د فرانسې خبري اژانس د خپلو سرچینې له قوله راپور ورکړی چې امریکا او برېټانیې په کابل ښار کې له خپلو وګړو غوښتنه کړې چې هر څه ژر دې په کابل ښار کې د سرینا هوټل څخه ووځي. دغه خبري اژانس ویلي، یاد خبرداری د امنیتي ګواښ له امله دی.
په همدې حال کې د امریکا د بهرنیو چارو وزارت په یوه خبرداریز پيغام کې له خپلو وګړو غوښتنه کړې چې د کابل سرینا هوټل ته دې له تګ راتګ ډډه وکړي.
د سلاموطندار پښتو فېسبوکپاڼه وڅارئ
په دغه پیغام کې له امریکايي وګړو غوښتنه شوې چې په دغه هوټل کې د لوړ امنیتي ګواښ له امله دې هر څه ژر دغه هوټل پرېږدي. د امریکا د بهرنیو چارو وزارت د دغه احتمالي ګواښ د جزییاتو په اړه څه نه دي ویلي.
دا په داسې حال کې ده چې له پرون ورځې راهیسې د کابل سرینا هوټل ته غځېدلې ټولې لارې د موټرو د تګ راتګ پرمخ تړل شوي او د اسلامي امارت ځواکونه د دغه هوټل شاوخوا تر سترګو کېږي.
د کابل سرینا هوټل په پلازمېنه کابل کې موقعیت لري چې په وروستیو کلونو کې د ګڼو بهرنیو مېلمنو ګوربه وو.
