د ولسمشر لومړی مرستیال امرالله صالح د نن پر خپله فېسبوکپاڼه لیکلي، په لویو ښارونو کې د ترور کچې د لوړېدو مهم لامل دا دی چې طالب بندیان فکر کوي، په هر حال کې بښل کېږي او د خپلو کړنو سزا نه ویني.
امرالله صالح واي، د دې ستونزې یوه اساسي حل لاره د یو شمېر نیول شویو اعدامول دي، تر څو پاتې نور ترې عبرت واخلي.
په کندوز کې یوه امنیتي سرچینه چې نه غواړي نوم یې یاد شي، سلاموطندار ته ویلي چې د طالبانو دوو بېپیلوټه الوتکو نن ماسپښین د دغه ولایت په امامصاحب ولسوالي کې د ملي اردو پر یوه کنډک بم غورځولي دي.
فاریاب ولايت کې په تېرو دوه میاشو کې د طالبانو ۷موټربم چاودنې شوې دي. د ياد ولايت امنیتي مسوولان وايي، طالبانو دې ولايت کې په دې وروستيو کې موټربم بريدونه ډېر کړي دي.
د فارياب د امنيې قومندانۍ وياند عبدالکریم یورش سلاموطندار ته وايي، په تېرو دوه میاشو کې ۳ موټربمونو ته طالبانو چاودنې ورکړي او ۴ نور يې موخې ته له رسېدو وړاندې د امنيتي ځواکونو له لوري په نښه شوي او الوځول شوي دي.
د ولسمشر لومړی مرستيال امرالله صالح وايي، د درېيمې حوزې پوليسو هغه دوې نجونې ونيولې چې د مفشنو جامو په اغوستلو سره به يې له نېکو او مشهور کسانو باج اخيسته.
امرالله صالح نن پر خپله فېسبوک پاڼه ليکلي، دغه دوه نجونې د شپږنيمو بجو د غونډو د لارښوونې له مخې نيول شوې دي.
سترې محکمې تاييد کړه چې نن سهار کابل ښار کې ناپېژاندو وسلهوالو دوه ښځينه قاضيانې ترور کړې دي.
د سترې محکې د حقوقي او قضايي مطالعاتو رييس او وياند احمد فهیم قویم سلاموطندار ته وايي، په دې پېښه کې دوه ښځينه قاضيانې وژل شوي او موټرچلوونکی يې ټپي شوی دی.
په پکتيا کې يوشمېر مېرمنو په يوه غونډه کې وويل چې په کورونو کې ناقانونه وسلې د دې لامل کېږي چې په کور کې پر تاوتريخوالي سربېره د مېرمنو د حق غوښتنې غږ چوپ کړي، خو يو شمېر نورې بيا پر دې باور دي چې په کورونو کې د وسلو ساتنه د دې لپاره ده چې د کور او مېرمنو امنيت له غلو، تېري کوونکو او مخالفو کسانو نه خوندي کړي.
طالبانو له افغانستانه د شاوخوا دوو زرو امریکايي سرتېرو د وتلو له اعلان څو ساعته وروسته په کندهار کې د ځانګړې قطعې پر کنډک موټربم برید وکړ. په همدې حال کې د طالبانو نفوذي کسانو بېګاه د هرات په غوریان ولسوالي کې پر ولسي پاڅونوالو برید کړی چې له کبله یې ۱۲ پاڅونوال وژل شوي دي. په بلخ کې بیا ۸ طالبان وژل شوي او ۱۱ ټپیان دي.
نن سهار شاوخوا ۸ بجې د کندهار دامان ولسوالۍ کې د ملي امنیت ځواکونو د موټرو پر ورکشاپ درنه چاودنه وشوه او ورپسې نښته پيل شوه. دې ولايت کې یوه امنیتي سرچینه چې نه غواړي نوم یې خپور شي وايي، تر موټربم برید وروسته وسلهوال بریدګر په پوځي یونیفورم کې سیمې ته دننه شول او ترڅو ساعتونو پورې یې افغان ځواکونو سره جګړه وکړه.
ولسي جرګې په خپله نننۍ غونډه کې دويم ځل لپاره د ۱۴۰۰مالي کال بوديجه چې د ماليې وزارت له لوري ورته لېږل شوې وه، د رایو په اکثريت رد کړه.
د ولسي جرګې رييس میر رحمان رحماني په نننۍ غونډه کې وويل، ماليې ورازت نه يوازې دا چې د بوديجې د طرحې۱۷ موارد يې سم کړي نه دي، بلکې دوه نور موارد چې تخطي ښيي په بوديجه کې زيات کړي دي.
د هرات امنیتي مسوولان وايي چې د دغه ولایت په غوریان ولسوالي کې ۱۲ ولسي پاڅونوال وژل شوي دي.
د هرات د امنیې قومانداني ویاند عبدالاحد وليزاده سلاموطندار ته وايي، د طالبانو نفوذي کسان بېګاه شاوخوا ۹ بجې د ولسي پاڅونوالو یوه مرکز ته ورغلي او ۱۲ پاڅونوال یې وژلي دي.
بغلان کې محلي او امنيتي سرچينې وايي، طالبانو د بغلان – کابل لويې لار کې د تېلو ۶ ټانکر سوځولي او ۷ کسان يې له ځان سره وړي دي.
دغه سرچينې چې نه غواړي نومونه یې خپاره شي سلاموطندار ته وايي، طالبانو تېره شپه «کيلهګي» سيمه کې د امنيتي ځواکونو پر پوستو بريدونه کړي چې په دې نښتو کې چاته زیان نه دی رسېدلی خو طالبانو له نښتو وروسته دوشي ولسوالۍ کې د بغلان ـ کابل لویې لارې پر سر د تېلو ۶ ټانکر سوځولي دي.
تخار کې ځايي سرچينې او امنيتي مسوولان وايي، دښتکلا ولسوالۍ کې ناپېژاندو وسلهوالو دوه ملکي کسان وژلي او يو کس يې ټپي کړی دی.
د دښتکلا ولسوالۍ مدني فعال حامد قرلق سلاموطندار ته وايي، دغه پېښه چې د يوې کورنۍ دوه غړي پهکې وژل وي او يو کس ټپي دی د يادې ولسوالۍ «خمدان» سيمه کې شوې.
کندوز کې یوه کره امنیتي سرچینه چې نه غواړي نوم یې خپور شي وايي، د طالبانو دوو بېپیلوټه الوتکو نن د ۲۱۷ پامیر قول اردو پر یوې برخې بم غورځولی او د پوځ یوه چورلکه یې تخریب کړې ده.
سرچینې وویل، دغه بېپیلوټه الوتکې دوه ساعته د پامیر قول اردو پر سر ګرځېدې او افغان ځواکونه یې په رانسکورولو بریالي نهشول.
د کندوز د ولایتي شورا غړی خالالدین حکیمي وايي، طالبانو تېره شپه د امامصاحب ولسوالۍ «اورتهبوز» سیمه کې پر امنیتي پوستو بریدونه کړي چې د افغان ځواکونو غبرګون سره مخ شوي.
د غزني د امنیې قومندانۍ ویاند احمد خان سیرت وايي، امنیتي ځواکونو له چاودېدونکيو توکو ډک یو موټر چې غوښتل یې د غزني ښار اړوند سیمه کې د پوځ پر یوه کمپ برید وکړي، په نښه کړی او چاودنه یې کړې.
سيرت وویل، دغه چاودنه کې ۷ امنیتي ځواکونه ټپيان شوي.
د ملي امنیت عمومي ریاست وايي چې د غور د ولایتي شورا غړی عزتالله بېګ په فېروزکوه ښار کې د ملي امنیت ځواکونو سره په نښته کې وژل شوی دی.
دغې ادارې نن په یوه خبرپاڼه کې ویلي چې د ملي امنیت ځانګړو ځواکونو غوښتل چې د غور د ولایتي شورا مرستیال عبدالرحمان عطشان او د غور غږ راډیو د مسوول بسمالله عادل ایماق «د ترور عامل» او د غور د ولایتي شورا غړی عزتالله بېګ ونیسي، خو هغه د تسلیمېدو پر ځای، د ملي امنیت پر ځواکونو بریدونه وکړل او د دواړو لوریو ترمنځ نښته کې ووژل شو.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
