پکتيا کې د طالبانو او حکومت ترمنځ د جګړو له امله د ملکيانو ژوند له ستونزو ډک او په ځينو سيمو کې د دواړو لوریو د نښتو له امله ډېری وخت ملکیان خپل ژوند له لاسه ورکوي. د تېرې شنبې ورځې ماښام ناوخته د سيدکرم ولسوالي يوې کورنۍ غوښتل د جګړې له وېرې د ګردېز ښار ته پناه یوسي، خو له دې ناخبره چې مرګ به یې د ژوند پور ورپرې کړي.
په هلمند کې د ۲۱۵میوند قول اردو قوماندان سمیع سادات وايي چې له طالبانو څخه د لښکرګاه ښار د پاکولو عملیات په چټکۍ سره روان دي او ډېر ژر به د وسلهوالو طالبانو تر ولکې لاندې سیمې بېرته د دولت تر کنټرول لاندې راشي.
په کندهار کې د افغان امنیتي او دفاعي ځواکونو او وسلهوالو طالبانو د وروستیو جګړو له امله ګڼشمېر ملکیانو ته مرګژوبله اوښتې او یوه برخه یې اړ شوې چې خپلې مېنې پرېږدي.
په میدان وردک ولایت کې د ملکیان پر یوه موټر د برید له امله د یوه ماشوم په ګډون پنځه کسان وژل شوي او ۸ نور ټپیان دي. دغه فلانکوچ ډوله موټر چې نن سهار له دایکندي څخه کابل ولایت ته پر لار وو، میدان ښار ته نږدې د دویم نمبر لارې په اوږدو کې تر برید لاندې راغلي چې له امله یې دغه مرګژوبله رامنځ ته شوې ده.
د کورنیو چارو وزارت مسوولان وایي چې کابل کې د دفاع وزارت سرپرست بسمالله محمدي پر کور د وسلهوالو برید له پنځه ساعته نښتې وروسته پای ته رسېدلې ده. د کورنیو چارو وزارت ویاند میرویس ستانکزی وایي چې د دغې نښتې پر مهال د یوې مېرمنې په ګډون ۸کسان وژل شوي او ۲۰ نور ټپیان شوي دي. ډېری وژل شوي او ټپیان ملکیان دي.
څلور ورځې کېږي چې د هرات ښار په دروازو کې سخته جګړه روانه ده او د هرې ورځې په تېرېدو د دغو نښتو لمن د هرات ښار په لوري د خورېدو په حال کې ده.
د لغمان ولایت محلي چارواکي وايي، بېګاه شپه او نن سهار د دغه ولایت په اړوند سیمو کې د کابل-جلال اباد پر لویه لار د دوو جلا ټرافیکي پېښو پر مهال ۲۰ ملکي وګړي مړه او ۱۸ ټپیان شوي دي. د لغمان ولایت چارواکي زیاتوي چې په مړو شویو او ټپیانو کې مېرمنې او ماشومان هم شامل دي.
د سره صلیب نړیوالې کمېټې په یوه خبرپاڼه کې لیکلي چې په افغانستان کې یې د روان زېږديز کال په لومړیو شپږو میاشتو کې د ۴۹ زره او ۵۰۰ ټپیانو درملنه کړې ده.
دغه بنسټ د ملکیانو پر وړاندې د تاوتریخوالي ډېرېدو په اړه اندېښنه ښودلې او افغانستان یې د ملکیانو لپاره یو تر ټولو خونړی هېواد بللی دی.
د بادغیس د عامې روغتیا رییس عبدالطیف روستایي سلاموطندار ته وایي چې په تېره یوه اوونۍ کې د افغان امنیتي ځواکونو او وسلهوالو طالبانو ترمنځ د جګړو له امله د دغه ولایت په مرکز کې ۳ملکي وګړي وژل شوي او ۷۳ نور ټپیان دي. روستایي وایي چې درې واړه وژل شوي نارینه دي او په ټپیانو کې بیا ۹مېرمنې، ۷ماشومان هم شامل دي.
د بغلان ولایت په خوست ولسوالي کې یوه محلي سرچینه سلاموطندار ته وایي چې بېګاه شپه د دغې ولسوالي په اړوند سیمه کې د وسلهوالو طالبانو په یوه کمین کې د څرخي پله د ښوونې او روزنې رییس غلاممحي الدین پیکان حیدري له دوو محلي قومندانانو سره چې د ولسي پاڅونوالو مسوولیت یې پر غاړه درلود، وژل شوي دي.
نن سهار شاوخوا شپږ بجې د کونړ پر مرکز اسداباد د هاوان مرمیو ویشتل پیل شول چې د ورځې تر لسو بجو څلور توغندي د ښار په بېلابېلو برخو ولګېدل.
د کونړ والي محمداقبال سعید که څه هم د کومې ډلې نوم نه یادوي، خو وايي، دغه برید وسلهوالو کړی او پنځه کسان پهکې ټپیان شوي دي.
د بامیان والي سیدانور رحمتي نن په یوې خبري غونډه کې وویل چې د دغه ولایت د کهمرد ولسوالي په «اشپشته» کلي کې د وسلهوالو طالبانو له لوري د امنیتي ځواکونو پر پوستو د بریدونو له امله ۵ سرتیري وژل شوي او یو بل ټپي دي.
د هرات ولایت د اوبه ولسوال ضیاالحق نوري په دغې ولسوالي کې د هغو سرتېرو روغتیايي وضعیت په اړه اندېښنه ښيي چې له طالبانو سره په جګړه کې ټپیان شوي دي. د هغه په وینا، اوس ۴۹ سرتېري د مرګ پر پوله ولاړ دي او که ژرترژره ونه لېږدول شي، ښايي خپل ژوند له لاسه ورکړي.
نن د بدخشان یوشمېر اوسېدونکیو په دغه ولایت کې د ناامنیو، د څښاک اوبو رسولو د شبکې پرې کېدل او د شورابک بند د نه پرانیستل کېدو په غبرګون کې لاریون وکړ، خو کله چې لاریون کوونکوغوښتل د بدخشان ولایت مقام د دروازې پر لور ولاړ شي، امنیتي ځواکونو یې مخ ونیوله او دغه لاریون پر تاوتریخوالي واوښت.
نږدې یوه میاشت کېږي چې وسلهوالوطالبانو د بغلان ولایت اړوند د نهرین ولسوالي پر مرکز بریدونه پیل کړي چې یوازې د دغه ولسوالي او د پولیسو د قومندانۍ ودانۍ د امنیتي ځواکونو تر کنټرول لاندې دي او پاتې نورو سیمو باندې طالبانو ولکه خپله کړې ده.
د افغانستان د بشري حقونو خپلواک کمېسیون وایي چې په تېرو دوو ورځو کې په هلمند او غور ولایتونو کې د جګړو له امله د ښځو او ماشومانو په ګډون ۱۶ملکیان وژل شوي دي. دغه کمېسیون په یوې خپره کړې خبرپاڼه کې د جګړې له ښکېلو غاړو غوښتي چې د ملکیانو ژوند ته دې پام وکړي.
په خبرپاڼه کې راغلي چې د جګړې ډېره بیه ملکلیان پرې کوې او هر څه ژر دې روان تاوتریخوالی ودرول شي، تلپاتې اوربند او د سولې ټينګښت لپاره دې زمینه برابره شي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
