د پلازمېنې یوشمېر اوسېدونکي کابل ښار کې د څښاک پاکو اوبو له کمښت څخه اندېښنه ښيي او وايي، د څښاک اوبو ته لاسرسی نهلري.
د کابل ښار د کارته اریانا اوسېدونکی حاجي سرور چې کور یې د ښار په یوې غونډۍ کې دی، هره ورځ د څښاک پاکو اوبو راوړلو لپاره د ښار ښکته سیمو ته ځي.
نوموړی زیاتوي چې د بېوزلي او وزګارتیا له امله نهشي کولای د څښاک اوبه وپېري او له اسلامي امارت غواړي چې د پاکو اوبو د برابرولو برخه کې ورسره مرسته وکړي.
هغه وویل: «کور مې په غونډۍ کې دی او پاکو اوبو ته لاسرسی نه لرم. د اوبو نلکه کې دوه اوونۍ ورسته اوبه راخوشې کوي او اړ یو چې سل متره لاندې سیمو ته لاړ شو او د څښاک اوبه راپورته کړو.»
په همدې حال کې د اوبو د سرچینو کارپوه سیدحسیب اصغر سلاموطندار ته ویلي چې کابل ښار کې د اوبو کچه ټيټه شوې او اسلامي امارت دې د ځمکې لاندې اوبو تغذیې لپاره هڅې وکړي.
نوموړی خبرداری ورکوي چې د هرې ورځې په تېرېدو سره د کابل ښار د ځمکې لاندې د اوبو کچه ټيټېږي او باید غم یې وخوړل شي.
په ورته وخت کې د اوبو او برښنا وزارت مسوولان وايي، دامهال د ځمکې لاندې اوبو څخه په بېمخینې توګه د استفادې او د نفوس زیاتېدو له امله د اوبو سطحه پنځه مترو پورې ښکته تللې ده.
د اوبو او برښنا وزارت د ځمکې لاندې د اوبو د سرچینو مشر عزیزالرحمان عزیز وویل چې دغه وزارت پلازمېنه کابل کې د اوبو کمښت ستونزې حل لپاره دوه لویې پروژې تر لاس لاندې لري چې د دغو پروژو له لارې للندر بند او پنجشېر سیند څخه اوبه کابل ته لېږدول کېږي.
نوموړي وویل: «له پنجشېر څخه کابل ته د اوبو د لېږد پروژه چې ارزښت یې له ۱۲۰ تر ۱۵۰ میلیونه ډالرو پورې رسېږي، پرمټ به یې هر کال له ۱۲۰ میلیونه مترمکعب اوبو پورې کابل ښار ته ولېږدول شي.»
د یادونې ده چې د اوبو او برښنا وزارت دامهال د پلازمېنې کابل د څښاک اوبو تامینولو لپاره د قرغې او د شاه او عروس بندونو څخه د اوبو لېږدولو پروژه ترلاس لاندې لري.