د پاکستان د کورنیو چارو وزیر پرون د یوې وینا پرمهال افغانستان د پاکستان د یوه دښمن هېواد په توګه بللی دی.
د پاکستان د کورنیو چارو وزیر رانا ثناالله د خپلې وینا پرمهال د دغه هېواد مخکیني لومړي وزیر عمران خان ته په خطاب کې ویلي، «عمران خان چې کوم تورونه پر پاکستان لګولي، حتا دښمن هېواد افغانستان نه دي لګولي.»
رویټرز خبري اژانس د یوې سرچینې له قوله راپور ورکړی چې کابل کې د القاعده شبکې د مشر ایمن الظواهري له وژلکېدو سربېره به امریکا له اسلامي امارت سره د افغانستان بانک د کنګل شویو پیسو د ازادېدو په تړاو خپلو خبرو ته دوام ورکړي. والسټرېټ ژورنال لیکلي و چې امریکا په دې اړه له اسلامي امارت سره خبرې هم درولي دي.
مرجان میرزايي پروان ولایت کې د یوه ښوونځي د لسم ټولګي زدهکوونکې ده. نوموړې چې له تېره یوه کال راپدېخوا له ښوونځي څخه راګرځول شوې، وايي، ډېره ناهیلې شوې او ښوونځي ته بېرته ورګرځېدل یې په یوه خوب بدل شوی دی.
د شهیدانو او معلولانو چارو وزارت مالي او اداري رییس کلیمالله افغان نن کابل کې یوې خبري ناستې ته ویلي چې ګڼشمېر خیالي کورنیو د شهیدانو او معلولانو په نوم امتیاز ترلاسه کړي دي.
په تېره یوه شپه او ورځ کې د هېواد په ولایتونو کې د سختو اورښتونو له کبله سېلابونه راوتلي چې پرمهال یې یوشمېر کسان مړه شوي او ګڼشمېر کورونه یې نړولي دي.
د روڼتیا نړیوال سازمان په خپور شوي تازه راپور کې افغانستان د نړۍ د ۱۸۰ هېوادونو له ډلې د نړۍ اووم فاسد هېواد بللی شوی دی.
د یاد سازمان په راپور کې ویل شوي چې افغانستان بشري حقونو څخه د ملاتړ، فساد سره د مبارزې او مدني ازادیو په برخه کې د ۱۶ امتیازونو په ترلاسه کولو سره په ۲۰۲۱ کال کې د نړۍ د فاسدو هېوادونو نوملړ کې ۷ ځای خپل کړی دی.
د نورستان د والي ویاند سيفالدين لټون سلاموطندار ته ویلي چې د وروستيو سېلابونو له امله په کامدېش ، واما او منډول ولسوالیو کې ١٥ کسان مړه شوي او ٢٠ نور ټپيان دي.
د کابل یوشمېر اوسېدونکي وايي چې ځینې ډاکټران له یوشمېر درملتونونو سره په همغږۍ شفري نسخې لیکلي چې له ځانګړو درملتونونو پرته یې څوک نشي لوستلی.
د پکتیا ډنډپټان ولسوالي کې له پاکستان سره ډیورنډ کرښه کې د موټرو د تګراتګ او مسافرو پرمخ د دروازې د تړلکېدو له امله ګڼشمېر سوداګرو ته مالي زیانونه اوښتي دي. د یاد ولایت د سوداګرۍ او پانګونې خونې مسوول حسیبالله ګردېزي ویلي چې له تېرو پنځو ورځو راهیسې دغه لاره تړل شوې او دواړو لوریو ته سلګونه موټر بند پاتې دي.
د دفاع وزارت سرپرست محمد یعقوب مجاهد ویلي چې د اسلامي ارزښتونو او ملي ګټو پر خلاف د چا فرمایشونه نشي منلی او نه به هم ورته غاړه کېږدي. نوموړي پرته له دې چې د کومې ډلې یا هېواد نوم واخلي، وویل چې ځینې کړۍ غواړي د قوم، ژبې او سمت په نوم د افغانانو ترمنځ بېلتون رامنځته کړي او خپلو موخو ته ځان ورسوي.
د سرحدونو، قومونو او قبایلو چارو وزارت مسوولانو نن ملت ته د دولت د حساب ورکولو پروګرام په لړ کې خپل کلنی راپور له رسنیو سره شریک کړ.
هېواد کې تر سیاسي بدلون وروسته خلک په دې تمه و چې نور به له چاودنو او بریدونو خوندي وي، خو کابل کې وروستیو بریدونو او چاودنو ښاریان لاپسې خپل امنیت ته اندېښمن کړي دي. پرون ماښام د کابل ښار د خیرخانې «صدیقيه» جومات کې چاودنې ۲۱ کسان ووژل او ۳۳ نور یې ټپیان کړل.
کندهار کې د دیني عالمانو، قومي مشرانو، د مخکیني حکومت د یوشمېر چارواکو او سلګونه نورو کسانو په ګډون د دیني عالمانو غونډه نن پیل شوه.
د افغانستان ملي راډیو ټلوېزیون پر خپله ټوېټرپاڼه لیکلي چې په دې ناسته کې شاوخوا ۳۰۰۰ کسانو ګډون کړی چې پر یو لړ ملي مسایلو به خبرې وکړي.
د بشريحقونو څار بنسټ، د جورج ټاون پوهنتون د ښځو او سولې موسسې او ځینو نورو بنسټونو پرون سپینې ماڼۍ ته یوه وړاندیز کې غوښتنه وکړه چې د ا.ا د چارواکو پر سفر د بندیز معافیت لغوه کړي. هغې وویل، د یادې پرېکړې په عمليکېدو سره به ا.ا ته وښودل شي چې افغانستان کې یې د ښځو او بشري حقونو پر وړاندې کړنې منفي دي.
د جوزجان امنیتي مسوولان وايي چې د دغه ولایت د فیضاباد ولسوالي اړوند «بالامردیان» کلي کې د اورلګېدنې له امله چې نږدۍ دوه اوونۍ وړاندې پیل شوې، تراوسه نږدې ۸۰۰ کورنۍ شبرغان ښار او بلخ ولایت ته بېځایه شوي دي.
د لوړو زدهکړو وزارت مسوولانو نن کابل کې ملت ته د دولت حساب ورکولو په لړ کې يوې خبري ناستې ته غونډې ته وویل، نړیواله ټولنه دې افغانستان کې د معیاري لوړو زدهکړو په برخه کې مرسته وکړي.
