د بهرنیو چارو وزارت سیاسي مرستیال شېرمحمدعباس ستانکزي نن (د وږي دویمه، د پنجشنبې ورځ) په کابل کې د یوې غونډې پر مهال ګاونډیو هېوادونو ته ډاډ ورکړ چې د افغانستان خاوره یې پر وړاندې نه کارېږي، خو زیاتوي چې ګاونډیان دې هم له خپلې خاورې د افغانستان امنیت نه ګواښي. هغه له اسلامي امارت څخه غواړي چې له افغانستان سره د ګډو پولو امنیت خوندي کړي.
د سلاموطندار پښتو فېسبوکپاڼه وڅارئ
نوموړي له امریکا او اروپا څخه وغوښتل چې له اسلامي امارت سره ښې اړیکې ولري او د افغانستان په بیارغونه کې همکاري وکړي. هغه یو ځل بیا له اسلامي امارت څخه وغوښتل چې له شپږم ټولګي څخه د پورته نجونو پر مخ د ښوونځیو دروازې پرانېزي.
ستانکزی زیاتوي: «اسلامي امارت باید د ټولو پر مخ د علم دروازې پرانېزي او په حکومت کې د مسلکي کسانو لپاره د کار اسانتیاوې برابرې کړي. د اسلامي امارت وجیبه ده چې د اسلامي شریعت په چوکاټ کې د ښځو لپاره د کار اسانتیاوې برابرې کړي.»
په همدې حال کې د سرحدونو، قومونو او قبایلو چارو وزارت د دعوت او ارشاد رییس شفېعالله ثاقب په دې غونډه کې وویل، ځینې ډلې افغانستان کې مذهبي اختلافونو ته لمن وهي. هغه له خلکو غواړي چې خپل یووالی وساتي.
د یادونې ده چې واک ته د اسلامي امارت له بیا رسېدو راهیسې د ګاونډیو هېوادونو چارواکو په ځلونو د خپلو هېوادونو پر وړاندې د افغانستان خاورې د کارېدو په اړه اندېښنې څرګندې کړي، خو اسلامي امارت یې تل دا ادعاوې بنسټه بللې دي.
