د سوداګرۍ او پانګونې خونې مسوولانو په یوه خبري غونډه کې د افغانستان د کنګل شویو زېرمو په اړه د جو بایډن د وروستي فرمان په غبرګون کې وویل، که د افغانستان پیسې په بشپړه توګه ازادې نه شي هېواد کې به خصوصي سکتور له ګڼو ستونزو سره مخ شي.
ددې بنسټ رییس محمد یونس مومند د جوبایډن په وروستي فرمان د بیا کتنې غوښتنه کوي او وايي؛ هېڅ مرجع د دې حق نه لري چې د یوه هېواد د شتمنیو زېرمو اختیار بل یوه ته ورکړي.
سلاموطندار پر ټویټر هم وڅارئ
د سوداګرۍ او پانګونې خونې د مسوولانو په وینا، د افغانستان کنګل شوې پیسې، ددې هېواد ملاتړ لپاره دي چې له شلو کلونو راهیسې زېرمه شوي او افغانانو پورې اړوند دي.
د امریکا ولسمشر جوبایډن د جمعې په ورځ یو اجرايي فرمان لاسلیک کړ چې له مخې یې د افغانستان له کنګل شویو پیسو څخه ۷ میلیارده یې ازادې شوې چې له ډلې یې ۳.۵ میلیارده امریکا کې د سپټمبر د ۱۱مې نېټې د برید قربانیانو ته د غرامت په توګه ورکول کېږي او پاتې نور یې افغانستان ته د بشري مرستو لپاره ځانګړې شوي دي.
