د روسیې د امنیت شورا منشي نیکولای پاټروشيوف وايي، تر هغه چې د سولې په خبرو کې مشخصه پايله ترلاسه نهشي، د ملګرو ملتونو د امنیت شورا له تور نوملړه د طالب مشرانو د نومونو ايستل له وخته مخکې ده.
بهرنيو چارو وزارت د يوې خبرپاڼې په خپرولو سره ويلي، دغه موضوع د روسیې د امنیت شورا منشي په مسکو کې له محمدحنیف اتمر سره په ليدنه کې مطرح کړې ده.
د خبرپاڼې له مخې، د روسیې د امنیت شورا منشي هم ويلي، روسيې ته افغانستان کې د طالبانو د امارت راتګ هېڅ د منلو نه دی. نوموړي ویلي، هېواد يې په افغانستان کې د سولې له پروسې او له سولې وروسته افغانستان ته ځانګړی ارزښت ورکوي.
د بهرنیو چارو وزارت زیاته کړې، په دې ليدنه کې دواړو لوريو د جدي او معنی لرونکيو خبرو اترو پر پیل کولو هم ټینګار وکړ او د افغانانو د غوښتنې پربنسټ هراړخیز سیاسي حل ته د رسېدو غوښتنه وکړه.
دواړو لوريو همداراز سولې لپاره د سیمهییزې اجماع اهمیت او د څو اړخیزو اړیکو زیاتوالی او په افغانستان کې د سولې پروسه کې د نفوذ لرونکيو هېوادونو له شاملولو په اړه هم بحث کړی دی.
محمدحنیف اتمر په دې ليدنه کې ويلي، افغان حکومت د سولې په پروسه کې د ۶زره طالب بنديانو د خوشې کولو په ګډون خپلې ټولې ژمنې عملي کړي؛ خو ويلي يې دي چې په مقابل کې يې طالبانو د ژمنو پر خلاف پر هېڅ ژمنې عمل نه دی کړی.
د بهرنیو چارو وزیر ويلي، د تاوتریخوالي زیاتوالی، د اوربند په اړه خبرو ته نه کېناستل، له نورو ترهګرو ډلو سره اړیکې ساتل او د جګړې ډګر ته د طالب بندیانو بېرته ستنېدل هغه موارد دي چې طالبانو پر خپلو ژمنو عمل نه دی کړی.
د بهرنيو چارو وزارت خبرپاڼې زياته کړې، دواړو لوريو په دې ليدنه کې د سولې له خبرو پرته، سياسي او امنيتي برخه کې د دواړو هېوادونو پر همکاريو هم خبرې کړي دي.
اتمر په دې ليدنه کې همداراز په سیاسي، اقتصادي او فرهنګي برخو کې د دواړو حکومتونو ترمنځ د همکارۍ د نوي څپرکي رامنځته کولو لپاره د اړیکو د لا پراختیا غوښتنه وکړه.
دا په داسې حال کې ده چې تېره ورځ د روسيې د بهرنيو چارو وزير سرگګي لاوروف له محمد حنيف اتمر سره په يوه ګډه ناسته کې ويلي و، روسیه د طالبانو د امارت بېرته ستنېدو ملاتړ نه کوي؛ خو دې لپاره چې د طالبانو نومونه له تور نوملړه ووځي، باید د سولې په خبرو کې اړین پرمختګ راشي.
له دې وړاندې د ولسمشر محمد اشرف غني د ملي امنیت سلاکار حمدالله محب هم ويلي و، د ملګرو ملتونو د امنیت شورا له غړيو او د افغانستان له متحدانو سره کار کوي، ترڅو ډاډ ترلاسه کړي چې پر طالبانو د ملګرو ملتونو بندیزونه دا ډله له تاوتریخوالي راګرځوي او د سولې هڅې پیاوړې کوي.
نوموړي زياته کړې وه، طالبان ژمنې ماتوي او له ازادېدو سره سره جګړې ته ستنېږي او په دې برخه کې د ملګرو ملتونو د امنيت شورا بنديزونه خورا مهم دي.
