پاکستاني رسنیو نن دوشنبه د تلې څلورمه د دغه هېواد د پوځ په حواله راپور ورکړی چې په بلوچستان ایالت کې د یوې چورلکې د لوېدو له امله د پوځ شپږ لوړپوړي افسران وژل شوي دي.
پېښه بېګاه شپه د بلوچستان هرناي سیمه کې رامنځته شوې ده. د پاکستان ډان ورځپاڼې نن په یوه راپور کې ویلي چې په وژل شویو کې د پوځ دوه پيلوټان او څلور افسران شامل دي.
د پاکستان د پوځ د رسنیو څانګې تراوسه د یادې چورلکې د لوېدو لامل نه دی په ډاګه کړی، خو رسنیو ته یې ویلي، چورلکه کې سپاره ټول شپږ کسان وژل شوي دي.
د پاکستان لومړي وزیر شهباز شریف پر خپله ټوېټرپاڼه په یاده پېښه کې د شپږو پوځیانو پر وژنې خواشیني ښودلې ده.
نږدې یوه میاشت وړاندې هم د دغه هېواد په بلوچستان ایالت کې د یوې چورلکې د لوېدو پرمهال دوه پاکستاني پوځیان وژل شوي وو.
