د افغانستان په اړه د روسیې ځانګړي استازي ضمیر کابلوف د پنجشنبې په ورځ له ټاس خبري اژانس سره مرکه کې ویلي چې د اسلامي امارت استازي به د افغانستان په اړه د مسکو مشورتي ناسته کې ګډون ونه کړي.
کابلوف ویلي: «د اسلامي امارت پلاوی به [په غونډه کې] ګډون ونه کړي. دا یوازې د مسکو فارمټ د غړیو لپاره ده.»
ټاس خبري اژانس لیکلي چې ټاکل شوې د افغانستان په اړه د مسکو فارمټ مشورتي غونډه د نومبر میاشتې په منځ کې جوړه شي.
د روسیې، چین، هند، ایران، پاکستان، قزاقستان، قرغېزستان، تاجکستان، ترکمنستان او اوزبکستان استازي به په دې غونډه کې ګډون وکړي.
د مسکو فارمټ تېره غونډه د ۲۰۲۱ کال په اکټوبر کې جوړه شوې وه. په یاده غونډه کې د رییسالوزرا د دویم مرستیال عبدالسلام حنفي په مشري د اسلامي امارت یوه پلاوي ګډون کړی و.
