د اسلامي امارت ویاند ذبیحالله مجاهد نن په خپله ټویټرپاڼه لیکلي چې د کندهار په سپینبولدګ کې له پاکستاني لوري سره نښته شوې ده. ښاغلي مجاهد پاکستاني لوری د جګړې په پیلولو تورن کړی دی.
هغه لیکلي: «د کندهار په سپینبولدک کې له پاکستاني ساتونکو سره یوه محلي ستونزه پېښه شوې چې متاسفانه لومړی ډزې د پاکستاني ساتونکو له لوري شوي دي.»
هغه ویلي، اوس «حالات کابو» شوي او د پېښې د څرنګوالي په اړه به بشپړه پلټنه وشي چې دا «پیښه ولې رامنځته شوې» ده.
د سلاموطندار پښتو فېسبوکپاڼه وڅارئ
د ځینو سرچینو په وینا، په دې پېښه کې دوه کسان وژل شوي او څلور نور ټپیان دي.
خو یوې امنیتي سرچینې چې نه غواړي نوم یې واخیستل شي د فرانسې خبري اژانس ته ویلي چې په جګړه کې درې تنه وژل شوي او لسګونه نور ټپیان دي. سرچینې ویلي چې په دغو وژلو شویو او ټپیانو کې د اسلامي امارت ځواکونه هم شامل دي.
خو پاکستاني لوري تراوسه په دې اړه څه نه دي ویلي.
ویل کیږي د نښتې له امله د سپین بولدک – چمن دروازه هم د مسافرو د تګ راتګ پر مخ تړل شوې ده.
سلاموطندار پر ټویټر هم وڅارئ
د دې جګړې څرنګوالي او تلفاتو په اړه تراوسه بشپړ جزییات نه دي خپاره شوي.
