د کورنیو چارو وزارت ویاند عبدالنافع ټکور په یوه ویډیويي پیغام کې له ټولو والیانو، امنیې قوماندانانو، د امنیت آمرانو او ولسوالانو غوښتي چې خلکو ته سپارښتنه وکړي، څو د خپلو څاهګانو سرونه پټ کړي.
کورنیو چارو وزارت ټينګار کړی چې که خلک د خپلو څاهګانو د سرونو پټولو کې بېغوري وکړي، دغه وزارت به یې عدلي او قضايي ادارو ته ور وپېژني.
عبدالنافع ټکور ویلي، «که څوک د خپلو څاهګانو د پټولو وسه نه لري، یو پلاوی به یې لګښتونه په ګوته او حکومت به ورسره په دې برخه کې همکاري وکړي.»
دا په داسې حال کې ده چې په دې وروستیو کې له یوشمېر ولایتونو څخه د برمو او نورو څاهګانو ته د یوشمېر کسانو، په تېره ماشومانو د ور لوېدو خبرونه ورکول کېږي.
د سلاموطندار موندنې ښيي چې په تېرو اتو میاشتو کې ۲۵ کسان څاهګانو ته د ور لوېدو له کبله مړه شوي دي.
