د امریکا د بهرنیو چارو وزارت د عدالت لپاره د جایزې پروګرام د داعش خراسان ډلې د مشر ثناالله غفاري پر سر لس میلیونه امریکايي ډالر جایزه ټاکلې ده. دغه بنسټ همداراز د کابل هوايي ډګر د برید عاملانو د پېژندنې لپاره هم لس میلیونه ډالر جایزه په پام کې نیولې ده.
د افغانستان ملت ګوند منشي جعفر مهدوي نن دیوې خبرې ناستې پرمهال د اسلامي امارت په لیکو کې د خپلسرو کسانو د تېروتنو په اړه د اندېښنې په څرګندولو سره وویل، دغه کسان د عمومي عفوې د امر خلاف عمل کوي او په یو شمېر ولایتونو کې خپلسري فعالیتونه کوي.
د ملګروملتونو امنیت شورا په یوه رپوټ کې ویلي چې اسلامي امارت په افغانستان کې د ترهګرو ډلو د فعالیتونو محدودولو لپاره هېڅ ډول اقدامات نه دي کړي. رپوټ کې ټينګار شوی چې له زندان څخه د داعش خراسان څانګې د څو زرو سرتېرو له ازادېدو وروسته اوس د یادې ډلې د جنګیالیو شمېر له ۲۲۰۰ څخه ۴۰۰۰ کسانو ته لوړ شوی دی.
د افغانستان لپاره د اروپايي ټولنې ځانګړي استازي توماس نیکلسون د اسلامي امارت له خوا د معترضه ښځو د نیولو په غبرګون کې ویلي، د خلکو خپلسره نیول او د هغوی نادرکه کېدل، د اسلامي امارت د حکومت او خلکو ترمنځ اړیکې کمزورې کوي.
د اسلامي امارت مسوولانو نن د اقتصادي کمېسیون په لومړنۍ غونډه کې د افغانستان ځان بسیاینې لپاره پر هڅو او د خصوصي سکتور پر ملاتړ ټینګار وکړ. هغوی وایي، هڅه کوي د هېواد په بېلابېلو برخو کې د کانونو د کېندنې په ګډون اوږدمهاله پروژې پیل کړي.
د سره صلیب نړیوالې کمېټې د افغانستان د روغتیايي سیستم وضعیت د اندېښنې وړ بللی او ویلي یې دي چې د دغه هېواد د روغتیايي سیستم له پاشلتیا څخه د مخنیوي بشردوستانه هڅې بسنه نه کوي. په ورته مهال د سره صلیب کمېټې رییس ټينګار کړی چې دغه بنسټه هڅه کوي، څو د افغانستان د روغتیايي سیستم د پاشلتیا مخه ونیسي.
د امریکايي پوځ مرکزي قومنداني یا سنټکام د ۲۰۲۱کال د اګسټ میاشتې په ۲۶ نېټه پر کابل هوايي ډګر د ځانمرګي برید په اړه د خپلې تازه پلټنې موندنې په ډاګه کړې چې ښايي یاد برید پېچلی نه و. د سنټکام قومندان زیاته کړې، هېڅ څیز نهشي کولای چې په دغه برید کې وژل شوي امریکايي سرتیري بېرته راوګرځوي، خو دا مهمه ده چې پوه شو دغه برید څه ډول شوی.
کابل کې د اعتراض کوونکو د نیونو پر دوام، د افغانستان لپاره د المان سفیر پر دغې کړنې نیوکه کړې او ویلي یې دي چې له ګوتنیوونکو سره باید د دښمن په توګه چلند ونه شي،
د بېپولې خبریالانو سازمان د افغان خبریالانو پر وړاندې د ګواښونو له داوم څخه د تازه رپوټ په خپرولو سره اندېښنه ښوولې او ویلي، دې وروستیو دوو میاشتو کې د خبریالانو احضار او خپلسره نیونې زیاتې شوي دي.
دغه سازمان ټینګار کړی، چې د اسلامي امارت واکمنېدو راهیسې، د خبریالانو او د رسنیو کارکونکو د نیولو ۵۰ موارده ثبت شوي.
اسلامي امارت په یوې خبرپاڼه کې ویلي، د کابل له ښځینه زندان څخه یې ۱۴ښځینه بندیانې چې د بېلابېلو جرمونو په تور بندیانې شوې وې، خوشې کړې دي. د زندانونو چارو د سمون ادارې په خپره شوې خبرپاڼه کې همداراز ویل شوي، د ولایتونو ټولو محکمو ته سپارښتنه شوې چې د ښځینه بندیانو د دوسیو څېړلو ته لومړیتوب ورکړي. د اسلامي امارت حکومت دا نه دي ویلي چې دغه ښځینه بندیانې د کومو جرمونو په تور نیول شوې وې.
د افغان ښځو لپاره د امریکا ځانګړې استازې کابل کې د معترضه ښځو نیول کېدل غندلي او دغه کار یې ناعادلانه بللی دي. د افغانستان د ښځو لپاره د امریکا د بهرنیو چارو وزارت استازې رینا امیري نن پر خپل ټویټرپاڼه لیکلي، که کابل د ولسي او نړیوال مشروعیت ترلاسه کولو په لټه کې وي، باید بشري حقونه په ځانګړې توګه د ښځو حقونه رعایت کړي او درناوی ورته ولري.
افغانستان کې د ملګرو ملتونو د استازولۍ دفتر یا یوناما د اسلامي امارت له کورنیو چارو وزارت څخه غوښتي چې په کابل کې د دوی د ځواکونو لهخوا د دوو معترضو ښځو د نیول کېدو ادعاو په اړه بیړني معلوماتو وړاندې کړي.
بغلان کې ځايي سرچینو ویلي، د دغه ولایت نهرین ولسوالۍ کې د ډبرو سکرو یو کان نړېدلی چې پایله کې یې کم له کمه د دغه کان ۱۰ کارګرو ژوند بایللی دی.
د «افغانستان د ښځو ورځې» تر عنوان لاندې د اروپايي پارلمان دوه ورځینۍ دورهای غونډه دسېشنبې په ورځ د بلجیم پلازمېنې بروکسل کې پيل شوه. اروپايي ټولنې یوه اعلامیه کې ویلي چې دغه غونډه کې افغانستان کې د بشري ناورین، د اسلامي امارت د ځپونکي حکومت او د افغان ښځو پر وړاندې د ستونزو په ګډون پر یو لړ مسایلو خبرې شوي.
د اریانانیوز خصوصي ټلویزیون مسوولانو تایید کړي چې د دې شبکې د سیاسي خپرونو چلوونکی وارث حسرت او اقتصادي خبریال اسلم حجاب د اسلامي امارت له بند څخه خوشې شول. هغوی ویلي چې دغه دوه خبریالان نن د اسلامي امارت د استخباراتو له خوا خوشې شوي دي.
د اسلامي امارت ویاند او د اطلاعاتو او فرهنګ وزارت مرستیال ذبیحالله مجاهد وايي چې دوی د مخکیني حکومت د رسنیو قانون مطالعه کړی او د اسلامي امارت له پلوه هېڅ نیمګړتیا نه لري. نوموړي دغه څرګندونې نن د افغان خبریالانو د خوندیتوب کمېټې له لوري په جوړه شوې غونډه کې کړې دي. نوموړي زیاته کړې چې اسلامي امارت په دې هڅه کې دی، څو د رسنیو سرغړونې کمېسیون بیا جوړ کړي او د تېروتنو مخه به نیول کېږي.
