د افغانستان د ژورنالېستانو او رسنیزو بنسټونو فدراسیون وايي، د اسلامي امارت له لوري د طلوع نیوز د درېوو کارکوونکو نیونه ناقانونه عمل دی.
پرون د اسلامي امارت ځواکونو د طلوع نیوز د خبر څانګې مدیر خپلواک ساپی، د حقوقي برخې مسوول عبدالله نافع او د یاد ټلوېزیون د خبرونو ویاند بهرام امان ونیول چې نن یې خپلواک ساپی او عبدالله نافع راخوشې کړي، خو بهرام امان لا هم د دوی په بند کې دی.
د سلاموطندار پښتو فېسبوکپاڼه وڅارئ
د افغانستان د ژورنالېستانو او رسنیزو بنسټونو فدراسیون په خبرپاڼه کې راغلي، په داسې حال کې چې نن د خبریال ملي ورځ ده، خو بهرام امان په زندان کې دی او خبریال باید خپله ورځ په زندان کې ونه نمانځي.
د طلوع نیوز د خبرونو ویاند بهرام امان پرون د افغانستان د ژورنالېستانو او رسنیزو بنسټونو فدراسیون له لوري د ۱۴۰۰ کال د «غوره ویاند» په توګه هم ټاکل شوی دی.
دغه بنسټ، د اسلامي امارت له اړوند ادارو څخه غوښتنه کړې چې بهرام امان خوشې کړي او که په اړه یې کومه ادعا وي، نو د رسنیو قانون له لارې دې حل کړي.
په همدې حال کې د افغانستان د ژورنالېستانو او رسنیزو بنسټونو فدراسیون له رسنیو څخه د سرغړونې قانون پر بیافعالولو ټينګار کړی او زیاته کړې یې ده چې په فعالېدو سره به د رسنیو اړوند قضیې د همدې قانون له مخې څېړل کېږي.
دا په داسې حال کې ده چې د اسلامي امارت له لوري د طلوع نیوز د یادو درې کارکوونکو نیونې ګڼشمېر کورني او بهرني غبرګونونه له ځان سره لرل.
په افغانستان کې د ملګرو ملتونو سیاسي استازولي یا یوناما په یوه ټویټر پیغام کې په دې اړه اندېښنه ښودلې وه او د یادو کسانو د سملاسي خوشې کېدو غوښتنه یې کړې وه.
