د «افغانستان د ښځو ورځې» تر عنوان لاندې د اروپايي پارلمان دوه ورځینۍ دورهای غونډه دسېشنبې په ورځ د بلجیم پلازمېنې بروکسل کې پيل شوه.
اروپايي ټولنې یوه اعلامیه کې ویلي چې دغه غونډه کې افغانستان کې د بشري ناورین، د اسلامي امارت د ځپونکي حکومت او د افغان ښځو پر وړاندې د ستونزو په ګډون پر یو لړ مسایلو خبرې شوي.
د افغانستان د بشري حقونو خپلواک کميسیون پخوانۍ مشرې سیماسمر د افغان ښځو په استازیتوب د اروپايي پارلمان غونډې ته وویل، افغانستان کې وضعیت ورځ تربلې خرابېږي. مېرمن سمر له نړیوالې ټولنې څخه وغوښتل چې افغان مېرمنې باید هېرې نه شي. هغې افغانستان کې بشري مرستې د نړیوالې ټولنې اخلاقي مکلفیت بللي.
د سلاموطندار پښتو فېسبوکپاڼه وڅارئ
د میدان ښار پخوانۍ ښارواله، ظریفه غفاري د دغې ناستې بله ګډونواله وه او اروپايي پارلمان څخه یې وغوښتل چې اسلامي امارت ته په وار وار فرصت ورنکړي. هغې ویلي:«موږ نشو کولی چې څو زره طالبانو ته ۳۵ څخه تر ۴۰ میلیون کسان پرېږدو.»
د هالیووډ مشهورې اداکارې انجلینا جولي د افغان ښځو په اړه د اروپا پارلمان غونډه کې له اسلامي امارت څخه وغوښتل چې د نجونو ټول ښوونځي بېرته پرانیزي او ښځو ته اجازه ورکړي، ترڅو په ازاده توګه ټولنیزو او سیاسي فعالیتونو کې برخه واخلي.
د اروپا پارلمان رییسې روبرتا متزولا په دې غونډه کې ټينګار وکړ چې نړۍ باید د افغان مېرمنو اړتیاوو ته لومړیتوب ورکړي او له اسلامي امارت سره هر ډول تعامل باید د ښځو د حقونو تامین ته مشروط وي.
هغې د اروپايي پارلمان د غونډې په لومړۍ ورځ خپله وینا کې د افغان مېرمنو د حقونو، ښوونې او روزنې ته یې د لاسرسي او د افغانستان په ټولنیزو چارو کې د ښځو ګډون په تړاو ډاډ ورکړ. نوموړې د افغان ښځو په وړاندې د اسلامي امارت د سیستماټیک جنسیتي تبعیض غندنه هم وکړه.
روبرتا متزولا ویلي: «پر افغانستان د اسلامي امارت واکمنېدو سره د بشري حقونو په ځانګړې توګه د ښځو او نجونو وضعیت خراب شوی، د افغان ښځو په وړاندې سیستماټیک تبعیض د اندېښنې وړ دی او هغوی زدهکړو ته لاسرسی نه لري او کار کولو او په بېلابېلو ټولنیزو برخو کې له ګډون څخه محرومې دي.»
دا ناسته د اروپایي پارلمان له خوا د بلجیم پلازمېنه بروکسل کې د دوو ورځو لپاره د (افغان ښځو د ورځو ) تر سرلیک لاندې جوړه شوې وه او نن یې وروستۍ ورځ ده.
