یوشمېر پاکستاني رسنیو رپوټ ورکړی چې د پاکستان د مالیې وزارت د اقتصادي همغږۍ کمېټې په یوې ناسته کې دې ته اجازه ورکړې چې یوشمېر صادراتي توکي په کلدارو پیسو افغانستان ته ولېږدول شي. بلخوا، د پاکستان د مالیې وزارت د وارداتو د څارنې کمېسیون له افغانستان څخه د جلغوزیو له وراداتو ۴۵سلنه ګمرکي تعرفه لرې کړې ده.
د ناروې د بهرنیو چارو وزارت ویلي، ټاکل شوې تر راتلونکو دوو ورځو پورې دغه هېواد د افغانستان په اړه د یوې غونډې کوربهتوب وکړي. د ناروې د بهرنیو چارو وزارت په وینا، په دې غونډه کې د اسلامي امارت چارواکي هم ګډون کوي. د اعلامیې په وینا، د اسلامي امارت استازي به په دغه دوه ورځنۍ غونډه کې د ګډون سربېره د ناروې مقاماتو او د نړیوالې ټولنې له استازو په ځانګړې توګه د ناروې له متحدینو سره هم وګوري.
د ملګرو ملتونو سرمنشي په افغانستان کې د لوږې او بېوزلۍ له امله د مړینو د ګواښ زیاتوالي په اړه خبرداری ورکړی او د بېړنیو مرستو غوښتنه یې کړې ده.
د افغانستان د صنایعو او کانونو خونې رییس شېرباز کمینزاده نن کابل کې یوې غونډې ته د خبرو پرمهال وویل چې د اقتصاد شورا او د کانونو او پطرولیم وزارت ته یې د هېواد د کانونو په ځانګړې توګه د لویو کانونو د استخراج او صنعت په برخه کې یو لړ وړاندیزونه سپارلي چې منل شوي هم دي.
د هېواد د لوېدیځې حوزې د صادروونکو ټولنې رییس سلاموطندار ته وايي چې د تېرو کلونو په پرتله سږکال د تولیدي توکو د صادراتو په کچه کې ۴۰سلنه زیاتوالی راغلی او دوی توانېدلي چې د څه باندې ۲۰۰ میلیونو ډالرو په ارزښت بهر ته صادرات وکړي.
د غور محلي مسوولان وايي چې د دغه ولایت اړوند د اللهیار ولسوالي په «سپینسنګ» کلي کې د ډبرو سکرو د یوه کان د استخراج چارې پیل شوي دي.
د افغانستان لپاره د ملګرو ملتونو ځانګړې استازې ډیبورا لاینز نن په کابل کې یوه کنفرانس ته د وینا پرمهال د افغانانو له وضعیت څخه اندېښنه څرګنده کړه.
د کارګرانو نړیوال سازمان ویلي چې پر افغانستان د اسلامي امارت له واکمنېدو وروسته، څه باندې نیم میلیون کسانو خپلې دندې له لاسه ورکړي دي. دغه سازمان په یوه تازه خپور کړي رپوټ کې ویلي چې افغانستان کې روان ناورین د دغه هېواد اقتصاد له پښو غورځولی او د کار بازار یې اغېزمن کړی دی.
د اسلامي امارت په مشري حکومت نن په کابل کې په لومړي ځل د افغانستان اقتصاد تر سرلیک لاندې کنفرانس جوړ کړ. په دغه کنفرانس کې د اسلامي امارت رییس الوزرا وویل، هغه ټول شرطونه چې د یوه نظام د مشروعیت لپاره اړین دي، اسلامي امارت بشپړ کړي او هېوادونه باید د دوی حکومت په رسمیت وپېژني.
د اسلامکلا ـ هرات لویې لارې یوشمېر موټرچلوونکي چې ایران ته تګ راتګ کوي وايي، له پولې هاخوا د ایران پارکینګونو کې هېڅ موټرچلوونکي د امنیت احساس نهکوي او د اخاذیو ترڅنګ یې وسایل هم د ایرانیانو لهخوا غلا کېږي.
د پکتيا مرکز ګردیز ښار کې د کتاب پلورنځيو مسوولان وايي چې د تېر په پرتله يې د کتابونو پېر او پلور ۸۵سلنه راکم شوی دی. دوی زیاتوي چې هېواد کې د سياسي بدلون سره د کتاب پېرودونکي کم شوي او په بازارونو کې د کتابونو د خرڅلاو بازار سوړ شوی دی.
د اسلامي امارت چارواکي وايي چې د راتلونکي کال په پسرلي کې به د هلمند ولایت د کجکي برښنا بند د تولید کچه لوړه شي.
د افغانستان بانک پرون په یوې خبرپاڼه کې ویلي وو چې د خصوصي بانکونو د صرافۍ خپلکاره یا «اېټياېم» ماشینونه فعال شوي او د بانکونو پېرېدونکي کولای شي چې له دغو چوپړتیاوو څخه ګټه واخلي، خو ځينو خصوصي بانکونو لا تراوسه دغه ماشینونه نه دي فعال کړي.
د اسلامي امارت د بهرنیو چارو وزارت چارسمبالي امیرخان متقي او ورسره مل پلاوي یې ترکمنستان ته د خپل سفر په ترڅ کې د دغه هېواد د لومړي وزیر له مرستیال او د بهرنیو چارو له وزیر رشید مرادوف او یوشمېر نورو لوړپوړو چارواکو سره لیدلي دي.
په شمالي ولایتونو (سرپل، فاریاب، جوزجان او بلخ) کې د جګړې له امله یوشمېر بېځایه شوې کورنۍ چې په مزارشریف ښار کې په کمپ/یونټ کې ژوند کوي، سلاموطندار ته وایي چې د خوړو نهشتوالي، لوږې او بېوزلۍ او د بېلابېلو ناروغیو د خورېدو له امله اړ شوي چې خپل ماشومان او پښتورګي وپلوري، خو د ديني علماوو په منځګړیتوب او د يوې خيريه موسسې په مرسته یې مخه نیول شوې ده.
د اسلامي امارت د رییسالوزرا دویم مرستیال عبدالسلام حنفي نن په کابل کې د مالیې راټولولو اوونۍ څخه د نمانځنې په یوې غونډې کې وویل چې د راټولې شوې مالیې یوه افغانۍ به بېځایه نه لګول کېږي. نوموړي زیاته کړ چې مالیه باید په سیستماتیک ډول راټوله او ترې د هېواد په ابادۍ او د اړتیا پوره کولو په برخه کې ګټه واخیستل شي.
