ځینو رسنیو پرون داسې راپورونه خپاره کړل چې له مخې یې د طالبانو د قطر دفتر یو پلاوی له خپلو مشرانو سره په استانبول کې د افغان سولې جوړېدونکې غونډه کې د ګډون او نه ګډون په اړه د سلا مشورې په موخه کوټې ته تللی دی.
سره له دې چې د یاد دفتر ویاند ډاکټر نعیم پاکستان ته د دې ډلې د پلاوي تګ ردوي، خو په کوټه کې ازاد خبریال رزاق برق سلاموطندار ته ویلي چې د طالبانو د قطر دفتر یو پلاوی پرون کوټې ته ورغلی دی.
په لوګر کې یوې باوري سرچینې د نوم نه یادولو په شرط سلاموطندار ته ویلي، طالبان پلان لري چې پر پلعلم ښار ډلهییز برید وکړي.
سرچینه وايي، اوس لسګونه امنیتي پوستې سقوط شوي او د ولایت لومړۍ درجه امنیتي او ملکي چارواکي، د ولایتي شورا غړي، مدني فعالان، ژورنالېستان او لسګونه سوداګر د پلعلم ښار د سقوط له وېرې وتلي دي.
د پلټنې ملي ادارې رییسې غزال حارث پر خپل ټویټرپاڼه لیکلي چې په دغه اداره کې له دوو کلونو خدمت کولو وروسته له خپلې دندې استعفا کوي. مېرمن حارث ویلي چې په دې موده کې یې دوه ځلې ولسمشر ته خپله استعفا وړاندې کړې وه، خو د نوموړي له لوري نه ده منظور شوې.
افغان دولت له افغانستانه د ناټو د ملاتړ دوام هرکلی وکړ.
د بهرنیو چارو وزارت نن په یوه خبرپاڼه کې لیکلي چې افغان دولت د ناټو د هغې اعلامیې هرکلی کوي چې له مخې به یې دغه سازمان خپلو سرتېرو له اېستلو وروسته هم د افغانستان، په تېره د افغان ځواکونو ملاتړ ته دوام ورکوي.
نږدې دوه اوونۍ وړاندې د پلازمینې کابل لوېدیځ دیارلسمې امنیتي حوزې اړوند دشت برچي سیمه کې پر سید الشهدا ښوونځي درې پرله پسې چاودنې وشوې چې له کبله یې څه باندې ۶۰زدهکوونکي چې ډېری یې نجونې وې ووژل شولې او څه باندې ۱۵۰کسان پکې ټپیان شول، اوس د دغه برید د قربانیانو کورنۍ پر حکومت نیوکه کوي چې د دغې چاودنې په څېړلو کې پاتې راغلی او وایي چې تراوسه په دې اړه نه حکومت او نه هم اړوند بنسټونو کوم ګام پورته کړی دی.
د کونړ د ناړۍ ولسوالي ښوونکو پرون د دغه ولسوالي په مرکز کې اعتراضیه ناسته کړې او له څو ورځو راهیسې یې په دغه ولسوالي کې د تدریسي بهیر هم درولی دی.
دوی وايي، له یوې خوا ورته له څو میاشتو راهیسې معاشونه نه دي ورکړل شوي او له بل پلوه معاشونو پسې مرکز اسداباد ته ورځي چې د لارې او ناسم امنیتي وضعیت له امله نه شي کولای پر وخت معاشونه ترلاسه کړي.
په پکتیا ولایت کې د کارخونو لپاره د ځانګړو شویو ځمکو نشتوالي او په دغه ولایت کې روان ناسم امنیت وضعیت د دې لامل شوی چې په دغه ولایت کې د کارخونو فعالیت تر ۴۰ سلنې راټيټ شي. د دغه ولایت د سوداګرۍ خونې د چارواکو په وینا، د کارخونو د ځمکې نشتوالي یوشمېر پانګوال اړ کړي چې خپلې شتمنۍ له پکتیا څخه د هېواد نورو سیمو او حتا له افغانستان څخه د باندې ولېږدوي.
امنیتي چارواکي وایي، د میدان وردګ ولایت د جلرېز ولسوالي د بېرته نیول لپاره د دوی هڅې روانې دي او ډېر ژر به دغه ولسوالي له وسلهوالو طالبانو بېرته ونیسي.
د دفاع وزارت د ویاند مرستیال فواد امان وایي، له وسلهوالو طالبانو څخه د میدان وردګ ولایت د جلرېز ولسوالي د بېرته نیولو لپاره د افغان امنیتي ځواکونو ځمکني او هوایي عملیات پیل شوي او ډېر ژر به دغه ولسوالي د وسلهوالو طالبانو له شتون څخه پاکه کړي.
د لوګر ولایت یوې امنیتې سرچینې د نوم نه ښودو په شرط سلاموطندار ته ویلي چې نن سهار شاوخوا ۴ بجې د بره کي برک ولسوالي اړوند د«لبجر» امنیتي پوستې له جګړې پرته سقوط کړی او سرتیري یې له وسلو او مهماتو سره یوځای طالبانو ته تسلیم شوي دي. سرچنیه وایي چې بېګاه شپه وسلهوالو طالبانو د محمداغې ولسوالي پر بېلابېلو امنیتي پوستو ډلهییز بریدونه کړي او دواړو لورو ته درنه مرګ ژوبله اوښتې ده.
د ميدان وردګو د ولايتي شورا غړی شريفالله هوتک سلاموطندار ته وایي چې نن سهار شاوخوا ۹ بجې د ميدان وردګو ولايت جلرېز ولسوالي له پنځه ورځنۍ کلابندۍ وروسته د طالبانو لاس ته لويدلې ده.
هوتک زياته کړه چې د جلرېز ولسوالي امنيه قوماندان له خپلو ۳۵امنيتي ځواکونو سره يو ځای طالبانو ته تسليم شوی او ولسوالي په بشپړه توګه د طالبانو په کنټرول کې ده.
د افغانستان د بشري حقونو خپلواک کمېسیون وایي چې په تېرو دوو ورځو کې په هلمند او غور ولایتونو کې د جګړو له امله د ښځو او ماشومانو په ګډون ۱۶ملکیان وژل شوي دي. دغه کمېسیون په یوې خپره کړې خبرپاڼه کې د جګړې له ښکېلو غاړو غوښتي چې د ملکیانو ژوند ته دې پام وکړي.
په خبرپاڼه کې راغلي چې د جګړې ډېره بیه ملکلیان پرې کوې او هر څه ژر دې روان تاوتریخوالی ودرول شي، تلپاتې اوربند او د سولې ټينګښت لپاره دې زمینه برابره شي.
د زابل د ولایتي شورا رییس عطاجان حقبیان سلاموطندار ته ویلي چې بېګاه شپه وسلهوالو طالبانو د دغه ولایت د «شهر صفا» ولسوالي پر امنیتي پوستو بریدونه کړي چې له امله یې د دې ولسوالي د امنیه قومندانۍ د قرارګاه قومندان له څلورو پولیسو سره وژل شوي دي.
حقبیان وایي چې په دې نښته کې ۷وسلهوالو طالبانو هم وژل شوي او یوشمېر سپکې او درنې وسلې یې د امنیتي ځواکونو لاس ته لوېدلي دي.
په دې وروستیو کې د پاکستان د بهرنیو چارو وزیر شاه محمود قریشي د دې هیواد پارلمان ته د وینا پرمهال ویلي چې له افغان ولسمشر محمد اشرف غني څخه یې پوښتي چې ولې دغه حکومت له یوې خوا له پاکستان څخه مرسته غواړي او له بل پلوه پر دغه هېواد ناوړه تورونه لګوي او د پاکستاني چارواکو پر وړاندې ناسمې څرګندونې کوي. خو یوشمېر افغان سیاسي شنونکي په دې باور دي چې د دواړو هېوادونو چارواکو ترمنځ اړیکې د بل هر وخت په پرتله ښې دي او دوی د ولس تېر اېستلو لپاره د پردې ترشاه ښې اړیکې لري، خو په عمل کې بل څه په ډاګه کوي.
په کوچني اختر کې د افغان دولت او طالبانو ترمنځ له درې ورځني اوربند وروسته په یوشمېر ولایتونو کې د امنیتي ځواکونو پر پوستو د وسلهوالو طالبانو بریدونو زور اخیستی چې ورسره د دغه ولایتونو د اوسېدونکو اندېښنې یې راپارولي دي.
یوې باوري حکومتي سرچینې سلاموطندار ته ویلي چې نن سهار د لغمان ولایت دولتشاه ولسوالي د وسلهوالو طالبانو له خوا نیول شوې ده. سرچنیه وایي چې دغه ولسوالي وروسته له هغې د طالبانو لاس ته ولوېده چې بېګاه شپه له دغه ولسوالي ټول امنیتي سرتېری ایستل شوي وو.
نږدې دوه اوونۍ وړاندې د کابل ښار دیارلسمې حوزې اړوند دشت برچي سیمه کې پر سیدالشهدا ښوونځي خونړی برید وه شو چې د ورکړل شویو رسمي شمېرو له مخې، په دغه برید کې څه باندې ۸۰ کسان ووژل شول او نږدې ۱۵۰کسان پکې ټپیان شول. له دغه بریدو وروسته د بشري حقونوخپلواک کمېسیون د یوې خبرپاڼې په خپرولو سره وویل چې په افغانستان کې هزاره وګړي له نسل وژنې سره مخ دي او حکومت اړ دی، څو د نړیوالو قوانینو او حقونو پر بنسټ له دغه وګړو څخه ساتنه وکړي.
