د اسلامي همکاریو سازمان د غړو هېوادونو د بهرنیو چارو وزیرانو غونډه نن د پاکستان په پلازمېنه اسلاماباد کې د امریکا، اروپایي ټولنې او یوشمیر نورو هېوادونو د استازیو په ګډون جوړه شوه. دې غونډې ته د پاکستان لومړي وزیر عمران خان وویل، اسلامي او د نړۍ نور هېوادونه باید له افغانستان سره مرستې جاري وساتي، څو د بشري ناورین مخه ونیول شي.
د هند د بهرنیو چارو وزیر جېشنکر ویلي، د مرکزي اسیا هېوادونه له خنډ پرته په افغانستان کې د ټولګډونه حکومت جوړېدو، له ترهګرۍ سره د مبارزې او د بشردوستانه مرستو د تضمین په اړه ګډې اندېښنې لري. نوموړي د افغانستان له وضعیت د اندېښنې په څرګندولو سره ویلي، د دغه هېواد له اوسېدونکو سره د مرستې لپاره باید ګډې حل لارې ولټول شي.
د افغانستان په چارو کې د روسیې ځانګړي استازي ضمیر کابلوف په تازهګۍ سره ویلي، که افغانستان کې هر اړخیز دولت رامنځ ته نه شي، اسلامي امارت سیاسي واک نهشي ترلاسه کولای. کابلوف د افغانستان د سیاسي وضعیت څرنګوالي کې د ټولو قومونو ګډون او ونډه مهمه بولي.
په افغانستان کې د ملګرو ملتونو سیاسي استازولۍ یا «یوناما» ویلي، پر افغانستان د اسلامي امارت له واکمنېدو راهیسې د ښځو حقونه له پام لوېدلې دي. دغه بنسټ نن د «بشر حقونو نړیوالې ورځې» په مناسبت په یوې خبرپاڼه کې له اسلامي امارت څخه غوښتنه کړې چې د هر افغان له حقونو څخه ملاتړ وکړي.
د اسلامي امارت مسوولان له تېرو څه باندې ۳ میاشتو راهیسې له کله چې واک یې ترلاسه کړی د خپل حکومت په رسمیت پېژندلو غوښتنه کوي او په دې برخه کې یې د سیمې او د نړۍ له یوشمېر هېوادونو سره هم ناستې کړي، خو لاهم دا چاره نه ده عملي شوې. دوی وايي، د حکومت د رسمیت پېژندنې ټول شرایط یې پوره کړې دي.
د سولې او ازادۍ لپاره د افغان ښځو موسسې نن د ښځو پر وړاندې د تاوتریخوالي مخنیوي په مناسبت جوړې شوې غونډې پر مهال په بېلابېلو برخو کې د افغان ښځو د حقونو د ورکړې غوښتنه وکړه.
دوی له نړیوالې ټولنې وغوښتل چې افغاستان کې د ښځو، سولې او امنیت په اړه د ملګرو ملتونو د امنیت شورا د ۱۳۲۵ ګڼه پرېکړهلیک پلي کېدل وڅاري.
د هرات د کډوالو او بېرته راستنېدونکو چارو ریاست سرپرست محمدرفیق نیرومند سلاموطندار ته ویلي، زرګونه هغه بېځایه شوي چې له غور، فراه، بادغیس او نورو سوېل ختیځو ولایتونو څخه دغه ولایت ته ورغلي، په سخت اقتصادي وضعیت کې ژوند کوي.
یوشمېر افغان زدهکړیالان وايي چې د اسلامي امارت له لوري د هېواد تر بشپړ کنټرول او د هند او افغانستان ترمنځ د الوتنو له دردېدو وروسته له درسونو پاتې دي.
د دوی په وینا، د هند په ګډون، نورو هېوادونو اسلامي امارت په رسمیت نه دی پېژندلی او همدا لامل دی چې دوی له زدهکړو بېبرخې شوي دي.
د بغلان په تالهوبرفک ولسوالي کې د ډبرو سکرو د کان یوشمېر کارګر وايي چې ناپېژنده وسلهوالو یې دوه ورځې وړاندې پر دوو همکارانو برید کړی چې له کبله یې یو وژل شوی او بل پر سر سخت ټپي شوی دی.
د دوی په وینا، یاد کارګر د بامیان ولایت د ورس او دایکندي د شهرستان ولسواليو اوسېدونکي دي.
په بادغیس کې د شري ناروغي خپرېدل لامل شوي چې ګڼشمېر کورنۍ د خپلو ماشومانو د درملنې لپاره ولایتي روغتون ته ورشي.
ځینې دغه کورنۍ چې له یوې اوونۍ راهیسې د خپلو ماشومانو درملنې ته په تمه دي وايي، ماشومان یې د شري واکسین د نه ورکېدو له کبله پر دې ناروغي اخته شوي دي. ګلناز چې دوه ماشومان یې پر شري اخته شوي او اوس یې د بادغیس ولایتي روغتون ته راوړي وايي، ماشومانو ته یې واکسین نه دی ورکړل شوی.
په کابل کې د کورونا ناروغي د تشخیص او درملنې د ځانګړي مرکز افغان-جاپان روغتون سرطبیب ډاکټر طارق اکبري سلاموطندار ته ویلي چې د دغه روغتون څه باندې ۲۵۰ ډاکټرانو او کارکوونکو د پنځو میاشتو معاشونه نه دي اخیستي.
د نوموړي په وینا، د یاد شمېر کارکوونکو له ډلې ۳۵ یې د معاش نه ورکړې له کبله خپلې دندې پریښې دي.
د پکتیا مرکز ګردېز اړوند د تېرې سيمې د ښارګوټي هټۍوال وايي، د ښاروالۍ مسوولانو د هغو هټیو او غرفو تړل پیل کړي چې په عامه ځایونو کې د کورونو خواته او د سړک غاړو ته جوړ شوي وو.
د لوګر ولایت اوسېدونکي د اسلامي امارت له چارواکو غواړي چې په لوګر ولایت کې د بې اسناده او یو کیلي موټرو په ګرځېدو بندیز ولګوي. دوی د بې اسناده موټرو له ګرځېدو په نیوکې سره وايي چې تر ډېره امنیتي او جنايي پېښې د همدې موټرو په وسیله تر سره کېږي.
د بغلان په مرکز پلخمري ښار کې د یوې کورنۍ خپلوان وايي چې یوې کورنۍ د لوږې او ناچارۍ له کبله خپل درې ماشومان پلورلي دي.
د دې کورنۍ یوه خپل اسدالله (مستعار نوم) سلاموطندار ته ویلي چې دغه کس د بېوزلۍ له کبله دوه ماشومان په ۵۰ زره افغانیو پلورلي او یوه کوچنۍ لور یې هم د پیسو په بدل کې یوه پاخه سړي ته په نکاح ورکړې ده.
د ژورنالېسټانو شورا رییس حفیظالله بارکزی وايي، افغان خبریالان اطلاعاتو ته د نه لاسرسي ستونزې سره مخامخ دي.
هغه چې نن په کابل کې یوې خبري غونډې ته خبرې کولې وویل، هېواد کې د اطلاع رسونې وضعیت د ښهوالي لپاره باید د همغږۍ کمېسیونونه جوړ شي، څو خبریالانو ته کره معلومات ورکړل شي. د نوموړي په وینا، تر اوسه اطلاعاتو ته د نه لاسرسي ستونزه پر خپل ځای ده او د نظام په بدلون سره پهکې د پام وړ بدلون نه دی راغلی.
د تخار د مرکز تالقانو ښار د دوهسوه بستریز روغتون روغتیايي کارکوونکی محمدصابر وايي، له تېرو درېوو میاشتو راهیسې یې معاش نه دی اخیستی او د ژمي را رسېدو او د خوراکي او سوندتوکو د بیو لوړېدو له کبله ګڼو اقتصادي ستونزو سره مخ شوی دی.
د هغه په خبره، خپلې ستونزې یې د تخار د روغتیا ریاست او د عامې روغتیا وزارت له چارواکو سره شریکې کړي او تمه ده چې حل یې کړي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
