د زابل د عامې روغتیا ریاست مسوولان وايي، له څه مودې راهیسې په دغه ولایت کې د کورونا ویروس پېښې ډېرې شوي او په وینا یې، هره ورځ یوازې په مرکز کلات ښار کې له ۱۷ تر ۲۵ مثبتې پېښې ثبتېږي.
د زابل د عامې روغتیا رییس ډاکټر عبدالحکیم حکیمي وایې، په تېرو ۲۴ ساعتونو کې د دغه ولایت د عامې روغتيا رياست د کورونا د تشخیص مرکز کې د کورونا ویروس ۸۰ نمونې کتل شوي چې له ډلې یې ۱۷ هغه مثبتې ختلې دي.
د نوموړي په وینا، پر کورونا ویروس د تازه اخته شویو کسانو په ډله کې پنځه ښځينه او ۱۲ نارینه شامل دي.
حکیمي د زابل اوسېدونکو ته سپارښتنه کوي چې د دې ناروغي د مخنیوي په پار ځان او د کورنۍ غړي واکسين کړي او په دوامداره توګه ماسک وکاروي، څو هم ځان وساتي او هم د نورو ژوند وژغوري.
دا په داسې حال کې ده چې له تېر شاوخوا یوه کال راهیسې د کورونا ویروس د خپرېدو په اړه خبرونه کم شوي او خلک یې هم د مخنیوي برخه کې هېڅ پام نه کوي.
