د کندوز محلي مسوولان وايي چې نن سهار امنیتي ځواکونو د کندوز ښار اړوند سیمه کې د داعش ډلې پر یوه پټنځای برید کړی او پنځه داعشیان یې وژلي دي.
د کندوز د امنیې قومنداني ویاند عبیدالله عابدي سلاموطندار ته ویلي، د کشفي معلوماتو پربنسټ یې د داعش پر دغه پټنځای عملیات کړي او دې ډلې پورې اړوند پنځه کسان یې وژلي دي.
عابدي زیاته کړې چې دغه عملیات یې د کندوز ښار اړوند دویمه امنیتي حوزه کې چېرته چې د نوموړي په وینا، یوې ودانۍ کې د داعش غړي اوسېدل، کړي دي.
نوموړي وویل: «داعش ډلې دې سیمه کې یو کور په کرایه نیولی و او غوښتل یې د کندوز ښار امنیت خراب او خپل شوم اهداف پلي کړي چې دې موخو ته له رسېدو وړاندې لهمنځه یوړل شول.»
کندوز کې امنیتي چارواکي داسې مهال د داعش د غړیو له وژل کېدو خبر ورکوي چې له دې وړاندې د اسلامي امارت چارواکو ویلي و چې داعش ډله د دې توان نه لري چې دوی ته یو ګواښ جوړ شي.
