د ولسي جرګې غړي غلام حسین ناصري نن په کابل کې «د سولې پېچلې لاره، ننګونې او فرصتونه» سیمینار کې وویل، د امريکا او طالبانو ترمنځ د سولې له شوې هوکړې سربېره دواړو لوريو د ۹۰۰ پاڼو يوه ضمیمه هم لاسلیک کړې ده. د ناصري په وينا، دغه ضمیمه په پټه لاسلیک شوې او ولسمشر محمد اشرف غني او د ملي پخلاینې عالي شورا رییس عبدالله عبدالله يې له متنه خبر نه دي.
ولسمشر غني نن د يوه لوړپوړي پلاوي په مشري هرات ته لاړ؛ خو هېڅ خبريال ته اجازه نه ده ورکړې شوې چې د ولسمشر سفر تر پوښښ لاندې ونيسي.
له دې سره د هرات محلي ادارې له خبريالانو غوښتي چې د ولسمشر د وياند د مرستيال دواخان مينهپال خبري ناسته کې ګډون وکړي؛ خو خبريالانو په دې ناسته کې ګډون د ځان بېحرمتي بللې او د ولسمشر غني سفر يې تحريم کړی دی.
ولسمشر محمد اشرف غني د امریکا د نوي ولسمشر په توګه د جوبایډن ټاکل کېدل، د متحده ایالتونو لپاره تاریخي ورځ بللې. جمهور رييس غني جوبایډن ته د مبارکۍ پیغام کې ویلي، افغانستان کې کلونو راهیسې جګړه روانه ده او د امریکا د نوي حکومت له مشرتابه تمه لري چې دې روانو شرایطو کې د افغانستان ترڅنګ ودرېږي او دلته د روانې جګړې د پای ته رسولو لپاره کار وکړي.
د مالیې وزارت مسوولان وايي چې د معاشونو یوشانوالی چې د ولسي جرګې له لوري یې وړاندیز شوی، باید د دې جرګې له لوري تعریف شي.
د مالیې وزارت مرستیال عبدالمجیب ځدران نن ملت ته د دولت حسابورکونې په غونډه کې وویل چې د معاشونو یوشانوالي طرحه د عملي کېدو وړ نه ده، خو کېدای شي چې تعادل پهکې په پام کې ونیول شي.
د افغانستان پر روڼتیا د څار بنسټ تازه راپور ښيي چې په تېرو ۱۲ کلونو کې ۲۷۶ میلیارډه افغانۍ د احتیاطي کوډونو په نوم پر سیاسي موخو لګېدلي دي.
د قانون له مخې، احتیاطي کوډونه باید د ټولې بودیجې درې سلنه جوړ وي او حکومت نه شي کولای چې په دغو کوډونو کې تر دې ډېرې پیسې ولګوي.
د بغلان محلي چارواکي او ولسي سرچینې وايي چې د پخواني جهادي او د ۱۰۰ ولسي پاڅونوالو د اوسني قوماندان ملا علم په مېلمستون کې یوې چاودنې د نوموړي په ګډون ۱۰ کسان ټپیان شوي دي.
د ولسمشر سلاکار او د ولسمشرۍ ماڼۍ د سټراټېژیکو او عامه اړیکو رییس وحید عمر وايي چې طالبانو په هېواد کې تاوتریخوالی ډېر کړی او د دې ډلې د نورو بندیانو خوشې کول په هېڅ ډول نه شي توجیه کېدای.
نوموړي نن ملت ته د دولت حسابورکونې پروګرام په پرانېستونکې غونډه کې وویل چې حکومت د نورو طالب بندیانو له خوشې کولو سره مخالف دی.
د امریکا د نوي منتخب ولسمشر جو بایډن له لوري د دغه هېواد د بهرنیو چارو وزارت لپاره نومول شوي انټوني بلینکن ویلي چې د امریکا او طالبانو ترمنځ شوې هوکړه به وارزوي. نوموړي ویلي چې تر اوسه د امریکا او طالبانو ترمنځ د سولې خبرواترو له جزیاتو نه دی خبر او باید دغه هوکړهلیک وارزوي چې پر کومو موضوعاتو پهکې هوکړه شوې ده.
د هرات امنیتي او روغتیايي مسوولان وايي، ناپېژنده وسلهوالو په دغه ولایت کې د ملي اردو پر رېنجرې ډزې کړي چې له کبله یې ۳ سرتېري وژل شوي او ۴ نور ټپیان دي.
د هرات د پولیسو ویاند عبدالاحد وليزاده وايي چې یاده پېښه نن سهار ۷ بجې د هرات ښار په «پای منارها» سیمه کې هغه مهال شوې چې د ملي اردو یوه رېنجره له سیمې د تېرېدو په حال کې وه.
د ښار جوړولو او ځمکو وزارت په دوو جلا جلا مکتوبونو کې دلاور مزاري او شېرشاه هوتک د بلخ د ښار جوړولو او ځمکو ریاست د رییسانو په توګه ټاکلي دي. اوس مزاري او هوتک دواړه ادعا لري چې د دغې ادارې قانوني رییسان دي.
په دوحه کې د حکومت د مرکچي پلاوي غړي عبدالحفیظ منصور سلاموطندار ته ویلي چې د طالبانو له مرکچي پلاوي یې غوښتي چې تر اجندا وړاندې د دواړو لوریو دیني عالمان دې د قرآن او حدیثو په رڼا کې د جګړې پر مشروعیت او نه مشروعیت د رسنیو په مخ کې بحث وکړي.
هغه وايي، که دواړه لوري یوې پایلې ته ورسېږي؛ نو بیا به د اجندا په ټاکلو کې ډېرې ستونزې لرې شي، خو په وینا یې، طالبانو تر اوسه دغه وړاندیز نهدی منلی.
په کندوز او بغلان کې امنیتي سرچینې وايي چې طالبانو په دغو ولایتونو کې د امنیتي ځواکونو پر پوستو بریدونه کړي چې له کبله یې ۱۸ کسان وژل شوي او ۵ نور ټپیان دي.
په کندوز کې یوې باوري امنیتي سرچینې د نوم نه ښودلو په شرط سلاموطندار ته ویلي چې طالبانو نن سهار وختي ۱۲:۳۰ دقیقې د دغه ولایت د دشتارچي ولسوالي په «تپه بیستوپنج» سیمه کې د امنیتي ځواکونو پر دوو پوستو بریدونه کړي دي.
د کړکېچ نړېوالی ډلې د افغانستان د چارو لوړپوړي څارونکي وایي چې ښایي د افغانستان مسله د امریکا د نوي حکومت لپاره مهمه نه وي .
د دې ډلې یوه لوړپوړي چارواکي انډي وارکنېس په یوه ځانګړې مرکه کې ویلي چې د امریکا د نوي ولسمشر له نږدې همکارانو او سلاکارانو سره یې خبرې کړي او په وینا یې، افغانستان به د بایډن ادارې د بهرني سیاست په لومړیتوبونو کې نه وي.
د هرات محلي چارواکي او امنيتي مسوولان وايي، د انسانتښتوونکيو يوه ۱۲ کسيزه ډله يې نيولې او له دې ډلې يې ۴ تښتول شوي کسان خوشې کړي دي.
د هرات والي سیدعبدالوحید قتالي کورنيو ته د ۴ خوشې شويو کسانو د تسليمۍ پر مهال وويل، دغه څلور کسان نن د انجيل ولسوالۍ «امام شش نور» سيمه کې د ملي امنيت او پوليسو په ځانګړو عملياتو کې د انسان تښتوونکيو له منګولو ازاد شوي دي.
د پکتيا مرکز ګردېز کې يوه کورنۍ وايي، شپږ مياشتې وړاندې يې يو زوی او څلور ورځې وړاندې يې بل زوی د امنیتي ځواکونو په لیکو کې ووژل شول. دغه وژل شوي سرتېري باسط او عبدالمالک نومېدل.
د وژل شويو سرتېرو ماشومان ژاړي، له خپل نیکه چاپېر دي، څیرې جامې یې پر تن دي او د خپلو وژل شويو پلرونو راتګ ته شېبې شماري.
په بغلان کې باوري سرچینې وايي چې طالبانو په دغه ولایت کې د ملي اردو پر یوې پوستې برید کړی او ۱۲ سرتېري یې وژلي دي.
دغو محلي او امنیتي سرچینو سلاموطندار ته ویلي چې طالبانو بېګاه د پلخمري ښار اړوند د بغلان-سمنګان او بغلان-کندوز پر لویو لارو د ملي اردو پر یوې پوستې برید کړی دی. د سرچینو په وینا، په دغه برید کې ۱۲ سرتېري وژل شوي، ۲ ټپیان دي او ۲ نور هم ورک دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
