د بهرنیو چارو وزارت سیاسي مرستیال شېرمحمد عباس ستانکزي پرون سهنشبه د تلې پنځمه کابل کې د یوې غونډې پرمهال وویل چې د نجونو ښوونځیو پرانېستو پر وړاندې هېڅ شرعي ستونزه نشته او له ځنډ پرته باید خلاص شي.
نوموړي دې ناسته کې د نجونو د زدهکړو له مخالفانو څخه غوښتنه وکړه چې په دې اړه دې یو شرعي دلیل وړاندې کړي.
بلخوا دې ناسته کې بیا د امربالمعروف او نهې عنالمنکر وزارت سرپرست خالد حنفي د عباس ستانکزي څرګندونو په اشارې سره وویل چې عصري زدهکړې مباح دي او باید وخت پرې ضایع نه کړل شي.
خو د چارو ځینې شنونکي د بهرنیو چارو وزارت د سیاسي مرستیال له څرګندونو هرکلی کوي او وايي چې د نوموړي غږ د افغانانو غږ دی او اسلامي امارت باید د هغه څرګندونې جدي وګڼي.
نوموړي وویل: «افغانان غواړي چې د نجونو ښوونځي پرانېستل شي. ستانکزی په دې بریالی شوی چې د سولې خبرو پرمهال ښې لاستهراوړنې ولري. د نوموړي څرګندونې موږ د ښوونځیو بیاپرانېستو ته هیلهمندوي چې ژر پرانېستل شي.»
له پرون راهیسې پر ټولنیزو رسنیو ګڼشمېر افغانانو د نجونو ښوونځیو پرانیستو په اړه د عباس ستانګزي له څرګندونو هرکلی کړی او له اسلامي امارت یې غوښتنه کړې چې له ځنډ پرته نجونو ته د زدهکړو اجازه ورکړي.
د فېسبوک یوه کارونکي شرفالدین اریا لیکلي چې د نجونو یو کال ضایع شوی او اسلامي امارت باید له شپږم ټولګي پورته د نجونو ښوونځیو پرانېستلو په اړه عملي ګامونه پورته کړي.
د یادونې وړ ده چې د افغانستان لپاره د ملګرو ملتونو د سیاسي استازولي یا یوناما سرپرست پرون د امنیت شورا ناسته کې ویلي و چې د سرپرست حکومت چارواکي افغانستان کې له شپږم ټولګي پورته د نجونو ښوونځو د تړلو پرېکړه، د اسلامي امارت د مشر هبتالله اخندزاده پرېکړه ګڼي.
