د فاریاب د قیصار ولسوالي اوسېدونکی صفرمحمد بېګاه د دغه ولایت په مرکز میمنې ښار کې د بېوزلۍ او ناروغۍ له کبله په یوه څپره کې مړ شوی دی.
د صفرمحمد خپلوان سیدمامون وايي چې صفرمحمد یو کال مخکې د جګړې له کبله میمنې ته راغلی و او په یوه څپره کې یې ژوند کاوه.
د سلاموطندار پښتو فېسبوکپاڼه وڅارئ
د هغه په وینا، صفرمحمد د «یخ» پلورلو له لارې د ځان او کورنۍ ژوند چلوه، خو تازه چې کله ناروغ شوی، له یو چا نه یې ۵۰۰ افغانۍ پور اخیستی او ډاکټر ته ورغلی دی.
نوموړی زیاتوي، صفرمحمد ۲۵۰ افغانۍ د ډاکټر د فیس ورکوي او دا چې په پاتې ۲۵۰ افغانیو یې درمل نه کېدل، تش لاس بېرته کور ته ستون شوی او بېګاه یې هم خپل ژوند له لاسه ورکړی دی.
د صفرمحمد مېرمن وايي چې خاوند یې کلونه وړاندې د امنیتي ځواکونو په لیکو کې کار کاوه چې په یوه نښته کې لومړی ټپي او بیا کوڼ شوی و. هغه زیاتوي چې صفرمحمد وروسته دنده پرېښوده او د طالبانو له وېرې میمنې ښار ته راوکوچېده. اوس د صفرمحمد یوه مېرمن او درې ماشومان پاتې دي.
د فاریاب د ولایت مقام د دې پېښې په اړه ناخبري ښيي.
