پر وړاندې یې جګړه کړې، خو نظامي بندیان بیا تر اوسه په بندخونو کې دي.
د یادو کورنیو غړي اندېښنه لري، که حکومت د نظاميانو په خوشې کېدو کې لاس پهکار نه شي؛ نو نه یوازې پر حکومت به د خلکو باور راکم شي، بلکې د نورو سرتېرو پر مورال به هم منفي اغېز وکړي.
د نظامي بندیانو کورنۍ وايي، د بندي نظامیانو په خوشې کېدو سره د افغان پوځ لیکې پیاوړې کېدای شي او حکومت باید ژرترژره د خلکو دې غوښتنې ته مثبت ځواب ووايي.
د بندي شویو سرتېرو کورنۍ داسې مهال د خپلو کورنیو د غړیو خوشې کولو غوښتنه کوي چې ولسمشر محمداشرف غني د مشورتي لویې جرګې پر مهال ژمنه کړې وه چې د پنځه زره طالب بندیانو له خوشې کېدو سره به د حکومت په بندخونو کې هغه سرتېرې هم له بنده خلاص کړي چې درانه جرمونه یې نه وي کړي.
