د هرات په اسلامکلا ګمرک کې اورلګېدنه؛ تر اوسه ۱۰ کسان ټپیان شوي
د هرات محلي چارواکي وايي چې د دغه ولایت په اسلامکلا ګمرک کې لسګونه ټانکرو او تاسیساتو اور اخیستی دی.
د هرات والي سیدعبدالوحید قتالي وايي، نن له غرمې وروسته په اسلامکلا ګمرک کې اور لګېدلی چې په وینا یې، د هوايي ځواک له مرستې پرته د مهارېدو وړ نه دی. د هغه په خبره، د دې اورلګېدنې د مهارولو لپاره یې د بهرنیو چارو وزارت له لارې له ایران نه مرسته غوښتې ده، خو د ایران مشهد هم د دغه اور د مهارېدو امکانات نه لري. قتالي زیاتوي، اوس یې له بهرنیو ځواکونو مرسته غوښتې چې له هوا نه دا پراخه اورلګېدنه مهار کړي.
