ډاکټر تیتڅو ناکامورا چې افغانانو کاکامراد باله، هغه جاپانيالاصله افغان و چې افغانستان کې یې د اوبو مدیریت برخه کې بې سارې پروژې پلې او شاړې ځمکې یې ابادې کړې. هغه چې د جاپانۍ PMS خیریه موسیسې مشر و، کال وړاندې جلالاباد ښار کې ووژل شو.
د هغه تر وژل کېدو وروسته د ننګرهار چارواکيو وویل، د ډاکټر مورا کامي په نوم یو بل کس د PMS موسسې مشرۍ ته ټاکل شوی؛ خو هغه لا تر اوسه افغانستان ته سفر نه دی کړی.
د بلخ ولایت ترکمن توکمه اوسېدونکيو نن په کابل کې د یوې اعتراضیه غونډې پر مهال د حکومت له نه پاملرنې شکایت وکړ او ويې ویل، د هېواد په شمالي ولایتونو کې د دغه قوم د ځوانانو وژل، د ماشومانو برمته نیول او ترې باج اخیستل په یوه دود بدل شوي او عادي کار ګرځېدلی دی.
معترضو ترکمنانو ټینګار وکړ چې د وسلهوالو زورواکو له خوا د دوی ګواښل او برمته نیول ورځ تر بلې په ډېرېدو دي.
له شاوخوا ۷ مياشتو ځنډ وروسته نن په ارګ کې د ملي مصالحې عالي شورا لومړنۍ ناسته وشوه. د ناستې پرانيسته کې ولسمشر محمد اشرف غني، د ملي مصالحې عالي شورا رييس عبدالله عبدالله، سياسي رهبرانو، د حزبونو رهبرانو، د ملي شورا غړيو، ښځو او مدني ټولنو او همداراز د يادې کمېټې غړيو حضور درلود.
دې ناسته کې ولسمشر غني وویل، د روغې جوړې عالي شورا د افغانستان د یووالي استازیتوب کوي او اړتیا ده چې سولې ته د رسېدو لپاره ټول سره متحد شي.
د کندهار د امنیې قومندانۍ مطبوعاتي مسوول جمالناصر بارکزی وايي، وسلهوالو طالبانو نن سهار د ارغستان ولسوالۍ «صوفیانزو» سیمه کې هاموې ټانک څخه په ګټې اخیستو پر یوې امنیتي پوستې موټربم برید کړی.
د نوموړي په وينا، په دې چاودنه کې ۳ پولیس وژل شوي او ۵ ټپيان نور دي. طالبانو تر اوسه پورې په دې اړه څه نه دي ويلي.
د امریکا د بهرنیو چارو وزیر مایک پامپیو وايي، دوحه کې يې د افغان حکومت او طالبانو مرکچي پلاویو ته ویلي، که د مذاکراتو پر مهال تاوتریخوالی روان وي او پای ته ونه رسېږي د سولې خبرې به کومه پايله ور نه کړي.
نوموړي دغه څرګندونې تېره ورځ جمعه د بحرین په پلازمېنه مانامه کې د سټراټيژیکو مطالعاتو نړیوالو انسټيټیوټ ته په ویډیويي کنفرانس کې وکړې.
د ننګرهار ولايت رسنیز دفتر وايي، ياد ولايت لپاره يې د داعش تش په نوم والي هدایتالله وژلی دی.
په ياد ولايت کې د ملي امنیت ځانګړو ځواکونو تېره شپه د دوو بېلا بېلو عملیاتو پر مهال د چپرهار ولسوالۍ په للمه سیمه کې د ننګرهار لپاره د داعش ډلې تش په نوم نومول شوی والي او د ځانمرګو واسکټونو او ماینونو جوړونکی هدایت الله د مقاومت پر مهال وژلی دی.
ولسمشر محمداشرف غني د نړیوال بانک، د افغانستان لپاره د اسیا پرمختایي بانک، د روغتیا نړیوال سازمان او یونیسف ادارې له مسوولانو سره خبرې وکړې.
له ارګه په خپره شوې خبرپاڼه کې راغلي، دغه خبرې چې تېره ورځ ماښام د ليندۍ مياشتې په ۱۳مه نېټه د ويډيو کنفرانس له لارې وشوې، ولسمشر غني د نړیوال او اسیا پراختیایي بانکونو له ريیسانو غوښتي چې د کرونا واکسین برنامې د تطبیق په لومړي پړاو کې له افغانستان سره مرسته وکړي.
د افغانستان لومړنۍ جنراله او پخوانۍ د روغتیا وزیره سهیلا صدیق د پلازمېنې کابل په سردار محمد داود خان روغتون کې د ورپېښې ناروغۍ له کبله نن د جمعې په ورځ مړه شوه.
سهیلا صدیق له نږدې شپږو کلونو راهیسې د هېرې یا الزایمر په ناروغۍ اخته او سردار محمد داود خان روغتون کې یې درملنه کېده.
د امریکا د پوځ لوی درستیز مارک مېلي وايي، د امریکا دفاع وزارت له افغانستانه د پوځیانو د ایستلو پلان تایید کړی دی خو د دې پلان پر بنسټ به امریکا په افغانستان کې دوې سترې اډې له ځان سره وساتي.
د رویټرز خبري اژانس او امریکايي رسنۍ له راپورونو سره سم، لوی درستیز جنرال مېلي په پروکینګز انستیتیوت کې خبرې کولې وویل، پر دوو لویو اډو سربېره به د امریکا پوځ څو کوچنۍ اډې هم ولري.
سلاموطندار وغوښتل د ملي مصالحې د عالي شورا د جوړښت او د سولې په مذاکراتو کې د یادې شورا د دندو او تر سره شویو فعالیتونو په اړه معلومات ترلاسه کړي؛ خو د مصالحې عالي شورا ویندویان او نور غړي د معلوماتو ورکړې ته حاضر نه شول.
په داسې حال کې چې په دې وروستیو کې په دوحه کې د افغانستان حکومت او طالبانو د مرکچې پلاويو د سولې د مذاکراتو پر کړنلارې هوکړه وکړه او ټاکل شوې چې د سولې رسمي خبرې پيل شي؛ خو د لته بیا د ملي مصالحې عالي شورا تشکیلات نه دي بشپړ شوي.
د ډېسمبر درېیمه نېټه د معلولانو له نړیوالې ورځې سره برابره ده. سږکال د دې ورځې د نمانځنې پر مهال ګڼ شمېر هغو معلولانو چې نظامي دندې يې درلودې او پهکې ټپي شوي دي، پر حکومت نیوکه وکړه چې دوی ډېرې ستونزې لري او حکومت له پامه غورځولي دي.
دوی وايي، که څه هم د خپلو خلکو او هېواد لپاره يې د بدن غړي له لاسه ورکړي؛ خو د سولې په پروسه کې چې د افغانستان برخلیک ټاکي، دوی له پامه غورځول شوي دي.
د قطر پلازمېنې دوحه کې د افغان دولت او طالبانو مرکهچي پلاوي له نږدې ۳میاشتو وروسته تېره ورځ د بینالافغاني خبرو د مقدمې په ګډون د طرزالعمل پر وروستي کېدو هوکړې ته ورسېدل.
دواړو لوريو یوه ګډه اعلامیه کې ویلي، کاري کمېټو ته یې دنده سپارلې چې د اجنډا موضوعات ترتیب کړي؛ خو د سولې خبرو کې د دغه پرمختګ سربېره هېواد کې جګړې دوام لري.
د ناټو سرمنشي ينس سټولټنبرګ د قطر په دوحه کې د سولې بينالافغاني خبرو کې د بنبست ماتېدو هرکلی وکړ.
قطر کې د حکومت او د طالبانو مرکچي پلاويو تېره ورځ وويل، د مذاکراتو د کړنلارې په اړه پخوا هوکړه شوې وه او د مقدمې په اړه هم هوکړه وشوه.
د افغانستان د اسلامي جمهوريت د مرکچي پلاوي غړی نادر نادري او د طالبانو د مرکچي پلاوي وياند محمد نعيم په دوحه کې ويلي چې دواړه لوريو د سولې د خبرو پر اجنډا خبرې پيل کړې دي.
وروسته له هغې چې یو شمېر نوماند وزیرانو او د دولتي ادارو لپاره وړاندې شويو رییسانو خپل کاري پروګرامونه د ولسي جرګې په حضور کې وړاندې کړل، د ملي امنیت پخواني رییس رحمتالله نبیل تېره ورځ ناوخته پر خپله ټویټرپاڼه لیکلي چې د شپې له ۹ بجو وروسته د یو شمېر ولسي استازو د رایو اخیستو لپاره د جرګې د اداري پلاوي د یوه غړي په کور کې د نغدي امتیازونو وېشلو لړۍ روانه ده.
د لوګر ولایت سیمهییز چارواکي وایي، محمد اغې ولسوالۍ کې د کرکټ معياري لوبغالی جوړېږي. دغه لوبغالی د يادې ولسوالۍ ادارې ته څېرمه په ۳۰ جریبه ځمکه کې د ۶۸ میلیونه افغانیو په مالي لګښت د یوه کال په ترڅ کې جوړ او ګټې اخیستنې ته سپارل کېږي.
د دغه لوبغالي په ودانۍ کې جومات، د کرکټ اکاډمۍ، احاطوي دېوال، له ۴ تر ۵ زره نندارچیانو لپاره ځای شامل دي.
قطر کې د حکومت د مرکچي پلاوي یوه غړي چې نه یې غوښتل نوم یې خپور شي سلاموطندار ته وویل، د مذاکراتو د کړنلارې په اړه پخوا هوکړه شوې وه او د مقدمې په اړه ځینې ستونزې وې چې وضاحت ته اړتیا وه.
سرچینه وایي، وړمه ورځ انګلستان، امریکا، ملګروملتونو او اروپایي ټولنې د ځینو غړیو هېوادونو لکه جرمني او ناروې د استازو په منځګړیتوب سره حکومتي پلاوي ته وضاحت ورکړل شو چې د دواړو لورو د قناعت وړ و او پر مقدمې هم هوکړه وشوه.
