عمران خان: تر هغه چې ولسمشر غني په واک کې وي، طالبان سوله نه کوي

د پاکستان لومړی وزیر عمران ‌خان وايي، تر هغه چې ولسمشر محمداشرف غني په واک کې وی، طالبان له افغان دولت سره د سولې خبرو ته نه حاضرېږي.
هغه دا خبرې تېره ورځ په اسلام‌اباد کې له خبریالانو سره په یوه خبري غونډه کې کړې دي.

د امریکا سفارت: د طالبانو بریدونه د دوی له ژمنو سره په ټکر کې دي

کابل کې د امریکا سفارت په یوې خپره کړې خبرپاڼه کې د طالبانو له لوري د ولایتونو پر مرکزونو بریدونه غندلي او ویلي یې دي چې دا بریدونه د خبرو له لارې سیاسي حل په اړه د طالبانو له ژمنو سره په ټکر کې دي. د امریکا سفارت د طالبانو له لوري پر زرنج، شبرغان ښار بریدونه او د لښکرګاه او د نورو ولایتونو د نیولو هڅې، له تاوتریخوالي ډکې بللې دي

وېلسن: امریکا به په افغانستان کې د سولې راتلو لپاره هڅې ونه سپموي

د امریکا یوه مهم ډیپلوماټ له سلام‌وطندار سره په ځانګړې مرکه کې ویلي، که څه هم په ولسوالیو کې طالبانو پرمختګ کړی، خو واشنګټن به په افغانستان کې د سولې راتلو لپاره خپلې هڅې ونه سپموي. کابل کې د امریکا سفارت سرپرست وايي، د افغان دولت او طالبانو ترمنځ د سولې بهیر ګړندي کېدو په موخه به راتلونکې اوونۍ د قطر په دوحه کې غونډه جوړه شي.

ولسمشر: که وضعیت د جګړې په ډګر کې بدل نه شي، طالبان سولې ته نه حاضرېږي

ولسمشر محمداشرف غني نن د کابینې په لومړنۍ ډیجیټلي غونډه کې وویل، تر هغه چې وضعیت د جګړې په ډګر کې بدل نه شي، طالبان د سولې رښتینو خبرواترو ته نه حاضرېږي.
د هغه په وینا، د وضعیت د بدلون لپاره یې چمتووالی نیولی او تر راتلونکو شپږو میاشتو پورې به په بشپړ ډول بدل شي.

یوناما طالبانو ته: که جګړه بس نه کړئ؛ منزوي به شئ

د افغانستان لپاره د ملګرو ملتونو ځانګړې استازې دېبرا لاینز په ولسمشرۍ ماڼۍ کې د څارنې او همغږۍ د ګډ بورډ غونډې ته په وینا کې وویل چې په وروستیو میاشتو کې ملکیانو ته د اوښتې مرګ‌ژوبلې اصلي عاملان وسله‌وال طالبان دي او که چېرته دغه ډله له جګړې لاس وانخلي، منزوي به شي. مېرمن لاینز وایي چې دوی د ملکیانو پر وړاندې د طالبانو ټولې کړنې تر څار لاندې نیولي دي.

جګړې ځپلی کندهار؛ خلکو د اوربند او سولې غږ اوچت کړ

لسګونو کندهاریانو نن په دغه ولایت کې لاریون وکړ او د جګړې له لوریو یې وغوښتل چې تاوتریخوالی بس او اوربند وکړي.
معترضانو چې په یوه خوله یې د خپلې بې‌وسۍ او د جګړې درېدو شعارونه ورکول، وویل چې کندهار ښار کې جګړې او بمبار اووه زره کورنۍ بې‌ځایه کړي او هره ورځ یې له کبله له لسو ډېرو ملکیانو ته مرګ‌ژوبله اوړي.

نړیواله ټولنه له طالبانو او نورو ترهګرو ډلو ملاتړ کوي

د افغانستان د سولې کور د هېواد اوسنی وضعیت پېچلی او د اندېښنې وړ بللی دی. د دغه بنسټ د مشرتابه پلاوي غړی عبدالله رسولي نن کابل کې یوې خبري غونډې ته وویل، که څه هم د هېواد روان وضعیت ګونګ او د وړاندوینې نه دی، خو حکومت له روان وضعیت څخه د وتلو لپاره کوم ځانګړی پلان ترلاس لاندې نه لري.

ولسمشر غني او جو بایډن پر روان وضعیت او سولې ټیلیفوني خبرې کړي

ولسمشرۍ ماڼۍ د یوې خبرپاڼې په خپرولو سره ویلي چې ولسمشر محمداشرف غني له خپل امریکایي سیال جو بایډن سره ټیلیفوني خبرې کړي دي.
په خبرپاڼه کې راغلي چې ولسمشر غني پرون ماښام له بایډن سره د دواړو هېوادونو د اړیکو پر دوام  او د هېواد په روان وضعیت بحث او خبرې کړي دي.

طالبان: که غني واک پرېږدي، وسله پر ځمکه ږدو

د سولې په خبرو کې د طالبانو د مرکچي پلاوي غړی سهیل شاهین له اسوشیټډپرس خبري اژانس سره په یوې ځانګړې مرکه کې ویلي، دغه ډله به هلته خپله وسله پر ځمکه کېږدي چې په کابل کې د ټولو ښکېلو لوریو له خوا د منلو وړ یو حکومت رامنځ ته شي او د غني حکومت هم له منځه تللی وي. سهیل شاهین وایي، دوی د واک انحصار نه غواړي او ټول باد د هېواد په ابادۍ کې ونډه واخلي.

غني: طالبان سولې ته اراده نه لري

ولسمشر محمداشرف غني نن د لوی اختر له لمانځه وروسته ملت ته په خپل اختریز پیغام کې پر وسله‌والو طالبانو د نیوکې په توګه وویل چې دغې ډلې د جګړې په ډېرولو سره وښوده چې سولې ته اراده نه لري او د ۵۰۰۰ طالب بندیانو خوشې کېدو، دغه ډله تراوسه د سولې په اړه جدي خبرو ته نه ده راضي کړې. ولسمشر له طالبانو وغوښتل چې د عامه تاسیساتو له ویجاړولو لاس واخلي.

افغان حکومت باید د سولې شته فرصت له لاسه ور نه کړي

پخواني ولسمشر حامد کرزي نن په کابل کې د یوې خبري غونډې پر مهال وویل چې ډېر ژر به د افغان دولت او طالب ډلې ترمنځ د سولې خبرې اترې پیل شي او دواړه لوري باید ژرترژره بېرته د خبرو مېز ته راوګرځي. هغه له افغان حکومت څخه غواړي چې د سولې شته فرصت له لاسه ور نه کړي او طالبان دې هم د هېواد له ویجاړولو لاس واخلي.

ولسمشر: هغوی چې سوله نه کوي، باغیان دي

ولسمشر محمداشرف غني نن د کانونو اوونۍ په غونډه کې وویل چې افغان دولت په هېواد کې د جګړې پای ته رسېدو لپاره د سولې طرحه وړاندې کړه او په خبره یې، هغوی چې سوله نه کوي، باغیان دي.

دیني عالمان: هېواد کې روانه جګړه فتنه ده

سلګونو دیني عالمانو نن په کابل کې د یوې غونډې پر مهال د هېواد روان امنیتي وضعیت د اندېښنې وړ وباله او پر طالبانو یې تور پورې کړ چې دغه وضعیت د دوی له کبله دی. دغو دیني عالمانو په هېواد کې روانه جګړه هم فتنه وګڼله او د ژرترژره درېدو غوښتنه یې وکړه. دیني عالمانو په دې غونډه کې له حکومت او طالبانو هم وغوښتل چې خپلمنځي اختلافات د خبرو له لارې حل کړي.

حمدالله محب له خپل روسي سیال سره لیدلي

د ملي امنیت شورا سلاکار حمدالله محب روسیې ته د خپل سفر په ترڅ کې د دغه هېواد د ملي امنیت له سلاکار نیکولای پاتروشیف سره لیدلي دي. د ملي امنیت شورا دفتر په یوې خبرپاڼه کې ویلي، دغه لیدنه چې نن ترسره شوې، دواړو لوریو په سیمه کې د ګډو امنیتي موخو د تقویت او ملاتړ لپاره د چمتووالي خبر ورکړی دی. دواړو لوریو په دې لیدنه کې د سولې په بین الافغاني خبرو او له ترهګرۍ سره پر ګډې مبارزې هم خبرې اترې کړي دي.