د هرات د امنیې قوماندانۍ ویاند عبدالاحد وليزاد مني چې د دغه ولایت پر غوریان ولسوالي د طالبانو په برید کې د یادې ولسوالي امنیه قوماندان نقیبالله سلطانزی له خپلو درېوو سرتېرو سره وژل شوی دی.
دا پېښه بېګاه شوې ده. د وليزاده په وینا، په یاده نښته کې د دوو طالب قوماندانانو په ګډون، ۵ وسلهوال وژل شوي او ۷ نور ټپیان دي.
په غوریان ولسوالي کې یوه باوري محلي سرچینه وايي چې په یاده نښته کې ۴ پولیس ټپیان شوي هم دي.
د سرچینې په وینا، امنیتي ځواکونو تر نن سهار پورې له طالبانو سره جګړه وکړه او څو ځله یې په هرات کې له امنیتي ادارو نه مرسته وغوښتله، خو د مرستې نه رسېدو له کبله د یادې ولسوالي امنیه قوماندان له خپلو درېوو سرتېرو سره ووژل شو.
دغه سرچینه زیاتوي چې د دواړو لوریو ترمنځ جګړه کې د سیمې خلکو ته هم زیان اوښتی دی.
طالبانو تر اوسه په دې اړه څه نه دي ویلي.
