پېښو ته د رسېدنې په چارو کې د دولت وزارت، د کورنیو چارو وزارت، کابل ښاروالۍ او څو نورو بنسټونو د اورلګېدنې د مخنیوي لپاره د ګډې کمېټې په یوې خبري غونډه کې هغو تېل ټانکونو ته چې له استوګنیزو مرکزونو سره نیږدې فعالیت کوي، خبردار ورکړ، که تر راتلوونکو ۲۰ ورځو د اورلګېدنې پېښو د مخنیوي لپاره د دې وزارت سپارښتنې جدي ونه ګڼي، وبه تړل شي.
د عامې روغتیا وزارت سرپرست وحید مجروح وايي، افغانستان به په راتلونکو څلورو اوونیو کې تر ټولو بدې ورځې تجربه کړي.
د هغه په خبره، هېواد کې د کورونا ویروس د خپرېدو، پرې د خلکو اخته کېدو او له کبله یې د مړو شویو کسانو کچه ښيي چې د دغه ویروس درېیمه څپه د لومړۍ او دویمې هغې په پرتله څو برابره وېروونکې ده.
د عامې روغتیا وزارت چارواکي په هېواد کې ورځ تر بلې د کورونا مثبتو پېښو ډېروالي ته په کتو خبرداری ورکوي، که خلک کورونا جدي ونه ګڼي او د دغه وزارت روغتیايي سپارښتنې په پام کې ونه نیسي، وضعیت به نور هم ترینګلی شي. بلهخوا نن په شپاړسو ولایتونو کې دولتي او خصوصي پوهنتونونه، ښوونځي او نور ښوونیز مرکزونه د دوو اوونیو لپاره رخصت شول.
د ولسمشر پخوانی لومړی مرستیال او د افغانستان د اسلامي جبنش ګوند مشر مارشال عبدالرشید دوستم طالبانو ته خبرداری ورکوي او وایي، اجازه نه ورکوي چې طالبان په افغانستان کې خپل د خوښې اماراتي نظام جوړ کړي او څرګنده یې کړه چې جګړه د افغانستان روان کړکېچ نه شي حلولی.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد تازه پر خپل ټویټر لیکلي، که طالبان د اجماع او روغې له لارې راتلونکې غوره نه کړي او سوله ونه کړي، امریکا به د هغه چا تر څنګ ودرېږي چې د جمهوریت ساتنې لپاره هڅه کوي.
د نړیوالو چارو شنونکي د خلیلزاد دا څرګندونې طالبانو ته د امریکا حکومت جدي خبرداری بولي.
ولسي جرګې د یوې خبرپاڼې په خپرولو سره د دې جرګې د غړي محمد عارف رحماني هغه ادعا چې د رسنیو پر وړاندې د ملي امنیت عمومي رییس احمد ضیا سراج د خبرداري په اړه یې کړې وه رد کړه.
د ولسي جرګې د خبرپاڼې پراساس چې د دې جرګې د عمومي رییس میر رحمان رحماني په فېسبوګپاڼه کې خپره شوې پکې ویل شوي چې په ولسي جرګې کې د ملي امنیت عمومي رییس د چهارشنبې ورځې په ناسته کې، د رسنیو د بیان پرازادۍ محدودیت او پر رسنیزو فعالیتونود بندیزونو په اړه هېڅ راز خبرې نه دي شوي.
هېواد کې د کورونا د درېیمي څپې خپرېدو او ورځ تر بلې د مثبتو پېښو ډېروالي د عامي روغتیا وزارت چارواکي اندېښنمن کړي دي. د دغه وزارت مسوولان وايي، د خلکو نه پاملرنه د دغه ویروس د ډېر خپرېدو لامل بولي.
د ملي روغې جوړې عالي شورا مرستیال اسدالله سعادتي خبرداری ورکوي، که د سولې روانې خبرې پایلې ته ونه رسېږي، افغانستان به له تورې او ناڅرګندې راتلونکي سره مخ شي. هغه له کوچني اختر وروسته د استانبول ناستې د جوړېدو په اړه شکمن دی او وایي، تر اوسه روښانه نه ده چې طالب ډله په دې ناسته کې ګډون کوي، که نه.
د سعادتي په وینا، تلپاتې سولې او ټیکاتو ته د رسېدو لپاره د ټاکنو او قدرت ترلاسه کول اړین دي او له دې پرته سوله مانا نه لري.
د عامې روغتیا وزارت چارواکي په هېواد کې د کورونا ویروس پراخېدو ته په کتو وايي، که هېوادوال کورونا جدي و نه ګڼي او روغتیايي سپارښتنو ته پام و نه کړي، افغانستان به هم د هند پر برخلیک اخته شي.
دوی خبرداری ورکوي، د کورونا ویروس د جدي نه ګڼلو په برخه کې هر دول بېغوري به وضعیت ترینګلی کړي.
د عامې روغتیا وزارت په تېره یوه مېاشت کې د کورونا ویروس د مثبتو پېښو په شمېر کې له ۶۰ تر ۷۰ سلنې ډېروالي خبر ورکوي.
د دغه وزارت د ویاند مرستیال میرویس علیزي سلاموطندار ته ویلي، په تېرو مېاشتو کې د کورونا له ۱۵۰۰ تر ۱۷۰۰ شکمنې پېښې ازمایل کېدې چې له ۲۰ تر ۳۰ به یې مثبتې ختلې، خو له یوې میاشتې راهیسې په ۱۷۰۰ شکمنو پېښو کې له ۸۰ تر ۱۳۰ پېښې مثبتې پېژندل کېږي.
سلګونو کسانو نن سهار د لغمان والي رحمتالله یارمل پر وړاندې غبرګ لاریونونه کړي او له حکومته یې د هغه د لرې کېدو غوښتنه کړې ده.
لاریونوال چې د مرکز مهترلام ښار عبدالله څلورلارې او کابلـجلالاباد پر لویې لارې سرخکانو کې ورټول وو، د لغمان والي رحمتالله یارمل یې په دغه ولایت کې پر فساد، غصب، ناکارۍ او قومي شخړو ته پر لمنې وهلو تورن کړ او له حکومته یې وغوښتل چې ژرترژره یې له دندې لرې کړي.
هرات کې د زعفرانو یوشمېر کروندګر او سوداګر هېواد ته د ایراني زعفرانو پر وارداتو او د نړۍ هېوادونو ته یې د افغانستان په نوم صادراتو نیوکې کوي او وايي، افغانستان ته د ایراني زعفرانو واردات د افغاني هغو د بیې ټیټوالي لامل شوي دي.
بلخ کې د تښتول شوي عبدالرووف کورنۍ وايي، تېره ورځ انسان تښتوونکيو دوی ته د یوه پیغام په استولو سره خبرداری ورکړی، که چېرې تر یوې اوونۍ یو میلیون او ۲۰۰ زره ډالره ورنهکړي، د عبدالرووف د بدن غړي به پرې کړي او دوی ته به یې ولېږي.
د عبدالرووف پلار محمد نبي سلاموطندار ته وايي، د خپل زوی په اړه اندېښنه لري او د دې توان هم نهلري چې يوه اوونۍ کې انسان تښتوونکيو ته يو ميليون او دوه سوه زره ډالر ورکړي.
د ملي امنیت شورا سلاکار حمدالله محب د افغانستان اوسني نظام په اړه هرات کې د مولوي مجیبالرحمان انصاري وروستۍ څرګندونو په غبرګون کې ويلي، هر هغه څوک چې د نظام پر ضد خلک وپاروي، ياغي دی.
حمدالله محب د مولوي انصاري څرګندونې د افغانستان او نړۍ د ټولو علماوو د دریځ خلاف بولي او وايي، ښايي چې دغه څرګندونې د سیمې استخباراتو کې ریښه ولري.
د نوموړي په خبره، د انصاري د خبرو تر شا ښایي د سیمې د استخباراتو لاس وي او په همدې موخه ملي امنیت ته دنده سپارل شوې تر څو ارزونه یې وکړي…
کورنیو چارو وزارت وايي چې د پولیسو هېڅ مسوول حق نه لري چې خپل تصویر پر ټولنیزو رسنیو خپور کړي.
د دغه وزارت ویاند طارق ارین دا موضوع پر خپلې ټویټرپاڼې خپره کړې او لیکلي یې دي چې د هر امنیتي مسوول له لوري ځانته کېدونکي تبلیغات د پوښتنو ګرېوګنو عواقب له ځان سره لري.
د جمعیت اسلامي ګوند اجرایوي رییس عطامحمد نور وايي، که په هېواد کې روان ناسم امنیتي وضعیت ښه نه شي، دویم مقاومت به جوړ کړي. نوموړي چې په بلخ کې د رهنورد زریاب په یادغونډه کې خبرې کولې وویل، د هېواد وضعیت ناسم لوري ته روان دی او بهرني جنګیالي په ټولو شمالي ولایتونو کې ځای پر ځای شوي دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
