د ملګرو ملتونو د بشري مرستو همغږې کوونکې ادارې یا اوچا د یوې خبرپاڼې په خپرولو سره ویلي، تمه ده دغه سازمان د روانې اوونۍ د سهشنبې پر ورځ د افغانستان لپاره د مرستو راټولولو په موخه یوه ناسته جوړه کړي.
د اسلامي امارت د بهرنیو چارو وزارت چارسمبالی امیرخان متقي په پاکستان کې د اسلامي همکاریو سازمان په ناسته کې له ګډون وروسته، نن بېرته هېواد ته راستون شو. نوموړي د کابل هوايي ډګر کې خبریالانو ته وویل چې د افغانستان په اړه د اسلامي همکاریو سازمان ناسته هیلهبښوونکې وه. متقي زیاته کړې چې اسلامي امارت په غوڅه توګه د داعش ډلې د فعالیتونو زیاتېدو پر وړاندې اقدام کړی او د دغې ډلې په اړه اندېښنې له منځه تللي دي.
د پاکستان په کوربهتوب د اسلامي همکاریو سازمان غونډې ته د اسلامي امارت د بهرنیو چارو وزیر امیرخان متقي د خپلې وینا پر مهال ویلي چې د افغانیو ارزښت ساتلو لپاره دوی د توکو د مرستو پر ځای نغدو پیسو ته اړتیا لري.
د هند د بهرنیو چارو وزیر جېشنکر ویلي، د مرکزي اسیا هېوادونه له خنډ پرته په افغانستان کې د ټولګډونه حکومت جوړېدو، له ترهګرۍ سره د مبارزې او د بشردوستانه مرستو د تضمین په اړه ګډې اندېښنې لري. نوموړي د افغانستان له وضعیت د اندېښنې په څرګندولو سره ویلي، د دغه هېواد له اوسېدونکو سره د مرستې لپاره باید ګډې حل لارې ولټول شي.
د اروپايي ټولنې د بهرنیو چارو وزیران نن په بروکسل کې د افغانستان روان اقتصادي او ناوړه بشري وضعیت په اړه ناسته کوي. د جرمني د بهرنیو چارو وزارت په یوې خپره کړې ویناپاڼه کې ویلي چې په دغه ناسته کې به افغانستان ته د بشري مرستو رسولو پر وړاندې د شته خنډونو د لرې کولو او اړمنو کسانو ته د مرستو رسولو پر لارو چارو خبرې وشي.
د افغانستان په اړه په هند کې د سیمهییز امنیت ناسته چې نن چهارشنبه په نوې ډهلي کې جوړه شوه، پکې د سیمې هېوادونو په افغانستان کې د ترهګریزو فعالیتونو له ډېروالي اندېښنه څرګنده کړه او زیاته یې کړه چې د سیمې هېوادونه باید له ترهګرۍ سره د مبارزې په برخه او د امنیتي ننګونو په اړه تمرکز وکړي.
د ایران په پلازمینې تهران کې د افغانستان د ګاوڼدیو هېوادونو د بهرنیو چارو وزیرانو غوڼده چې په حضوري او انلاین بڼې جوړه شوې وه، پکې ګډون کوونکو هېوادونو د اسلامي امارت د استازي په نهشتون کې پرېکړه کړې چې په افغانستان کې دې ټولګډونه حکومت جوړ شي. خو یوشمېر شنونکي بیا دغه ناسته د ګډونکوونکو هېوادونه په ګټه بولي.
د رویټرز خبري اژانس د یوه راپور په خپرولو سره ویلي چې د چین د بهرنیو چارو وزیر وانګ یي، په افغانستان کې د بېوزلۍ او لوږې له زیاتوالي اندېښنه ښودلې او له نړیوال بانک او د پیسو نړیوال صندوق څخه یې غوښتنه کړې چې دغه هېواد سره مالي مرستې وکړي. د چین د بهرنیو چارو وزیر دغه څرګندونې یونان ته د خپل سفر پر مهال کړي دي.
د افغانستان د ګاونډویو هېوادونو د بهرنیو چارو وزیرانو ناسته نن د ایران په پلازمېنې تهران کې جوړېږي. ټاکل شوې چې د ایران ولسمشر سیدابراهیم ریسي د دغې ناستې پرانیسته وکړي او د ملګرو ملتونو سرمنشي انتیو ګوتریش به هم د دغې ناستې په تړاو خپل پیغام ورکړي.
د اسلامي امارت د بهرنیو چارو وزارت ویلي، د روسیې د ولسمشر ولادیمیر پوتین له هغه پرېکړې هرکلی کوي چې پر بنسټ به یې د دغه هېواد د ترهګرو ډلو له نوملړ څخه د طالبانو نوم ووېستل شي.
امریکايي چارواکي وایي چې د افغانستان په اړه به د روسیې په کوربهتوب د «ترویکا» په ناسته کې ګډون ونه کړي. د امریکا د بهرنیو چارو وزارت ویاند نډ پرایس وایي، دغه هېواد د فني ستونزو له امله نه شي کولای چې په دغه ناسته کې ګډون وکړي. نډ پرایس دغه ناسته اغېزمنه او رغنیزه بولي او وایي، امریکا د « ترویکا» بلې ناستې ته د ګډون په موخه په تمه ده.
د اسلامي امارت د بهرنیو چارو وزارت مسوولان وایي چې د مسکو ناسته کې د ګډون لپاره اماده دي او دغې ناستې ته یې ځانګړی پلاوی هم جوړ کړی دی. د بهرنیو چارو وزارت ویاند عبدالقهار بلخي ویلي، په دغه ناسته کې به د رییسالوزرا د دویم مرستیال په مشري یو پلاوی د دوی له لوري د مسکو په ناسته کې ګډون وکړي.
د روسیې تاس خبري اژانس د یاد هېواد د بهرنیو چارو د وزیر د مرستیال سرګي ورشینین له قوله راپور ورکړی چې تمه ده تر راتلونکو دوو ورځو پورې «جي ۲۰» هېوادونه د افغانستان په اړه غونډه وکړي. د روسیې د بهرنیو چارو د وزیر مرستیال ویلي چې په دغه ناسته کې د ګډون لپاره باید دوی ته بلنلیک راواستول شي.
ولسمشر محمد اشرف غني نن د بلخ ولایت د امنیت وضعیت د ارزونې په موخه دغه ولایت ته سفر کړی او تمه وه چې رسنۍ د نوموړي دغه سفر ته خبري پوښښ وکړي، خو په دغه ولایت کې خبریالانو ته اجازه نه ده ورکړل شوې چې د ولسمشر دغه سفر ته خبري پوښښ وکړي.
د بهرنیو چارو وزارت مرستیال ویاند حامد تهذیب سلاموطندارته ویلي، تمه ده سبا د تاجکستان پلازمېنه دوشنبې کې د شانګهای سازمان د غړو هېوادونو د بهرنیو چارو وزیرانو ترمنځ غونډه جوړه شي.
د افغان دولت او طالبانو استازیو نن په تهران کې له دوهورځني بحث وروسته اعلامیه خپره کړه. په اعلامیه کې لیکل شوي چې جګړه د حل لاره نه ده او باید پر سیاسي حللارې تمرکز وشي. په اعلامیه کې د تهران غونډه ګټوره بلل شوې او لیکل شوي چې جګړه د افغانستان سلامتیا ته زیان رسوي او د پای ته رسېدو لپاره یې باید سیاسي لارې چارې ولټول شي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
