د افغانستان د کرکټ د ملي لوبډلې لوبغاړی راشدخان د کرکټ نړیوالې شورا له لوري د شل اوریزو سیالیو د لسیزې «۲۰۱۱ – ۲۰۲۰»  د غوره لوبغاړي ویاړ او جایزه ترلاسه کړه.

د یادې جايزې ترلاسه کولو لپاره راشد خان سره د ويسټ‌انډيز کرېس ګېل، د هند ويراټ کوهلي، د سرېلانکا لاست‌ملينګا د جنوبي افريقا اې بي ډي ويليرز او يو شمېر نور لوبغاړي هم نوماندان وو.

راشد خان په ۲۰۱۵ کال کې د کرکټ شل اوریزو نړیوالو سیالیو ته له لارموندنې را وروسته د افغانستان لپاره ویاړونه او جایزې ګټلي دي تر دې چې د نړیوالو لپاره هم یوه بېلګه ده او د نړۍ يو له مخکښو څېرو پېژندل شوی دی.

تېره ورځ راشدخان د کرکټ نړیوالې شورا د شل اوریزو سیالیو د وروستۍ لسیزې د ځانګړې لوبډلې په نوملړ کې ځای خپل کړ او نن يې د يادې شورا له لوري د شل اوریزو سیالیو د لسیزې «۲۰۱۱ – ۲۰۲۰»  د غوره لوبغاړي ویاړ او جایزه ترلاسه کړه.

راشد خان چې تېره ورځ د شل اوریزو سیالیو د وروستۍ لسیزې د ځانګړې لوبډلې په نوملړ کې شامل شوی و، په اړه يې پر خپله فېسبوک پاڼه ولیکل: «ستاسو د دعاو او تشویق له برکته زه د افغانستان په استازیتوب د کرېکټ د نړیوالې شورا د لسیزې په لوبډله کې راغلی یم. زه د یو افغان په توګه ویاړم چې زما نوم د لسیزې په غوره ټیم کې راغلی دی. دا د ټول افغانستان لپاره ویاړ ګڼم او هڅه به مې دا وي چې راتونکي کې هم افغانستان ته همداسې ویاړونه راوړم. ستاسو د دعاو او ملاتړ څخه مننه.»

راشد خان د افغانستان په ګډون د نړۍ په ډېرو سوداګريزو لوبو کې لوبېږي چې اوسمهال د اسټراليا «بېګ‌باش» شل اوره لوبو کې له اډي‌لېډ سټرايکرز سره په لوبو بوخت دی.

پدې خبر پورې اړوند:

شریک یې کړی:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
د نن ورځې خبرونه
تحلیلونه او خبري راپورونه

خبرونه د ټولنیزو شبکو سایټونو سلام دوستانو تعقیبوي:

فیسبوک

توییتر

تلگرام