د ټایمز مجلې د طالبانو د رییس الوزرا لومړی مرستیال ملا عبدالغني برادر د ۲۰۲۱ کال د نړۍ د سلو اغېز لرونکو څېرو په نوملړ کې شامل کړی دی.
په هغه مطلب کې چې د ملا عبدالغني برادر د پېژندنې په اړه خپور شوی، پکې لیکل شوي چې: «ملا عبدالغني برادر د طالبانو په ډله کې په ۱۹۹۴ کال کې د دغه تحریک له بنسټ اېښودونکو څخه شمېرل کېږي. یو اغېزمن پوځي مشر او د احترام وړ شخصیت دی.»
د سلاموطندار پښتو فېسبوکپاڼه وڅارئ
د دغه مطلب پراساس، د طالبانو بریا د ملا برادر د هوکړې د شرایطو له امله وه. ویل کېږي چې د طالبانو ټولې مهمې پرېکړې د هغه له لوري نیول کېږي؛ له هغې ډلې د مخکیني حکومت غړو ته عمومي بښنه، کابل ته د طالبانو د ننوتلو پرمهال د وینې تویېدنې مخنیوی او له ګاونډیو هېوادونو په ځانګړې توګه چین او پاکستان سره د طالبانو اړیکې او لیده کاته.
ټایمز مجلې همداراز نوموړی ارامه او داسې کس یاد کړی چې د خلکو له سترګو لرې په کمه بیانیې ورکوي او لږ خبرې کوي چې د طالبانو ترمنځ د معتدل بهیر استازي په توګه ګڼل کېږي؛ هغه بهیر چې د لوېديځ ملاتړ د راجلبولو لپاره د پام وړ ګرځي او اړینو مالي مرستو ته اړتیا لري.
ټایمز د دغه مطلب په پای کې دا پوښتنه وړاندې کړې، هغه کس چې امریکا له افغانستان څخه بهر کړه، ایا کولای شي خپله ډله تر خپلې اغېزې لاندې راولي؟
دغه مطلب د پاکستاني خبریال احمد رشید په لیکنه او د طالبانو د لیکوونکي له لوري لیکل شوی دی.
د ملا برادر ترڅنګ د امریکا مخکینی ولسمشر ډونالډ ټرمپ، د جو بایډن مرستیاله کاملا هریس، د هند لومړی وزیر نرنډرا مودي او په افغانستان کې د ښځو د حقونو فعاله محبوبه سراج هم په دغه نوملړ کې لیدل کېږي.
