په هېواد کې د جمهوري نظام تر سقوط وروسته او د اسلامي امارت په راتګ سره ګنشمېر کسانو خپلې دندې له لاسه ورکړي او له اقتصادي ستونزو سره لاس او ګرېوان دي. د نورو کسانو ترڅنګ په پکتیا کې د معلولینو او د هغو امنیتي سرتیرو کورنۍ چې د تېر نظام په ملاتړ یې د امنیتي ځواکونو په لیکو کې خپل اولادونه له لاسه ورکړي، له اقتصادي ستونزو څخه کړېږي.
دوی وايي، د تېرو شپږو مياشتو معاش یې نه دی ترلاسه کړی او اوسني نظام څخه غواړي چې حقوق یې د پخوا په څېر ورکړي. د هغوی په وینا، ځینې معلولين او د شهيدانو کورنۍ بل سرپرست نه لري او يوازې یې په همدې معاش ګزاره کوله چې هغه هم پرې بند شوی دی.
د سلاموطندار پښتو فېسبوکپاڼه وڅارئ
د معلولينو د ټولنې مشر عبدالغفور وايي، په دغه ولایت کې معلولین له ګڼو اقتصادي ستونزو سره مخ دي او د اسلامي امارت له چارواکو غوښتنه کوي چې له دوی سره مرستې وکړي او اقتصادي ستونزې یې راکمې کړي.
د پکتيا د اطلاعات او فرهنګ سرپرست رئيس خالقيار احمدزی وايي، شاوخوا ۱۰ زره معلولين او د شهيدانو کورنۍ پخواني نظام راجستر کړي چې په وينا يې، دغه پروسه له درغليو ډکه وه.
هغه زیاتوي چې د ټولو معلولينو او د شهيدانو د کورنیو تازه ارزونه کوي او له کوم توپير پرته به يتيمانو او معلولينو ته حقوق ورکړي.
هغه وویل: «شاوخو لس زره کسان د پکتيا په کچه راجستر شوي و، د راجستر شويو کسانو ليست به کتل کېږي ارزول کېږي به، هغه کسان چې په جګړو کې معلول شوي دي، د بدن غړي له لاسه ورکړي، هغه به په ګوته کېږي، خپل اصطکاق به تر لاسه کوي. د ايتميانو په برخه کې به يادونه درته وکړم، چې هغوی ته هم خپله برخه ورکول کېږي.»
د نوموړي په وینا، ډېری کسانو پخوا د معلولينو په نوم کتابچې جوړې کړي چې له سره به د دوی ټولو ارزونه وشي او حقونه به یې له کوم توپير پرته، ټولو يتیمانو او معلولينو ته ورکړل شي.
تېرو پنځو لسيزو کې د بهرنيو هېوادونو د يرغل ترڅنګ، کورني جنګ هم په زرګونه خلک معلول او زياتې کورنۍ بې سرپرسته کړي چې دا مهال په ډېرو ولايتونو کې له کړاونو او ستونزو ډک ژوند تېروي.
