د ملي دفاع وزارت مرستیال شاه محمود میاخېل پر خپله ټوېټر پاڼه ليکلي، افغانستان کې د غوڅ ملاتړ ماموریت افغان امنیتي او دفاعي ځواکونو سره د مرستو په دوام کې ۴۵۰ نوې هاموې ټانکونه، ۸۰ میلیونه مرمۍ، د شپې دوربینونه او ځینې نور پوځي تجهیزات افغان پوځ ته سپارلي.
ولسمشر محمد اشرف غني د ملي مصالحې عالي شورا له رييس عبدالله عبدالله سره کتلي او د سولې بهیر او ننګونو په اړه یې ورسره خبرې کړې دي.
له ارګه په خپره شوې خبرپاڼه کې راغلي، دغه لیدنه کې دواړو لوريو د ملي مصالحې عالي شورا د غړيو پر بشپړولو هم بحث کړی او عبدالله عبدالله ایران ته د خپل سفر په اړه ولسمشر ته معلومات ورکړي دي.
د خبريالانو د خونديتوب کمېټې سولې پروسه کې د رسنیو د ازادۍ د ملاتړ او ساتنې لپاره طرحه وړاندې کړه. د دې طرحې موخه د افغانستان حکومت او طالبانو ترمنځ د سولې د تړون له لاسلیک وروسته چې بايد د خبريالانو راتلونکی تضمین شي.
د ولسمشر دویم مرستیال سرور دانش «د افغانستان د خوړو د خوندیتوب او تغذیې ملي اجنډا درېیمې کلیزې» په مناسبت جوړې شوې نمانځغونډه کې وويل، هېواد د خوړو د خوندیتوب له ناورین سره مخ دی.
د سرور دانش په خبره ۱۳ میلیونه کسان چې د هېواد د نفوس ۴۴سلنه جوړوي، د خوړو مصوونیت نه لري.
کندوز ولايت کې سرچینې وايي، پر نظامي سيمو د طالبانو ډېری بریدونه د بېپيلوټه الوتکو له تصوير اخيستو وروسته کېږي.
ياد ولايت کې يوه سرچينه چې نه غواړي نوم يې خپور شي سلاموطندار ته وايي، درې شپې وړاندې د طالبانو بېپيلوټه الوتکې د کندوز ولايت له ملي امنيت رياست نه تصويرونه اخيستل چې افغان امنيتي ځواکونو پرې ډزې وکړې او الوتکه ورکه وشوه.
د سرشمېرنې او معلوماتو ادارې تازه نوی طرزالعمل جوړ کړی چې له مخې به یې د کار په مقابل کې مزد ورکول کېږي چې د هرې تذکرې د وېشلو په بدل کې به کارکوونکي ته ۵ افغانۍ ورکول کېږي.
د دې ادارې یو شمېر کارکوونکي د طرزالعمل له جوړولو شکایت لري او وايي، د دې طرزالعمل په پلي کولو سره د دوی امتیازونه د پخوا په پرتله کمېږي.
د ولسمشر لومړی مرستیال امرالله صالح وايي، د هغو ۱۳ امنیتي منسوبانو د خوشې کېدو امر يې صادر کړی چې په کابل پوهنتون د تېرې دوشنبې د برید مخنیوي کې په ناغېړۍ تورن او نیول شوي وو.
امرالله صالح نن پنجشنبه پر خپله فېسبوک پاڼه لیکلي چې د کابل پوهنتون په تړاو د وظیفوي غفلت په نوم د ۱۳ نوم ورکو پولیسو نیول کېدل بې مانا عمل دی او زياته کړې يې ده چې د پېښې په تړاو څېړنې لاهم دوام لري.
د ولسي جرګې غړيو پر کابل پوهنتون د دوشنبې برید او کابل ښار کې د ناامنیو زیاتېدو په تړاو پرېکړه وکړه چې د ولسمشر لومړی مرستیال امرالله صالح، د ملي امنیت سلاکار حمدالله محب، د ملي امنیت سرپرست احمد ضیا سراج، د دفاع وزارت سرپرست اسدالله خالد او د کورنیو چارو وزارت سرپرست مسعود انداربي به د راتلونکې شنبې په ورځ جرګې ته وروغواړي.
د کابل امنيې قومندانۍ وايي، د کابل پوهنتون برید په تړاو يې د کابل ښار د درېیمې حوزې۱۳ امنیتي مسوولان چې د ياد پوهنتون امنيت ورپه غاړه و، څارنوالۍ ته معرفي کړي دي.
له کابل امنيې قومندانۍ نه په خپره شوې خبرپاڼه کې راغلي چې د درېيمې امنيتي حوزې د پوليسو مسوولان يې د کابل پوهنتون امنیت ساتلو کې د غفلت له کبله له دندو لرې کړي او څارنوالۍ ته يې معرفي کړي دي.
د کندهار ولايت د پوهنې ریاست مطبوعاتي مسوول نظر محمد صمیمي له سلاموطندار سره خبرو کې وويل چې د وروستيو جګړو له کبله ۴۸ ښوونځي تړل شوي دي.
صميمي وايي، له تېرو ۲ اوونیو راهیسې د کندهار په څلورو ولسوالیو کې جګړو زور اخیستی چې له کبله یې ۲۴ ښوونځي په پنجوايي،۱۳ په ارغنداب،۱۰په ژېړۍ او ۱۰ښوونځي هم په میوند ولسوالۍ کې تړل شوي دي.
د کابل پوهنتون رهبرۍ اعلان وکړ چې د درسونو د ځنډ مخنيوي لپاره یې د پوهنتون درسونه نن بېرته پيل کړل.
کابل پوهنتون پر خپله فېسبوکپاڼه کې په خپره شوې اعلاميه کې ويلي چې د پوهنتون د بيا پرانيستو پرېکړه د ولسمشر محمد اشرف غني په لارښوونه د لوړو زدهکړو وزارت، د کابل پوهنتون د رهبرۍ د غړيو او امنيتي چارواکيو سره په ګډه ناسته کې شوې ده.
د ولسمشر لومړی مرستيال امرالله صالح وايي، پر کابل پوهنتون د برید په اړه لومړنۍ پلټنې او ارزونې ښيي چې ياد بريد طالبانو کړی دی.
امرالله صالح نن پر خپله فېسبوکپاڼه ليکلي چې دا برید بې له چون او چرا د کابل پر امریکايي پوهنتون د طالبانو له بريد سره ورته والی لري چې طالبانو کړی و.
کله چې کابل پوهنتون ته دننه کېږو، هرې خوا ته د چوپتیا سیوری غوړېدلی. له خبریالانو، امنیتي ځواکونو او د پوهنتون له ساتونکيو پرته هېڅ محصل پوهنتون کې نه لیدل کېږي.
تېره ورځ شاوخوا ۱۱ بجې ۳ ترهګر کابل پوهنتون ته دننه شول او د حقوقي زدهکړو د ملي مرکز پر ودانۍ یې برید وکړ.
وروسته له هغې چې پر هلمند د طالبانو برید پرمهال د هلمند ـ کندهار د برېښنا سبسټېشن یو لړ توکي ولوټل شول، اوس د هلمند د برېښنا شرکت ریيس وحیدالله علیزی وايي، وسلهوالو یو ځل بیا د دغه سبسټېشن د وسایلو وړلو ته مخه کړې ده.
پر کابل پوهنتون له ډلهييز بريد يوه ورځ وروسته د اسلامي همکاريو سازمان او ناټو دغه بريد غندلی دی.
د اسلامي همکاريو سازمان د يوې اعلاميې په خپرولو سره ويلي چې ياد سازمان هر ډول تاوتريخوالی، افراطيت او تروريزم غندي او ردوي.
د کندهار په ارغنداب، پنجوايي، میوند او ژېړۍ ولسوالیو کې له تېرو ۲ اوونیو راهیسې د افغان امنيتي ځواکونو او طالبانو ترمنځ نښتې روانې دي.
د ياد ولايت د میرویس حوزوي روغتون د جراحي څانګې مسوول ډاکټر قدرت الله حکیمي سلاموطندار ته وايي، په دې ولایت کې د طالبانو او امنیتي ځواکونو ترمنځ د وروستیو نښتو له کبله له بېلابېلو ولسوالیو « ۱۱۵» ملکي ټپیان ور وړل شوي دي چې په ټپیانو کې ښځې او ماشومان هم شامل دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
