د ا.ا حکومت په تازهګۍ سره پرېکړه کړې هغه معلولان او متقاعدین چې د کار کولو وړتیا ولري، په حکومتي ادارو کې به یې پر دندو وګوماري.
خو دغه پرېکړه د معلولانو او متقاعدینو له دوهګوني غبرګون سره مخ شوې ده. یوشمېر متقاعدین له دې پرېکړې د هرکلي ترڅنګ وايي چې ډېری متقاعدین د کار کولو وړتیا لري او په خپلو دندو کې مسلکي دي.
پکتیا کې یوشمېر معلولان نیوکه کوي چې مالي حقوق یې پر خپل وخت نه ورکول کېږي چې له امله یې له ګڼو اقتصادي ستونزو سره مخ دي.
دوی نن مرکز ګردېز ښار کې یوې غونډې ته ویلي، د تېر حکومت پر مهال ورته ټاکل شوي حقوق چې هر کال به معلولانو ترلاسه کول، اوس په بېلابېلو پلمو ځنډېږي او دوی یې سختو ستونزو سره مخ کړي دي.
د رییس الوزرا دویم مرستیال عبدالسلام حنفي «کسبګرو او هټۍوالو څخه د ملاتړ» غونډه کې د مالیو راټولولو پرمهال پر شفافیت ټینګار وکړ او وویل چې هېوادوالو څخه د ا.ا لهخوا راټوله شوې مالیه تر ډېره د ښوونې او روزنې او روغتیا په برخو کې لګول کېږي.
د غزني د روږدو کسانو د درملنې پنځوس بستر روغتون ډاکټران او کارکوونکي وايي چې له د روان کال له پیل راهیسې یې خپل معاشونه نه دي ترلاسه کړي او دې موده کې د دغه روغتون د لګښتونو لپاره هم هېڅ بودیجه په پام کې نه ده نیول شوې.
د روزګان د ترینکوټ ښاروالي لسګونه کارکوونکو نن ترینکوټ ښار کې د خپل ناوړه اقتصادي وضعیت له امله اعتراض وکړ او له اړوند ادارو او موسسو یې غوښتنه وکړه چې مرستې ورسره وکړي. اعتراض کوونکي وايي، د میاشتې ۵۰۰۰ افغانۍ معاش لري چې د توکو لوړو بیو ته په پام یې د ژوند اړتیاوې پرې نهشي پوره کولای. یوشمېر نور اعتراض کوونکي هم وايي چې ټوله ورځ د ښار پر پاکولو بوخت وي او نور کار-روزګار نهشي کولای.
د اسلامي امارت مشر هبتالله اخندزاده په تازه سپارښتنه کې ویلي چې د خلکو لهخوا جوړ شوي قوانین د تطبیق وړ نه دي او د اسلامي امارت حکومت کې باید د هرې ستونزې حل په شریعت کې ولټول شي. ویناپاڼه زیاتوي چې د اسلامي امارت مشر هبتالله اخندزاده والیانو ته په وینا کې سپارښتنه کړې چې د نوموړي له پرېکړو اطاعت وکړي.
د مالیې وزارت مسوولان وايي چې د روان مالي کال په بودیجه کې یې متقاعدینو ته پیسې ځانګړې کړي او ډېر ژر به د متقاعدینو او دولتي کارکوونکو حقوق او معاشونه ورکړي.
کندهار کې د ښاروالي چارواکي وايي چې په دغه ولايت کې د ملګرو ملتونو د هبېټاټ موسسې، په مالي لګښت ۸۴۰ وزګاره کسانو ته د دې ادارې ترمدیریت لاندې د کار زمينه برابره کړې ده.
د اسلامي امارت ویاند او د اطلاعاتو او فرهنګ وزارت د نشراتو معین ذبیحالله مجاهد نن کابل کې د یوې غونډې پرمهال وویل چې له دې وروسته به له کوم خنډ او ځنډ پرته ټولو دولتي کارکوونکو ته هره میاشت پر خپل وخت معاشونه ورکول کېږي.
د فاریاب کوویډ۱۹ روغتون ډاکټرانو نن سهار میمنې ښار کې د معاشونو د نه ورکړې له امله اعتراض کړی او له اړوند ادارو څخه یې غوښتنه کړې چې د دوی معاشونو دې ورکړل شي.
یوشمېر پوځي متقاعدین وايي چې په خراب اقتصادي وضعیت کې دي او له اسلامي مارت څخه د خپلو حقوقو د ورکړې غوښتنه کوي. دوی زیاتوي چې تراوسه حکومت د دوی حقوق نه دي ورکړي او که چېرته یې حکومت تقاعد ورنه کړي، نه شي کولای خپل عادي ژوند مخته یوسي.
پکتیا کې یوشمېر معلولین وايي، له تېرو څو میاشتو راهیسې یې معاش نه دی اخیستی او له ګڼو ستونزو سره مخ دي. دوی هغه غونډه کې چې افغان معلولینو ته د لاسرسي یا «AOAD» موسسې په همکارۍ جوړه شوې وه، له اسلامي امارت او نړیوالو بنسټونو او موسسو وغوښتل چې د اقتصادي ستونزو د حل لپاره یې معاشونه ورکړي.
رویټرز خبري اژانس نن د یوې باوري سرچینې له قوله رپوټ ورکړی چې نړیوال بانک د یوه داسې وړاندیز د وروستي کېدو په درشل کې دی چې له مخې یې د افغانستان له کنګل شویو پیسو څخه ۵۰۰ میلیونه ډالر ازادوي. د رویټرز په رپوټ کې راغلي چې ټاکل شوې د نړیوال بانک مدیره پلاوی نن په دې برخه کې په غیررسمي توګه سره وویني.
د مالیې وزارت ویاند احمدولي حقمل وايي، د دولتي کارکوونکو د درېوو میاشتو معاشونو د ورکړې پر طرحه یې کار پیل کړی او سر له نن به د هغوی د وږي، تلې او لړم میاشتو د معاشونو یوځای ورکړې پر اجرا یې کار پیل کړی دی.
هغه وايي، د دولتي کارکوونکو د معاشونو لپاره یې نوې طرحه په پام کې نیولې چې له مخې به یې معاشونه ورکول کېږي.
د مالیې وزارت اړوند د ګمرکونو او عوایدو معینیت مسوولانو نن د یوې خبري غوڼدې پر مهال وویل چې په تېرو ۷۸ ورځو کې یې د هېواد په کچه نږدې ۲۷ملیارده افغانۍ عواید راټول کړې دي. د ګمرکونو او عوایدو عمومی رییس ویلي، د اسلامي امارت د راتلو راهیسې یې په نږدې دوه نیمو میاشتو کې یې ۲۶ میلیارده او ۹۱۵ میلیونه افغانۍ راټولې کړې دي.
په کابل کې د کورونا ناروغي د تشخیص او درملنې د ځانګړي مرکز افغان-جاپان روغتون سرطبیب ډاکټر طارق اکبري سلاموطندار ته ویلي چې د دغه روغتون څه باندې ۲۵۰ ډاکټرانو او کارکوونکو د پنځو میاشتو معاشونه نه دي اخیستي.
د نوموړي په وینا، د یاد شمېر کارکوونکو له ډلې ۳۵ یې د معاش نه ورکړې له کبله خپلې دندې پریښې دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
