د اسلامي امارت او نړۍ ترمنځ تقابل چې د تېرو شاوخوا شلو میاشتو پر مهال په افغانستان کې بشري حقونو، په ځانګړې توګه د ښځو حقونو په پام کې نه نیولو له کبله ډېر شوی، دغه وضعیت له افغانانو سره د نړیوالې ټولنې مرستې هم را کمې کړې دي.
اوس د بریټانيا حکومت له افغانستان سره د خپلو ۲۴۶ ميليونه پونډه مالي مرستې په سلو کې ۵۰ سلنه کمې کړي او دا کچه یې ۱۰۰ ميليونو ته را ټیټه کړې ده.
د سلاموطندار پښتو فېسبوکپاڼه وڅارئ
د دې تر څنګ، د امریکا د سولې انسټېټیوټ هم په دې وروستیو کې یو راپور خپور کړ چې پهکې ویل شوي وو، په افغانستان کې د اسلامي امارت د چلن له امله د بشري مرستو په برخه کې خلک زیانمن شوي دي.
شنونکي وايي، له افغانستان سره د نړۍ د مرستو کمېدو لامل له نړیوالې ټولنې سره د اسلامي امارت د چلن پایله ده. د سیاسي چارو کارپوه طارق فرهادي وايي چې دغه چلن لوېدیځوالو ته دا پلمه په لاس ورکړې، څو خپلې مرستې کمې کړي او ښايي د دغو مرستو کچه د ا.ا د لومړۍ دورې واکمنۍ پر مهال کېدونکو مرستو ته را ټیټه کړي.»
د اقتصادي چارو شنونکی لعل ځاځی د افغانانو د ستونزو حل په موخه د نړۍ د بشري مرستو رسولو پر ارزښت د ټینګار تر څنګ، له اسلامي امارت څخه غواړي چې د مرستو را جلبولو او د فرصتونو برابرولو برخه کې له نړیوالې ټولنې سره همغږی شي؛ ځکه په وینا یې، د دغو مرستو درېدل به اقتصادي ستونزې وزېږوي.
خو د اقتصاد وزارت ویاند عبدالرحمان حبیب وايي، نړیواله ټولنه دې د افغانانو د اقتصادي وضعیت ښهوالي لپاره نه یوازې د هغوی کنګل شوې شتمني ور پرېږدي، بلکې د پرمختیايي او کارموندنې اړوند پلانونو ملاتړ دې وکړي.
د یادونې ده چې تر ډېره د اسلامي امارت لهخوا په کورنیو او بهرنیو نادولتي موسسو کې د ښځو د کار مخنیوی لامل شو چې له افغانانو سره د نړیوالې ټولنې د بشري مرستو رسول له ننګونو سره مخامخ کړي.
