ولسمشر محمداشرف غني نن د کابینې په لومړنۍ ډیجیټلي غونډه کې وویل، تر هغه چې وضعیت د جګړې په ډګر کې بدل نه شي، طالبان د سولې رښتینو خبرواترو ته نه حاضرېږي.
د هغه په وینا، د وضعیت د بدلون لپاره یې چمتووالی نیولی او تر راتلونکو شپږو میاشتو پورې به په بشپړ ډول بدل شي.
طالبانو نن په هرات کې د سلاموطندار خبریال شکېب شمس او د هغه مېرمن ستوری کریمي چې د پژواک خبري اژانس خبریاله ده، نیولي او له څو دقیقو وروسته یې بېرته خوشې کړي دي. شکېب شمس وايي، طالبانو هغه مهال ونیول چې له خپلې مېرمنې سره یوځای د هرات «مالان پُل» سیمې ته چې د جګړې لومړۍ کرښه ده، د خبري پوښښ لپاره تللي وو.
د کندوز ولایت د ټرافیکو مدیریت غړی محمدبشیر چې درې ورځې وړاندې له کور څخه د دندې پر لور روان و، د ناپېژنده وسلهوالو له لوري تښتول کېږي چې د کورنۍ د غړو په وینا يي، له تښتولو درې ورځې وروسته یې مړی پیدا شوی دی. داعش ډلې د یوې ویډیو په خپرولو سره ادعا کړې چې د ټرافیکو دغه پولیسو یې د کندوز ښار په ابدان دښته کې وژلی دی.
په وروستیو ورځو کې داسې راپورونه خپاره شوي چې وسلهوالو طالبانو د ولایتونو پر مرکزونو خپل بریدونه پیل کړي دي. په خپاره شویو راپورونو کې ویل شوي چې طالبانو د وروستیو اوونیو په ترڅ کې په هلمند، کندهار، تخار او پروان ولایتونو کې پرمختګ کړی دی.
د ارشاد، حج او اوقافو وزیر محمدقاسم حلیمي نن په کابل کې یوې خبري غونډې ته د خبرو پر مهال هرات کې د یوه دیني عالم مجیبالرحمان انصاري پر وروستیو څرګندونو تونده نیوکه وکړه او هغه یې د طالب ډلې غلام یاد کړ.
حلیمي وویل، انصاري سره له دې چې د دولت پیسې اخلي، خو د طالبانو د نظام لپاره تبلیغ کوي.
د پکتيا ولایت اړوند هغه ولسوالۍ چې د طالبانو تر ولکې لاندې دي، اوسېدونکي یې وایي، وسلهوالو طالبانو د دغو سیمو په ښوونځيو کې د تدریس پر یوشمېر مضمونونو بندیز لګولی دی. خو د دغه ولایت د پوهنې رياست مسوولان وايي چې د مضمونونو د تدريس چارې په عادي توګه روانې دي.
د هرات مسوولان په دغه ولایت کې د یوناما پر دفتر، «مالان پُل» او «پښتون پُل» سیمو د طالبانو د بریدونو خبر ورکوي. د هرات روغتیايي مسوولان وايي چې تر اوسه پنځه نظامیان او د درې ملکیانو په ګډون، ۲۱ کسان ټپیان شوي دي.
د هرات د حوزوي روغتون سرطبیب عارف جلالي وايي چې په وژل شویو کې یو د یوناما دفتر ساتونکی او څلور سرتېري شامل دي.
د ۲۰۹ شاهین قولاردو د دویمې لوا مسوولان وايي، پاکستاني وسلهوالو له طالبانو سره یوځای غوښتل چې د جوزجان مرکز شبرغان ښار ونیسي، خو ناکام شول. د دغې قولاردو د دویمې لوا قوماندان عبدالغني نظامي وايي، یاد پاکستانی متقاعد جنرال شیخ مطیعالله نومېږي او پلان یې ور شنډ کړی دی.
د افغانستان د ازدو رسنیو د ملاتړ ټولنه یا نی وايي چې طالبانو د روزګان ولایت د دهراوود ولسوالي له نیولو وروسته د «دهراوود غږ» راډیو وسایل لوټ کړي او ودانۍ یې هم نړولې ده.
د بېپولې خبریالانو سازمان په افغانستان کې د جګړې زیاتېدو او د امنیتي وضعیت خرابېدو په اړه اندېښنه ښودلې او ویلي یې دي چې د افغان دولت او طالبانو ترمنځ د جګړې زیاتېدو د بیان ازادي ته چې په وروستیو شلو کلونو کې د هېواد مهمه لاستهراوړنه بلل کېږي، سخت زیان اړولی دی.
د دغه سازمان په خبره، د طالبانو له لوري د یوشمېر ولسوالیو په نیول کېدو سره د اطلاع رسونې بهیر له خنډ سره مخ شوی دی.
د سولې په چارو کې د دولت وزرت مسوولانو نن کابل کې یوې خبري غونډې ته وویل چې د روان لمریز کال لومړیو څلورو میاشتو کې پر امنیتي ځواکونو د وسلهوالو طالبانو د بریدونو له امله ۵ زره او ۵۸۷ ملکیانو او نظامیانو ته مرګژوبله اوښتې ده.
په هرات کې د اسلامکلا او تورغونډۍ، فراه کې د ابونصر فراهي، تخار کې د ایخانم، کندوز کې شېرخان او پکتیا کې ډنډپټان هغه شپږ ګمرکونه دي چې د چارواکو په وینا، له شاوخوا یوې میاشتې راهیسې د طالبانو تر ولکې لاندې دي.
ولسمشر غني نن په ارګ کې د ملي بیرغ ورځې د نمانځنې په غونډه کې وویل، هېڅکله به د پردیو هغو طرحو ته تسلیم نه شي چې له هېواده بهر جوړېږي او غواړي افغانستان د جګړې پر ډګر بدل کړي.
هغه له طالبانو وغوښتل، که ملي ګټو ته ژمن وي، د هېواد د ورانۍ لامل دې نه کېږي.
د استرالیا د بهرنیو چارو وزیره ماریس پین وایي چې افغانستان کې د وسلهوالو طالبانو له لوري د دوی تر ولکې لاندې سیمو کې د تاوتریخوالي دوام، د ملکیانو زورول په ځانګړې توګه د مېرمنو او نجونو شکنجه د اندېښنې وړ ده. د استرالیا د بهرنیو چارو وزیرې دغه څرګندونې د افغانستان د بهرنیو چارو له وزیر محمدحنیف اتمر سره نن په یوې ټيلیفوني اړیکه کې کړې دي.
د سولې په چارو کې د دولت وزارت نن د بلخ ولایت په مزار شریف ښار کې د «جګړې اوښکې د سولې مسکا» په نوم د تصویرونو د نندارتون پرانیسته وکړه.
د افغانستان لپاره د ملګرو ملتونو ځانګړې استازې دېبرا لاینز په ولسمشرۍ ماڼۍ کې د څارنې او همغږۍ د ګډ بورډ غونډې ته په وینا کې وویل چې په وروستیو میاشتو کې ملکیانو ته د اوښتې مرګژوبلې اصلي عاملان وسلهوال طالبان دي او که چېرته دغه ډله له جګړې لاس وانخلي، منزوي به شي. مېرمن لاینز وایي چې دوی د ملکیانو پر وړاندې د طالبانو ټولې کړنې تر څار لاندې نیولي دي.
