په اسلاماباد کې د افغانستان سفارت په دغه هېواد کې له افغان کډوالو سره د پاکستاني پولیسو د چلن په اړه اندېښنه ښودلې ده. دغه سفارت د تلې په دیارلسمه، د پنجشنبې په ورځ پر خپلې اېکسپاڼې لیکلي چې د سفارت د کډوالۍ او کونسلۍ چارو یوه ګډ پلاوي د اسلاماباد د پولیسو له عمومي قوماندان اکبر نصیرخان سره کتلي دي.
سلاموطندار پر ټویټر هم وڅارئ
په اسلاماباد کې د افغانستان سفارت په خپله خبرپاڼه کې لیکلي چې پولیسو په پاکستان، په ځانګړې توګه اسلاماباد کې پر افغان کډوالو ژوند تریخ کړی چې په وینا یې، دا د اندېښنې وړ مسله ده.
د خبرپاڼې له مخې، پاکستاني پولیسو د ماشومانو او ښځو په ګډون د ناقانونه کډوالو تر څنګ، هغه افغان کډوال هم نیسي او ځوروي یې چې قانوني اسناد لري.
خبرپاڼه کاږي، د پاکستان پولیسو ورته ویلي چې د دغه هېواد حکومت پولیسو ته جدي سپارښتنه کړې، څو ناقانونه کډوال ونیسي، خو په خبره یې، هڅه به وکړي چې د قانوني اسنادو لرونکي کډوال، ښځې او ماشومان ونه نیسي.
په پاکستان کې د افغانستان سفارت ویلي، هڅه کوي چې په دغه هېواد کې د کډوالۍ اړوندو فعالو سازمانونو سره هلته د افغان کډوالو د سخت وضعیت په اړه خبرې وکړي او د حل لپاره یې بیړنۍ حللاره ومومي.
دا په داسې حال کې ده چې پاکستان کې مېشتو افغان کډوالو تل په دغه هېواد کې د نیولو، ځورول کېدو، بندیانېدو او له دغه هېواده د اېستلو په اړه اندېښنې ښودلې دي.
د پاکستان د کورنیو چارو وزارت دوه ورځې وړاندې ټولو ناقانونه افغان کډوالو ته د روانې اکټوبر میاشتې تر پایه وخت ورکړ، څو له دغه هېواده ووځي، که نه په خبره یې، دوی به یې ونیسي او په زوره به یې له پاکستان څخه وباسي.
