خبریال: داوود شاهمل
په داسې حال کې چې د ښځو د ححاب جبري کولو په اړه د اسلامي امارت د مشرتابه فرمان له ګڼو نړیوالو او کورنیو غبرګونونو سره مخ شوی، د چارو یوشمېر شنونکي هم په دې باور دي چې دا فرمان به د افغانانو پر راتلونکې منفي اغېز وکړي.
د سیاسي چارو کارپوه نورشاه نوراني وایي، سره له دې چې د ښځو حجاب په اړه صادر شوی فرمان له شرعي اړخه کومه ستونزه نهلري، خو اوسني وضعیت ته په کتو، د داسې فرمان صادرېدو ته اړتیا نه وه.
د سلاموطندار پښتو فېسبوکپاڼه وڅارئ
د هغه په وینا دا فرمان به په نړیواله کچه د اسلامي امارت د حکومت په رسمیت پېژندنې او افغانستان سره پر مرستو ناوړه اغېز ولري.
نوموړي وویل: «ښه به دا وه چې په ښځو د حجاب په اړه د فرمان د صادرېدو پر ځای د نجونو د ښوونځیو پرانیستو په اړه فرمان صادر شوی وای. شرایط حساس دي اسلامی امارت اساسو شرایطو کی قرار لري، موږ د نړۍ مرستو او نړیوال مشروعیت ته اړتیا لرو، نو په داسې شرایطو کی اړتیا نه وه چې داسې فرمان صادر شوی وای.»
د سیاسي چارو یو بل کارپوه ډاکتر معینخان څمکنی هم د ښځو حجاب او تر هغې مخکې د نجونو ښوونځیو په اړه د اسلامي امارت پرېکړې په ګټه نهبولي او وايي، دغه ډول اقدامات نړۍ سره د اسلامي امارت اړیکو ته زیان اړوي.
څکمنی د ښځو د حجاب او د نجونو د ښوونځیو پرانیستو په اړه د نړۍ په کچه د دیني عالمانو د یوې غونډې پر جوړېدو ټینګار کوي، څو ټولو اسلامي هېوادونو کې په دې اړه یو شان دریځ غوره شي.
د هغه په وینا، اسلامي امارت دې د ښځو د حجاب پر ځای، ځوانانو ته د کاري زمینې برابرولو په څېر ډېرو نورو لومړیتوبونو ته پام وکړي.
د موضوع په تړاو د اسلامي امارت د ویاندویانو د نظر په ترلاسه کولو بریالي نهشو، خو تر دې وړاندې د اسلامي امارت چارواکو ویلي وو چې د نجونو او مېرمنو د حجاب مسله شرعي ده او باید دا فرمان عملي شي.
د امر بالمعروف او نهې عنالمنکر وزارت د فرمان پر بنسټ، افغانستان کې ټولې ښځې مکلفې دي چې تر دې وروسته خپلې څېرې پټې کړي او کور څخه له چادري یا هم حجاب سره راووځي.
