ولسمشر محمد اشرف غني د ملي مصالحې عالي شورا له رييس عبدالله عبدالله سره کتلي او د سولې بهیر او ننګونو په اړه یې ورسره خبرې کړې دي.
له ارګه په خپره شوې خبرپاڼه کې راغلي، دغه لیدنه کې دواړو لوريو د ملي مصالحې عالي شورا د غړيو پر بشپړولو هم بحث کړی او عبدالله عبدالله ایران ته د خپل سفر په اړه ولسمشر ته معلومات ورکړي دي.
خبرپاڼه زياتوي، په دغه ليدنه کې د ملي امنیت شورا سلاکار د هېواد د عمومي امنیتي وضعیت او د طالبانو د وروستيو تاوتریخواليو د زیاتوالي په هکله جمهور ريیس غني او عبدالله عبدالله ته معلومات ورکړل.
ولسمشر غني او عبدالله عبدالله داسې مهال د سولې بهیر ننګونو په اړه خبرې کړي چې قطر کې د افغان سولې خبرو رسمي پرانیستې څخه شاوخوا دوه میاشتې تېرېږي؛ خو مرکهچي پلاوي لا تراوسه د خبرو پر طرزالعمل هوکړې ته نه دي رسېدلي او دغو خبرو کې هېڅ پرمختګ نه دی شوی.
