له څو ورځو راهیسې په کابل، مزار شریف او کندوز کې د اسلامي امارت له لوري د کورونو بیا پلټلو په اړه راپورونه خپرېږي. د مزار شریف او کندوز اوسېدونکو سلاموطندار ته ویلي چې اسلامي امارت په دغو ولایتونو کې یو ځل بیا د خلکو د کورونو پلټلو ته مخه کړې او لا هم دا لړۍ روانه ده. د اسلامي امارت له لوري په دغه ولایتونو کې د کورونو د پلټنې عملیاتو پیلېدل د ټولنیزو رسنیو د یوشمېر کارونو له ګڼو غبرګونونو سره هم مخ شوی دی.
کابل کې د امریکا د یوې بېپېلوټه الوتکې په هوايي برید کې د القاعده ډلې مشر ایمن الظواهري له وژلکېدو وروسته د یاد هېواد د بهرنیو چارو وزارت خبرداری ورکړی چې د امریکا له لوري د القاعده مشر وژل کېدل، ښايي یاده ډله پر امریکايي وګړو او تاسیساتو بریدونو ته وهڅوي.
د امریکا ولسمشر جو بایډن پرون سپینه ماڼۍ کې د وینا پر مهال وویل، د روانې اوونۍ د یکشنبې پر ورځ یې کابل کې د القاعده شبکې مشر ایمن الظواهري د بېپیلوټه الوتکې برید کې وژلی دی. کابل کې د القاعده شبکې د مشر وژل کېدو ګڼ غبرګونونه راپورته کړي دي.
نن سهار شاوخوا ۶:۳۰ ناپېژاندو وسلهوالو د کابل ښار په کارته پروان سیمه کې د اهل هنودو پر عبادت ځای برید وکړ. له دې برید وروسته، د کورنیو چارو وزارت ویاند عبدالنافع ټکور په یوه خبرپانه کې وویل چې وسلهوالو عبادت ځای ته له ننوتو مخکې پرساتونکو لاسي بم غورځولی چې په ترڅ کې یې اور لګېدلی او دوه ساتونکي ټپیان شوي دي.
وروسته له هغې چې د اسلامي امارت له لوري په یوه مکتوب کې شپږو دولتي ادارې منحل اعلان شوې، د افغانستان لپاره د اروپايي ټولنې ځانګړي استازي او د یوشمېر هېوادونو سفیرانو او ځانګړیو استازیو د دغې پرېکړې پر وړاندې تند غبرګون ښودلی دی. توماس نیکلسون پر خپله ټویټرپاڼه لیکلي، د نورو ادارو په پرتله دغو دولتي بنسټونو ته اړتیا ډېره لیدل کېږي.
د افغانستان لپاره د امریکا سفارت سرپرست یان مککري له شپږم ټولګي پورته د نجونو زدهکوونکو د ښوونځیو نه پرانستل کېدل «ډېره ناهیلې کوونکې» بللې ده. نوموړي نن پر خپل ټویټرپاڼه د اسلامي امارت له لوري له شپږم ټولګي پورته د نجونو زدهکوونکو د ښوونځیو د نه پرانستل کېدو په اړه اندېښنه څرګنده کړې ده.
د افغانستان د کنګل شویو شتمنیو له جملې څخه د ۷ میلیارد ډالرو ازادولو او د سپتامبر د یوولسمې پېښې قربانیانو او افغانستان کې بشري مرستو ته د ځانګړې کولو په تړاو د امریکا د ولسمشر پرېکړې ته د غبرګونونو په دوام، نن کابل کې د افغانستان د ملت د یوالي کاروان یوه اعتراضیه غونډه کې د ولسمشر جوبایډن پرېکړه خاینانه او غیرانساني بولي او له نړیوالو په ځانګړې توګه ملګروملتونو څخه غواړي، چې هرڅه ژر بایډن له دغې پرېکړې راوګرځوي.
د اریانانیوز خصوصي ټلویزیون مسوولانو تایید کړي چې د دې شبکې د سیاسي خپرونو چلوونکی وارث حسرت او اقتصادي خبریال اسلم حجاب د اسلامي امارت له بند څخه خوشې شول. هغوی ویلي چې دغه دوه خبریالان نن د اسلامي امارت د استخباراتو له خوا خوشې شوي دي.
د ملګروملتونو سرمنشي له خپلو اساسي حقونو څخه د افغان ښځو او نجونو محرومه پاتې کېدو څخه اندېښنه ښيي او وايي، اسلامي امارت دې نړیواله ټولنه کې د غړیتوب لپاره دغه حقوق په رسمیت وپېژني. انتونیو ګوترېش پر ټویټر لیکلي، افغانستان کې ښځې او نجونې د ښوونې او روزنې، دندې او برابر عدالت لپاره یو ځل بیا خپلو حقونو څخه محرومیږي.
کابل کې نن یوشمېر ښځو د اسلامي امارت له لوري پر ښځو د تازه لګول شویو بندیزونو او د حقونو د نهرعایت په غبرګون کې لاریون وکړ او د کار او زدهکړو له حق څخه د افغان ښځو د محرومیت پر وړاندې د نړیوالو چوپتیا له «شرمه ډکه» وبلله.
پرون د اسلامي امارت د بهرنیو چارو وزارت د امریکا له کانګرس څخه په یوه لیک د افغانستان د شتمنیو د ازادېدو غوښتنه وکړه. دغه لیک په پښتو، فارسي او انګلیسي ژبو سربېره په اردو هم لیکل شوی وو چې په اردو ژبې د دغه لیک لیکلو د ټولنیزو رسنیو د ګڼشمېر کاروونکو پراخ غبرګونونه راپارولي دي.
د کابل په لوېدیځ کې یوې سرچینې چې نه یې غوښتل نوم یې یاد شي، سلاموطندار ته ویلي چې ۲۲ ورځې وړاندې د دیارلسمې امنیتي حوزې اړوند په اتفاق ښارګوټي کې د یوې کورنۍ اته ماشومان د لوږې له کبله مړه شوي دي.
د سرچینې په خبره، د یادو ماشومانو پلار څه موده مخکې د سرطان ناروغي له امله مړ شوی او ورپسې یې مور هم د ناچارۍ او ستړي ژوند له کبله خپل ژوند له لاسه ورکړی و.
د پاکستان «ډان» ورځپاڼې لیکلي چې د پاکستان لومړي وزیر عمران خان د دغه هېواد د کورنیو چارو وزارت ته ۴۸ ساعته وخت ورکړی، څو په اسلاماباد کې د افغان سفیر د لور تښتوونکي ونیسي. ناپېژنده کسانو د تېرې جمعې په ورځ په پاکستان کې د افغان سفیر نجیبالله عليخېل لور سلسله عليخېل په اسلاماباد کې له یوه سوداګریز مرکز څخه وتښتوله او له شکنجې وروسته یې بېرته راخوشې کړه.
د لوګر یوشمېر اوسېدونکي او د ولايتي شورا غړي وايي، په دغه ولايت کې هدفي وژنې په بېسارې توګه ډېرې شوي او یوازې په تېرو ۷۲ ساعتونو کې ۱۵ کسان وژل شوي او ۵ نور ټپيان دي.
د کورنیو چارو وزارت ویاند طارق ارین پرون ادعا وکړه چې یوه خصوصي رسنۍ د چاودېدونکو توکو په لېږد کې لاس لري او په اړه یې د دوی څېړنې روانې دي.
د کورنیو چارو وزارت ویاند دغو څرګندونو د یوشمیر خبریالانو او د خبریالانو ملاتړو بنسټونو غبرګونونه راپارولي دي.
د معلوماتو او احصاییې ملي ادارې یوې اعلامیه کې ویلي، د سترې محکمې د پرېکړې له مخې برېښنايي پېژندپاڼو کې د نورو ډېرو قومونو نومونه هم ثبتېدلی شي چې دغه کار له غبرګونونو سره مخ شوی دی.
د ټولنيزو شبکو يو شمېر کاروونکي وايي، د قومونو په دې نوملړ کې تاجک، هزاره او اوزبک په ډېرو برخو وېشل شوي، په داسې حال کې چې پښتون په ډېرو برخو نه دی وېشل شوی او يوازې د «پښتون» په نوم راغلی دی.
