د پاکستان د طالبانو تحریک نن سهشنبه د تلې ۱۲مه په یوې خبرپاڼه کې ویلي چې د پېښور په متڼو تاڼې سیمه کې یې پرون دوشنبه د پاکستان د پوځ د موټرو پر یوه کاروان برید کړی او د یوه مېلشه په ګډون یې درې پوځیان وژلي دي.
بلخ کې نن لسګونه مېرمنو او ښځینه زدهکړیالانو کابل کې پر کاج ښوونیز مرکز د برید په غبرګون کې لاریون وکړ.
اعتراض کوونکو مېرمنو د لاریون پرمهال د «هزاره وژنه بس کړئ»، «تعلیم زموږ حق دی»، «امنیت زموږ حق دی» او «ازادي زموږ حق دی» شعارونه ورکول او د عدالت د ټينګښت غوښتنه یې کوله. .
په افغانستان کې د ملګرو ملتونو سیاسي استازولي یا یوناما نن دوشنبه د تلې یوولسمه پر خپله ټوېټرپاڼه لیکلي چې د کابل د لوېدیځ دشتبرچي سیمه کې پر کاج ښوونیز مرکز د شوي برید له امله د مرګژوبلې شمېرې په زیاتېدو دي.
یوناما ویلي چې دې پېښه کې د وژل شویو شمېر ۴۳ او د ټپیانو بیا ۸۳ کسانو ته لوړ شوی دی.
یوشمېر ښځې نن د کابل په لوېدیځ دشتبرچي سیمه کې د اعتراض په ډول سړکونو ته راووتلي، څو دغه ځای کې پر یوه ښوونیز مرکز پرونی برید وغندي، خو د اسلامي امارت ځواکونو د اعتراض اجازه ور نهکړه.
د ا.ا ځواکونو په دې سیمه کې خبریالانو ته هم اجازه ور نهکړه چې یاد لاریون ته خبري پوښښ ورکړي.
په افغانستان کې د ملګرو ملتونو ځانګړې استازولۍ یا یوناما نن ماسپښین پر ټویټر لیکلي چې پر کاج ښوونیز مرکز د پروني برید د قربانیانو کره شمېرو را ټولولو لپاره یې کسان ګومارلي دي.
یوناما ویلي، د پروني برید په اړه وروستۍ شمېرې یې ښيي چې په یاد برید کې ۳۵ کسان وژل شوي او ۸۲ نور ټپیان دي.
د ملګرو ملتونو امنیت شورا د یوې خبرپاڼې په خپرولو سره افغانستان کې پر ښوونیزو مرکزونو د بریدونو او د زدهکوونکو د امنیت نه خوندیتوب د ناوړه پایلو په اړه ژوره اندېښنه ښودلې ده. په اعلامیه کې سولې او امنیت ته د رسېدو لپاره زدهکړو ته د ټولو افغانانو د لاسرسي پر حق هم ټینګار شوی دی.
پخواني ولسمشر حامد کرزي د کابل دشتبرچي سیمه کې پر کاج ښوونیز مرکز نننی خونړی برید غندلی او هغه یې د ټولو اسلامي او انساني اصولو سره په ټکر کې بللی دی.
د کابل د دیارلسمې امنیتي حوزې اړوند دشتبرچي سیمه کې پر «کاج» ښوونیز مرکز د نننۍ مرګوني برید ته د غبرګونونو په لړ کې د افغانستان لپاره د بشريحقونو په چارو کې د ملګروملتونو ځانګړي استازي ریچارډ بنټ دغه برید غندلی دی.
د ماشومانو لپاره د ملګروملتونو ملاتړې ادارې یا یونېسف نن په کابل کې پر کاج ښوونیز مرکز برید ته په غبرګون کې ویلي چې پر ښوونیزو مرکزونو بریدونه د منلو وړ نه دي.
روسي رسنیو راپور ورکړی چې د دغه هېواد د پلازمېنې مسکو د ایژوسک ښار په یوه ښوونځي کې د وسلهوال برید پرمهال د اوو زدهکوونکو په ګډون ۱۳ کسان وژل شوي دي.
پاکستاني رسنیو ویلي چې د دغه هېواد د خېبرپښتونخوا ایالت اړوند په کُرمه کې د یوه وسلهوال برید پرمهال درې پاکستاني پوځیان وژل شوي دي. په ورته مهال «ټيټيپي» د دغه برید مسوولیت منلی او ویلي یې دي چې وسلهوالو یې د کُرمې په خرلاچي سیمه کې درې پاکستاني پوځیان وژلي دي.
کابل کې د روسیې سفارت نن په یوه خبرپاڼه کې لیکلي چې د کونسلۍ او د نویو ویزو د ورکړې خدمتونه یې درولي دي.
د روسیې سفارت له خلکو غوښتي، څو تر بلې خبرتیا پورې د دغه سفارت د کونسلۍ څانګې ته ور نهشي.
وروسته له هغې چې تېره اوونۍ کابل کې د یوه ځانمرګي برید پرمهال د روسیې دوه ډيپلوماټان ووژل شول، د دغه هېواد چارواکي وايي، پلازمېنه کابل کې یې د سفارت د امنیت ټینګښت لپاره تدابیر زیات شوي دي.
ځینو سرچینو وړمه شپه د کابل په دهمزنګ سیمه کې د چاودنې خبر ورکړ او داسې هم ویل کېدل چې هوايي برید شوی دی.
که څه هم اسلامي امارت هغه مهال د دې پېښې په اړه څه ونه ویل، خو د سرپرست حکومت د ویاند مرستیال بلال کریمي سلاموطندار ته ویلي چې هلته یو راکېټ لګېدلی دی.
د روزګان محلي مسوولان وايي چې یوه ملکي وګړي د دغه ولایت په خاص روزګان ولسوالي کې د اسلامي امارت پر غړیو ډزې کړي چې له کبله یې د ا.ا دوه غړي وژل شوي او دوه ملکیان هم ټپیان شوي دي.
د لوګر محلي مسوولان وايي چې دغه ولایت کې د بېلابېلو وسلهوالو بریدونو پرمهال د یوې مېرمنې په ګډون درې کسان وژل شوي دي. د یاد ولایت د امنیې قومنداني ویاند احمدالله انس سلاموطندار ته ویلي، ناپېژنده وسلهوالو د مرکز پلعلم ښار په «التمور» او حصارک سیمو کې په جلا جلا پېښو کې یو کس او یو موټر چلوونکی په ډزو وژلي دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
