د ملګرو ملتونو عمومي غونډې یو پرېکړهلیک تصویب کړ چې له مخې یې د افغانستان د اسلامي امارت هغه غوښتنه شاته غورځوي چې له خپل لوري یې ملګرو ملتونو ته خپل نوی استازی ورپېژندلی و.
دغه پرېکړهلیک پرون د ملګرو ملتونو سازمان په عمومي غونډه کې له رای ګیرۍ پرته د عمومي اجماع پر بنسټ تصویب شو. د ملګرو ملتونو د ۱۹۳ کسیزې عمومي غونډې د پرېکړهلیک پر بنسټ، د افغانستان د پخواني حکومت استازی غلام محمد اسحاقزی به خپلې دندې ته دوام ورکوي. د دې پرېکړهلیک مسوده تېره اوونۍ د ملګرو ملتونو د باور ورکوونکې کمېتې لهخوا د ملګرو ملتونو عمومي غونډې ته وړاندې کړې وه.
د سلاموطندار پښتو فېسبوکپاڼه وڅارئ
د ملګرو ملتونو د ۱۹۳ غړو هېوادونو د رسمي استازیو د باور ورکوونکې کمېټې تېره چهارشنبه دې سازمان ته د اسلامي امارت له لوري ټاکل شوي استازي ته د افغانستان د دايمي استازي د سپارلو پرېکړه وځنډوله. اسلامي امارت په قطر کې د خپل سیاسي دفتر ویاند سهیل شاهین په ملګرو ملتونو کې د خپل استازي په توګه نومولی و.
نوموړي په ملګرو ملتونو کې د افغانستان د استازي څوکۍ اسلامي امارت د نه سپارلو پرېکړه ناسمه بللې او ویلي یې دي چې له افغانانو څخه د هغوی مشروع حق اخیستل شوی دی.
د اسلامي امارت لهخوا نومول شوي استازي سهیل شاهین ته په ملګرو ملتونو کې د افغانستان د څوکۍ ورکول د اسلامي امارت د حکومت په رسمیت پېژندلو لپاره مهم ګام ګڼل کېږي.
