پاکستاني رسنیو راپور ورکړی چې دغه هېواد کې د یوې چاودنې پر مهال د یوه لوړپوړي پولیس چارواکي په ګډون څلور پولیس وژل شوي او شپږ نور ټپیان دي.
رسنیو نن پنجشنبه د مارچ ۳۰مه راپور ورکړی چې چاودنه نن سهار د خېبرپښتونخوا ایالت اړوند په لکي مروت سیمه کې رامنځته شوې ده.
ویل کېږي چې چاودنه په سړک کې د خښ کړل شوي ماین چاودنې له کبله رامنځته شوې ده. د پاکستاني رسنیو په راپورونو کې ویل شوي چې د چاودنې له کبله شپږ پولیس ټپیان شوي هم دي.
تراوسه د یادې چاودنې مسوولیت کوم چا یا ډلې پر غاړه نه دی اخیستی.
دا په داسې مهال دی چې په دې وروستیو کې د پاکستان په بېلابېلو سیمو په ځانګړې توګه خېبرپښتونخوا او بلوچستان ایالتو کې پر پاکستاني نظامیانو او حکومتي چارواکو بریدونه زیات شوي دي.
سلاموطندار پر ټویټر هم وڅارئ
دغه هېواد کې د بریدونو ډېروالي سره هممهاله ځایي خلکو د امنیت ټينګښت لپاره لاریونونه کړي او له حکومت یې غوښتنه کړې چې د سیمو امنیت خوندیتوب لپاره کوټلي ګامونه پورته کړي.
