د کوچني اختر په مناسبت په کندوز ولایت کې د شمال ختیځ زون د والیبال لوبډلو ترمنځ جوړې شوې دوه ورځنۍ سیالۍ د دغه ولایت د منتخبې لوبډلې په اتلولۍ سره پای ته ورسېدې.
د کندوز ولایت د ورزشي امریت مسوولان وايي چې یادې سیالۍ د کندوز ښاروالي په مالي مرسته د بدخشان، بغلان او له کندوز څخه د دوو لوبډلو ترمنځ د دوه ورځو لپاره په سپین زر ورزشي لوبغالي کې جوړې شوې وې چې د کندوز منتخبې لوبډلې یې اتلولي وګټله.
د سلاموطندار پښتو فېسبوکپاڼه وڅارئ
د مسوولانو په وینا د یادو سیالیو پای لوبې ته د کندوز منتخبه او د کندوز اتلانو لوبډلې لاره موندلې وه چې په پای کې د کندوز منتخبې لوبډلې اتلانو لوبډلې ته ماته ورکړه او اتلولې یې خپله کړه.
د کندوز ورزشي امر محمدقیوم رحیمي وايي چې دغه سیالۍ یې په شمال ختیځ زون کې د والیبال لوبې د غوره لوبغاړو د پېژندنې لپاره جوړې کړې وې چې په راتلونکې کې به یې بهرنیو سیالیو ته غوره کړي.
د یادو سیالیو په پای کې ګټونکې لوبډلې او یوشمېر لوبغاړو ته مډالونه، کپ، جوایز او نورې ډالې هم ورکړل شوې.
