د بشري او مدني حقونو شاوخوا ۲۵ نړیوالو سازمانو په یوه لیک کې د ملګرو ملتونو د بشرحقونو شورا څخه غوښتنه کړې چې د دغې شورا په پنځوسمه ناسته کې د افغان ښځو د حقونو په اړه بحث وکړي. په ورته مهال دوی ویلي، اسلامي امارت د ښځو او نجونو پر ازادۍ، راټولېدنې او اعتراض پراخ محدودیتونه لګولي دي.
د افغانستان د خبریالانو د عدالت غوښتنې کمېټه د خبریالانو له نوم څخه د ناوړه ګټې اخیستنې له دوام څخه اندېښمن دي. یوشمېر خبریالانو نن په کابل کې د یوې خبري ناستې پرمهال ادعا وکړه چې د رسنیو یوشمېر ملاتړي بنسټونه د خبریال له نوم څخه په استفادې، ډېرې پیسې لاسته راوړي، خو دغه پیسې پر هغو خبریالانو نه دي وېشل شوي چې په خراب اقتصادي وضعیت کې دي.
د فاریاب پوهنتون زدهکړیالانو نن د دغه پوهنتون له لیلیې څخه د دوی د ایستلو په غبرګون کې اعتراض وکړ.
کابل کې د ډبرو سکرو یوشمېر پلورونکي وایي، د اسلامي امارت تر راتګ وروسته، د ډبرو سکرو په بیو او صادراتو کې د پام وړ زیاتوالی راغلی دی.
په هېواد کې د وروستیو سیاسي تحولاتو له امله د ځینو کسبونو لکه نجاري، خیاطي او کولالي بازار د مخ په ځوړ حالت سره مخ دي.
یوشمېر کسبګر وايي چې کارونه یې د پخوا په پرتله خورا خراب شوي او له تېرو اتو میاشتې راهیسې هېڅ کاروبار نه لري.
یوشمېر کابل ښاریان د هېواد په بازارونو کې ورځ تر بلې د لومړنیو خوراکي توکو د بیو له لوړوالي څخه اندېښنه ښيي.
د خبریالانو د خوندیتوب نړیوالې کمېټې د سلاموطندار د خبریال رومان کریمي د نیولو او وهل ټکولو په اړه د څېړنې غوښتنه کړې ده. دغې کمېټې په یوه راپور کې ویلي، د ا.ا مسوولان باید د سلاموطندار د خبریال او موټر چلوونکي نیول وڅېړي. دې کمېټې د دوو محلي راډیوګانو د مسوولانو جمالالدین دلدار او میرزا حسني د خوشې کېدو غوښتنه هم کړې ده.
د افغانستان لپاره د ملګرو ملتونو ځانګړي رپورټر ریچارډ بنټ ویلي چې په ترکیه کې له افغان مېرمنو، مدني ټولنو غړیو، زدهکړیالانو د ولسي جرګې مخکینیو غړیو او د مخکیني حکومت له یوشمېر چارواکو سره لیدلي دي. نوموړي پر خپله ټویټرپاڼه لیکلي چې دغه لیدنه غیررسمي، لنډه او ډېره ګټوره وه.
پنځه کاله وړاندې د ۲۰۱۷ کال د مې میاشتې په ۳۱مه د کابل په زنبق څلور لارې کې له چاودېدونکو توکو ډک یوه ټانکر موټر چاودنه وکړه چې شاوخوا ۶۰۰ کسانو ته پهکې مرګژوبله واوښته. د دې خونړۍ چاودنې مسوولیت چا پر غاړه وانهخیست، خو د مخکیني حکومت د ملي امنیت عمومي ریاست دغه برید د حقاني شبکې کار وباله.
د اداري اصلاحاتو او ملکي خدماتو ادارې نن د کډوالو او راستنیدوونکو، کار او ټولنیزو چارو او د لوړو زدهکړو وزارتونو او د تخنیکي او مسلکي ادارې سره د همکاریو پنځه هوکړهلیکونه لاسلیک کړل.
د غزني یوشمېر اوسېدونکي وایي چې د دغه ولایت په ځینو خصوصي روغتونونو او کلینیکونو کې د مسلکي ډاکټرانو پر ځای نامسلکي کسان په ډېر کم معاش کار کوي چې ډېری یې تراوسه د طبي پوهنتونونو او یا هم د انسټیټیونو زدهکړیالان دي.
د بدخشان محلي مسوولان وایي چې د اغاخان سیمهییز بنسټ له خوا د اروپايي کمېسیون په ۱۰۵ زره امریکايي ډالرو مالي مرسته د دغه ولایت مرکز فیضاباد ښار کې د برهانالدین رباني په روغتون کې د اکسیجن تولید دستګاه اخیستل شوې چې په في ساعت کې د ۱۶زره او۱۰۰ لیټره اکسېجن د تولید ظرفیت لري.
د افغانستان لپاره د امریکا ځانګړي استازي ویلي، افغان سیاسي څېرې چې تېره اونۍ یې ورسره لیدلي په دې باور دي چې تاوتریخوالی د افغانانو لپاره ښه لاره نه ده او د ناورین د حل لپاره سیاسي بهیر ته لومړیتوب ورکوي او ورته لېواله دي. خو هغه ناهیلي څرګنده کړې چې اوس د دغسې یوه بهیر څرک نه لیدل کیږي.
د خوست د ولایتي روغتون په ګډون د یو شمېر نورو روغتیايي مرکزونو روغتیاپالانو له دې امله کاري اعتصاب کړی چې ګواکې له څو میاشتو راهیسې یې معاشونه نه دي ورکړل شوي.
د هرات روغتیایي مسوولان وایي چې د بیزو تڼاکې لومړۍ مشکوکه پېښه د دغه ولایت په حوزوي روغتون کې ثبت شوې ده.
د «مخلصین» په نوم یوې ډلې نن په کابل کې د یوې خبري غونډې پر مهال هېواد ته د بیا راتګ خبر وکړ. د دې ډلې يو شمېر غړي وايي چې اسلامي امارت ته د مشورې ورکولو لپاره بېرته هېواد ته راستانه شوي دي.
