د اسلامي همکاریو سازمان د غړو هېوادونو د بهرنیو چارو وزیرانو د افغانستان په اړه د خپلې اوولسمې ناستې د جوړېدو په درشل کې ویلي، افغانستان د دغه سازمان د غړو هېوادونو بشپړ ملاتړ ته اړتیا لري. دغه سازمان له خپلو غړو او نورو هېوادونو غوښتي چې د افغانانو د ملاتړ لپاره مالي سرچینې او د بېړنیو مرستو د رسولو په برخه کې خپل پروګرامونه بسیج کړي.
د افغانستان په چارو کې د روسیې ځانګړي استازي ضمیر کابلوف په تازهګۍ سره ویلي، که افغانستان کې هر اړخیز دولت رامنځ ته نه شي، اسلامي امارت سیاسي واک نهشي ترلاسه کولای. کابلوف د افغانستان د سیاسي وضعیت څرنګوالي کې د ټولو قومونو ګډون او ونډه مهمه بولي.
په هېواد کې د وروستیو سیاسي تحولاتو او د ډالرو پر وړاندې د افغانیو ارزښت لوېدو سره د هېواد په بازارونو کې د خوراکي او سوند توکو بیې په کمسارې توګه لوړې شوې دي.
د پاسپورټ ریاست چارواکو نن په کابل کې د یوې خبري غونډې پرمهال وویل چې سر له سبا څخه د کابل په ګډون د درېوو نورو ولایتونو د پاسپورټ د وېش لړۍ بېرته پیلوي. د پاسپورټ ریاست سرپرست رییس عالمګل حقاني په دغه خبري غونډه کې وویل چې په پاسپورټ ریاست کې د بایومټریک ستونزې حل شوي او سر له سبا څخه به بېرته د کابل پاسپورټ ریاست په ګډون په درېوو نورو ولایتونو کې هم د پاسپورټونو د وېش بهیر بېرته پیل کړي.
په ملګرو ملتونو کې د افغانستان دایمي استازولۍ د یوې خبرپاڼې په خپرولو سره ویلي چې نصیراحمد فایق په دغه سازمان کې د افغانستان د نوي چارسمبالي استازي په توګه ټاکل شوی دی. دغه خبر وروسته له هغه خپور شو چې په ملګرو ملتونو کې د افغانستان د مخکیني دایمي استازي غلاممحمد اسحاقزي د استعفا په اړه راپورونه خپاره شول.
د مخکیني حکومت له پرځېدو وروسته په هېواد کې زیات شمېر غږیزې، انځوریزې او چاپي رسنۍ د مالي امکاناتو نشتوالي له کبله وتړل شوې چې ګڼشمېر کارکوونکي يې، اوس د وزګارتیا له امله بېبرخلیکه دي، خو هغه رسنۍ چې اوس هم فعالیت کوي، خبریالان یې وایي چې د رپوټ جوړولو پر مهال په اسانۍ اطلاعاتو ته په لاس رسي نه بریالي کېږي.
په دې وروستیو ورځو کې د ډالر پر وړاندې په کمسارې توګه د افغانۍ ارزښت په لوېدو سره هممهاله د هېواد په بازارونو په ځانګړې توګه د تخار په مرکز تالقان ښار کې د لومړنیو توکو بیې لوړې شوې دي. د تخار محلي چارواکي بیا وايي چې په بازار کې یې د توکو د بیو کنټرول لپاره کمېسیون جوړ کړی دی.
د عامې روغتیا وزارت د روغتیايي خدمتونو د وړاندې کولو معین عبدالباري عمر نن په کابل کې د یوې خبري غونډې پرمهال خبرداری ورکړی، د درملو واردونکي شرکتونه او هغه درملتونونه به وتړل شي چې فعالیتونه یې له طبي معیارونو سره په ټکر کې وي. د روغتیا وزارت چارواکي وايي چې بېکیفیته درمل د دغه وزارت د بدنامۍ لامل کېږي.
د بېپولې خبریالانو سازمان په خپل کلني راپور کې ويلي چې افغانستان په ۲۰۲۱ کال کې د خبريالانو لپاره تر ټولو خونړی دويم هېواد و. دغه سازمان ویلي، افغانستان له مکسیکو وروسته د خبریالانو لپاره خونړی هېواد بلل شوی چې په مکسیکو کې اووه او په افغانستان کې شپږ خبریالان وژل شوي دي.
که څه هم اسلامي امارت په هېواد کې دننه په سوداګریزه راکړه ورکړه کې د بهرنیو اسعارو پر کارونې بندیز لګولی، خو لا هم په ځینو لوېدیځو، سوېلي او ختیځو ولایتونو کې بهرني اسعار کارول کېږي.
پر افغانستان د اسلامي امارت له واکمنېدو وروسته، پرون د امریکا متحده ایالاتو ګانګرېس د داسې یوه کمېسیون جوړېدو ته رایه ورکړه چې په افغانستان کې د امریکا د شل کلنې جګړې د ناکامیو په اړه څېړنې وکړي. دا کمېسیون د امریکا د ۷۶۸ میلیارد دفاعي بودیجې یوه برخه ده چې د هغه هېواد د سنا مجلس له خوا د ۸۹ مثبتو رایو سره تایید شوه.
د ملګرو ملتونو د بشري حقونو او بخښنې نړیوالو سازمانونو بېلابېلو رپوټونو کې د اسلامي امارت له لورې د بشري حقونو د نقض په اړه اندېښنه ښودلې.
د افغانستان بانک د عالي شورا غړي شاه محمود محرابي یوې رسنۍ ته ویلي، د افغانستان د کنګل شویو شتمنیو د ازادولو په موخه یې د امریکا ولسمشر ته یو لیک لیکلی. هغه وايي، که متحده ایالت د افغانستان شاوخوا ۱۰ میلیارده ډالر نه ازدادوي نو د افغانیو د ارزښت ساتنې لپاره دې ۲سوه میلیون ډالر ازاد کړي.
په افغانستان کې د لوږې او بېوزلۍ د پراخو څپو په درشل کې د خوړو نړیوال پروګرام چارواکو په یوې خبري ناسته کې د افغانستان له اوسني وضعیت څخه اندېښنه ښودلې ده.
د ملګرو ملتونو سازمان پرون په جینوا کې د دې شورا په غونډه کې ویلي، داسې باورېدونکې ادعاوې یې ترلاسه کړي چې ښایي پر کابل د اسلامي امارت له واکمنېدو راهيسې افغانستان کې تر ۱۰۰ زیات کسان له محاکمې پرته وژل شوي دي. د بشري حقونو د شورا مرستیالې دغه راز ویلي، دې وضعيت په افغانستان کې د خلکو ترمنځ وېره او اندېښنه رامنځته کړې ده.
د فاریاب مرکز میمنې ښار کې د سړک غاړې یوشمېر لاسي پلورونکي په دغه ولایت کې د توکو د بیو لوړېدو له امله اندېښنه څرګندوي او د اسلامي امارت له مسوولانو غواړي چې دغې برخې ته جدي او بېړنۍ رسېدنه وکړي.
