بدخشان کې محلي سرچینو سلاموطندار ته ویلي چې بېګاه شاوخوا ۱۰:۴۷ دقیقې زلزلې د دغه ولایت مرکز فیضاباد ښار او یوشمېر ولسوالۍ لړزولې دي.
د سلاموطندار پښتو فېسبوکپاڼه وڅارئ
په همدې حال کې د امریکا د زلزلې اړوند یوه سازمان ویلي چې د دې زلزلې مرکز د بدخشان مرکز فیضاباد ښار و. دغه سازمان زیاته کړې چې یاده زلزله ۴،۷ درجې وه او په ۶۰ کیلومټره ژوروالي سره شوې ده.
یاد سازمان ویلي چې په تاجکستان، ازبکستان، پاکستان او ایران کې هم دا زلزله احساس شوې ده.
بلهخوا د بدخشان د طبیعي پېښو پر وړاندې د مبارزې رییس محمداکرم اکبري وايي چې د دوی د لومړنیو معلوماتو له مخې، دغې زلزلې په فیضاباد ښار او یفتل، درایم او بهارک ولسوالیو کې ۷۶ کورونه نړولي دي.
د نوموړي په وینا، په بدخشان کې د شوې زلزلې له کبله چا ته مرګژوبله نهده اوښتې.
دا په داسې حال کې ده چې څو ورځې وړاندې هم ۴،۳ درجې زلزلې بدخشان لړزولی و.
